Ayera Aruba Conservation Foundation a anuncia cu a libera dos Coneu Arubiano di especie Sylvilagus floridanus nigronuchalis den naturalesa. E dos coneu aki a ser haya na 2025 como baby y awor ta back den naturalesa pa biba riba nan mes.

E anuncio aki a surgi riba plataforma di red social di e fundacion en conexion cu World Rabbit Day, unda a splica cu un ciudadano a haya e dos coneunan aki mientras e tabata rosando su tereno. E ciudadano a para cu su rosamento y a tuma contacto inmediatamente cu ACF, cual a tuma e dos criaturanan aki y a cuminsa cuida pa nan cu yudansa di un boluntario. Pa dos luna largo, e boluntario a tuma e responsabilidad balente pa cria e dos coneunan. Despues di periodo aki, ACF a dicidi cu nan tabata cla pa drenta naturalesa back.

Den nan publicacion, Roger Solagnier, Ranger di Conservacion di Biodiversidad na ACF, a splica cu e liberacion tabata uno sumamente exitoso. Prome cu a libera e dos criaturanan aki, a controla si e area tabatin boa presente pa esaki no crea un riesgo pa e dos coneunan. Coincidentemente a haya uno pero mes ora a atende cu ne y a claria e sitio di liberacion.

Na momento cu a habri haula pa e dos coneunan sali libremente, a nota cu mientras uno tabata activo y a bula sali mes ora, e otro tabata un poco mas dudoso y a tuma un poco tempo pa sali. Esaki, manera Solagnier ta afirma, ta algo normal y tur bestia ta tuma nan mesun tempo pa custuma cu un ambiente nobo.

E ranger a sigui splica cu despues di a libera nan, inicialmente a percura pa pone cuminda y bebida den e area pa asina e coneunan por tin nan alimento di “back up” consistiendo di hooi y yerbanan reconocibel mientras nan ta custuma cu bida salvahe atrobe. Actualmente, ACF no tin bista mas riba nan, pero a afirma cerca Bon Dia Aruba cu por mira varios coneu ta gosa di naturalesa den Parke Arikok.

Manera vocero di e fundacion a splica, subida y bahada di solo ta momentonan unda tin mas movecion di coneu y cascabelnan den Arikok. Den pasado a mira varios caso unda e criaturanan aki ta bira victima di vehiculonan cu ta pasa den e parke despues di bahada di solo, pero despues cu ACF a bira mas estricto tocante orario di operacion den parke, a nota un caida den casonan. Na mes momento, e vocero ta enfatisa cu poblacion di coneu ainda ta chikito y cu mester mas investigacion pa tin un bista mas amplio di cuanto Coneu Arubiano tin riba e isla.