Ombudsman di Aruba a confirma cu pa mas cu 1 aña despues cu e ley creando su funcion a drenta na vigor, pueblo no tabatin unda pa hiba nan keho ainda.

E declaracion aki a ser haci via contestanan por escrito cu Ombudsman a duna despues cu medio local a acerca puntrando dicon e prome rapport anual di Ombudsman, cu lo mester cubri aña 2024, a keda presenta mas laat di loke e ley ta rekeri.

Anteriormente nos a reporta cu e prome rapport anual di Ombudsman di Aruba ta duna un bista di con e vigilante independiente mas nobo di nos isla a keda estableci na 2024, un aña dedica principalmente na construi e institucion prome cu por investiga keho di ciudadanonan.

Landsverdordening Ombudsman, e ordenansa nacional cu a crea e funcion, ta rekeri un rapport anual cada aña. Ombudsman a reconoce cu e obligacion aki ta “indiscutibel.” Sinembargo, e rapport anual pa aña 2024, cual ta e rapport cu ta cubri Ombudsman su prome aña, a keda publica dia 26 di augustus na 2026, mas cu un aña despues cu e aña cu e mester a cubri a caba.

Segun e rapport anual di 2024, e lunanan cu a sigui a ser usa pa establece e fundeshi organisativo, administrativo y legal cu ta necesario pa Ombudsman por opera independientemente.

Como resultado, Bureau Ombudsman no tabata operacional ainda pa ricibi y atende formalmente cu keho durante 2024. E rapport ta bisa cu esaki tabata un maneho intencional, den fase, destina pa sigura cu e proceduranan necesario tabata na lugar prome cu por cuminsa atende keho. Estadistica riba keho y con a atende nan ta spera di keda reporta pa prome biaha den e jaarverslag 2025.

E rapport anual tambe a splica e alcance considerabel di autoridad di Ombudsman. Supervision no ta limita na ministerionan di gobierno y cuerponan administrativo. Entidadnan di ley publico, compania di utilidad y organisacionnan priva ehecutando tarea den interes publico general tambe por cay bao mandato di Ombudsman. Organisacionnan cu ta duna servicio na mucha, incluyendo den educacion, cuido, asistencia y salud tambe ta cubri.

E rapport a indica cu e siguiente fase ta inclui apertura di e procedura formal di keho, reclutamento di personal, mehoracion di accesibilidad publico, y colecta sistematico di informacion tocante e cantidad y naturalesa di kehonan ricibi. Datonan asina eventualmente por duna miho bista riba e problemanan cu ciudadanonan ta enfrenta ora ta trata institucionnan publico. Manera nos a menciona den edicion anterior, ta importante pa tene cuenta cu un investigacion no ta rekeri necesariamente un keho di un ciudadano. Ombudsman por tambe lansa investigacion riba su propio iniciativa, permitiendo e institucion examina problema structural, patronchi of riesgo den gobierno hasta si no a entrega un keho individual.

Pa loke ta trata e atraso, segun Ombudsman su splicacion, esaki a sucede pa motibo di varios factor, cual entre otro ta cu e cuentanan financiero di 2024 bao ehecucion di un firma di accounting externo no a keda cla te juli di e aña aki. E bureau tabata den su fase di comienso ainda durante 2024, financieramente administra via ministerio di Asuntonan General, cual Ombudsman a bisa ta rekeri documentacion extra cauteloso di obligacionnan financiero y gastonan. Empleadonan di e bureau no a keda contrata tampoco te cu e di dos mita di 2025.

Ademas, aplicacion di e procesonan di trabao basico, administracion y organisacion interno a tuma mas di loke a planea originalmente.

Notablemente, no a pidi ningun extension formal ni a otorga esaki claramente. Ombudsman a confirma na medio local cu e ordenansa no ta contene un procedura separa pa pidi mas tempo, y cu ni gobierno ni parlamento, ni tampoco otro cuerpo a otorga – ni a pidi nan pa otorga – mas tempo. Pa loke ta trata ora a entrega e rapport formalmente na parlamento, el a bisa cu dia 28 di augustus a manda e-mail na parlamento cu peticion pa stipula un fecha pa e presentacion formal. Esaki ta nifica cu, e rapport ainda no a keda entrega oficialmente den persona.

Departamento di keho a habri 14 luna laat

E revelacion posiblemente mas impactante ta loke e atraso aki ta revela tocante ki ora e funcion di keho di Ombudsman a realmente bira util pa pueblo. Landsverordening Ombudsman a drenta na vigor dia 1 di october na 2024, sinembargo residentenan no por a entrega un keho cuminsando e fecha ey.

Segun Ombudsman, e empleadonan necesario, financiamento, structura na nivel di organisacion y sistemanan tecnico no tabata na luga ainda. Trabao a sigui den 2024 y gran parti di 2025 riba contratamento, proceduranan, fluho di trabao y sistemanan. Ombudsman no a habri formalmente pa ricibi y procesa keho te dia 1 di december 2025, 14 luna despues cu e ley cu ta establece esaki ya caba a drenta na vigor legalmente.

E detaye aki ta agrega contexto util na e bureau su propio estadisticanan pa mita di 2026, publica dia 5 di juli y anteriormente reporta tambe. E cifranan den e rapport aki, unda a informa cu a registra 60 keho entre januari y juni di 2026, cu 27 di nan (45%) tocante institucionnan cu no a contesta e ciudadano mes, ta representa realmente Ombudsman su prome mita aña cu e realmente tabata habri pa pueblo.

E buraco di 14 luna entre e ley su entrada na vigor y su disponibilidad real na residentenan ta yuda splica dicon Ombudsman, cu tecnicamente a “establece” na 2020 y a haya empleado nominalmente desde october 2024, a produci su prome cantidad di data di keho publico real na mita di 2026.

Evaluacionnan rekeri falta ainda pero esaki no ta un problema

Artikel 37 di Landsverordening tambe ta specifica kico e rapport anual mester contene, incluyendo evaluacionnan tocante con institucionnan ta trata publico y e estado di derecho di muchanan na Aruba.

Ombudsman a confirma na medio local cu ningun di e dos evaluacionnan ta den e rapport anual di 2024. Su hustificacion ta cu pa motibo cu no a atende ningun keho y no a haci investigacion den institucionnan of problemanan di hobennan e aña ey, simplemente no tabatin suficiente base basa riba hecho pa haci e tipo di evaluacionnan aki.

Sinembargo, Ombudsman ta mantene cu e rapport ta den cumplimento completo cu Artikel 37, splicando cu 2024 tabata “un aña di construccion” y cu e rapport ta detaya trabao cu genuinamente a tuma luga durante e aña. Rapportnan anual den futuro, segun Ombudsman, lo tin mester di inclui e evaluacionnan substancial na momento cu tin un base real di investigacion, keho y experiencia practico pa usa.

Ombudsman a anuncia cu e rapport anual di 2025, cubriendo e prome aña di realmente atende keho, lo keda entrega na parlamento prome cu fin di e aña aki. Mirando cu e rapport di aña 2025 lo, pa prome biaha, mester inclui e evaluacionnan institucional y di estado di derecho di mucha substancial cu ley ta rekeri, e lo provee un bista mas detaya tocante si Ombudsman – awo si completamente operacional despues di su comienso – por cumpli cu su propio obligacionnan legal na tempo.