Minister di Husticia, Integracion, Transporte Publico y Energia, mr. drs. Arthur Dowers, ta forma parti di delegacion di Reino Hulandes cu e siman aki ta participa na New York na e di 81 Asamblea General di Nacionnan Uni.
Como representante di Aruba den delegacion di Reino, Minister Dowers ta participa hunto cu Prome Minister Pisas di Corsou, Minister Conner di Sint Maarten, Prome Minister Rob Jetten di Hulanda, Minister Berendsen di Asuntonan Exterior, Minister Van Weel di Husticia y Siguridad y Minister Sjoerdsma di Comercio Exterior y Cooperacion pa Desaroyo.
E siman aki, e delegacion di Reino ta atende e High-Level Week di e di 81 Asamblea General di Nacionnan Uni den cual anualmente hefenan di estado, hefenan di gobierno, ministernan y representantenan di organisacionnan internacional for di tur parti di mundo ta reuni na New York, pa trata diferente asunto internacional y retonan global.
Participacion di Aruba como parti di delegacion di Reino ta ofrece oportunidad pa aporta perspectiva y interesnan di Aruba den e dialogonan internacional cu ta tuma luga durante Asamblea General. Pa un isla manera Aruba, cooperacion internacional y representacion den foronan multilateral ta di importancia pa enfrenta retonan cu ta traspasa frontera y cu tin impacto directo riba nos pais y region.
Presencia di Minister Dowers den delegacion di Reino ta reafirma participacion di Aruba den e relacionnan internacional di Reino y ta brinda oportunidad pa mantene dialogo cu partnernan internacional.
