(AFP)—Minister di Finansa ultra-derechista di Israel Bezalel Smotrich a pidi diadomingo pa anexa partinan zuid di Libanon y Franha di Gaza, y pa forsanan Israeli “bay den guera” contra Palestinonan den West Bank ocupa.
“Mi kier pa nos anexa por lo menos te na e liña geel na Gaza y te na Riu Litani na Libanon… pasobra si un guera termina na e mesun liñanan unda el a cuminsa, kico lo stroba e enemigo di bay den guera atrobe?” Smotrich a bisa den un podcast pa website di noticia Israeli Ynet.
E “liña geel” ta marca e area di Gaza cu ya ta bou control militar Israeli despues di e guera reciente cu a cuminsa despues di un atake di Hamas contra Israel riba 7 di october 2023.
“Mi ta kere cu nos mester bay den guera na Judea y Samaria, pa desmantela e Autoridad Palestino cu ta sostene terorismo,” el a agrega, uzando e termino biblico pa West Bank.
Smotrich ta lider di un partido ultra-derechista cu ta boga pa anexacion di henter West Bank, cu Israel ta ocupa desde 1967. Varios lider politico Israeli, tanto den e coalicion gobernante di derecha lidera pa prome minister Benjamin Netanyahu como den oposicion, a declara nan mes contra establecimento di un estado Palestino.
E pais lo tene eleccion riba 27 di october, cu Netanyahu den un competencia cera mientras e ta busca pa keda na poder.
Autoridad Palestino a condena diadomingo e yamada di Smotrich pa guera na West Bank. “Su declaracionnan ta un yamada explicito pa escalacion, anexacion y desplasamento, cu tin como meta debilita e posibilidad di un estado Palestino independiente,” e autoridad cu su sede na Ramallah a bisa den un declaracion.
West Bank ya a mira un aumento di violencia desde comienso di e guera den Franha di Gaza.
Por lo menos 1,110 Palestino, incluyendo varios militante, a muri na West Bank na man di soldadnan of colononan Israeli, segun un conteo di AFP basa riba cifranan oficial Palestino. Cifranan Israeli ta mustra cu por lo menos 49 Israeli, incluyendo civilnan y personal di seguridad, a muri den atakenan Palestino of durante operacionnan militar Israeli den e mesun periodo.
Atakenan di colononan contra Palestinonan a aumenta fuertemente den ultimo lunanan, hopi biaha cu poco of ningun consecuencia legal. Netanyahu a minimisa violencia di colononan contra Palestinonan, bisando cu apenas “par manifestantenan” ta cometiendo esaki.
Mas cu 500,000 Israeli ta biba den colonianan na West Bank, cu ta ilegal bou ley di derecho internacional, den e teritorio Palestino entre aproximadamente tres miyon Palestino.
