(AFP) – Polis na Berlin a lansa un proyecto controversial diahuebs cu ta usa camaranan di vigilancia cu inteligencia artificial (AI) den areanan di e capital Aleman cu nivel halto di criminalidad.
Durante un periodo inicial di cuater siman, e camaranan lo keda instala y ahusta den area di Kottbusser Tor prome cu nan cuminsa ser usa activamente. Despues, polis ta plania pa amplia e sistema pa otro districtonan den centro di ciudad cu ta designa como “areanan cu criminalidad halto.”
En bes di usa reconocimento facial, e tecnologia lo usa “AI espacial”, cu ta analisa movementonan pa detecta posible crimen y actonan di violencia.
Polis ta bisa cu e camaranan lo ta conecta cu pantayanan cu normalmente ta paga y cu solamente lo cende y mustra informacion ora AI detecta algo sospechoso.
“Por ehempel, e sistema por reconoce si un hende a cay of si a scop un bala di futbol,” polis a bisa den un comunicado, splicando cu esaki por reduci cantidad di alarmanan falso. “Situacionnan violento y daño por keda identifica automaticamente y e informacion por ser manda pa polis, cu despues lo tuma un decision” si ta necesario pa interveni. A pesar di e garantia di polis cu lo cumpli cu reglanan stricto di Alemania pa proteccion di dato, e plannan a causa critica di gruponan cu ta preocupa pa vigilancia excesivo di estado.
Alemannan ta specialmente protectivo di nan privacidad personal y cauteloso cu vigilancia di estado. Esaki ta parcialmente un legado di forsanan di polis secreto cu a opera bao di regimennan totalitario den pasado, incluyendo Gestapo di Nazi Alemania y Stasi di Alemania Oriental comunista.
Entre criticonan di e sistema policial nobo tin partido di izquierda extremo Die Linke, cu a gana eleccion di ciudad-estado di Berlin diasabra siman pasa y cu ta anticipa di cuminsa combersacionnan pronto cu otro partidonan pa forma un coalicion gobernante.
Fin di augustus, Die Linke y e partido ambiental Bündnis 90/Die Grünen a inicia hunto un accion legal contra e ley cu ta permiti e proyecto di vigilancia cu AI y cu ta duna polis otro podernan nobo. “Un super base di dato enorme por surgi cu lo kibra tur limitacion di estado di derecho,” e partidonan a bisa den un declaracion conhunto e tempo ey. “No ta cla cua datonan por ser procesa den futuro y pa cua proposito,” nan a argumenta.
