Durante e reunion publico pa aproba e lista di comisionnan fiho di Parlamento pa e aña parlamentario nobo, Parlamentario Shailiny Tromp-Lee (MEP) a haci formalmente un traspaso di e trabou pendiente di e Comision di Finansa, Organisacion Gubernamental, Cultura y Deporte (CFOCS), cual el a presidi durante e ultimo periodo (jan – sept 2025 y aña parlamentario 2025-2026).

Cu un tono cla y firme, Tromp-Lee a subraya cu e cambio aki ta revela cu e famoso “politica nobo” di Partido FUTURO no tabata mas cu un postura politico di momento.

Traspaso oficial y falta di accion

Tromp-Lee a duna di conoce cu ora el a asumi e presidencia di e comision na aña 2025, el a haci’e cu e maximo compromiso y dedicacion pa sirbi interes di nos pais. Den e periodo aki a tene un total di 27 (12+15) reunion caminda a trata temanan di gran importancia y urgencia.

Pa percura cu e trabou parlamentario no ta keda stanca, dia 18 di september 2026, Tromp-Lee a manda un carta oficial dirigi na e presidente nobo di e comision, sra. R.V. Lindor, cu e lista completo di e10 reunionnan pendiente:

Directiva di HOH: situacion financiero

AZV: situacion financiero di HOH

Sindicato ABV: informacion comparti den prensa y situacion na HOH

Cede Aruba

IBiSA: celebracion 50 aña, plan di maneho y proyectonan 2026 e.v.

Update Landspakket – Parti A y B: Financieel beheer, kosten en effectiviteit publieke sector

Update Landspakket – Parti C y D: Belastingen y Financiële sector

FLPD: plan di maneho y proyectonan

Go Cultura: plan di maneho y proyectonan

Bishita di trabou na COA

Den e carta, Tromp-Lee a enfatisa cu e prome tres reunionnan relaciona cu e situacion financiero di Horacio Oduber Hospital (HOH), envolviendo Directiva di HOH, AZV y Sindicato ABV, ta di maximo urgencia, pa despues evalua si ta yama e Minister pa duna cuenta den un reunion publico of di comision.

A pesar cu e traspaso aki a tuma luga formalmente dia 18 di september 2026, awe 30 di september 2026, e presidente nobo sr. R.V. Lindor ainda no a yama ni un solo di e reunionnan pendiente y di urgencia aki. Esaki ta demostra un falta di prioridad y compromiso pa atende e temanan cu ta biba nos comunidad, specialmente e situacion alarmante cu ta afectando nos hospital y e cuido di salud na Aruba.

Un mascarada politico

Parlamentario Tromp-Lee a bisa bon cla cu e no ta mira un presidencia di comision como un propiedad personal, sino como un responsabilidad institucional. Sinembargo, el a cuestiona fuertemente e falta di transparencia y splicacion tras di e decision pa kita e presidencia aki. “E realidad ta cu mi a keda uza pa Partido FUTURO pa nan duna contenido na e palabra ‘politica nobo’ cu nan a campaña cu ne, comosifuera nan ta diferente y anan si ta duna presidencia na oposicion,” Tromp-Lee a expresa.

“Awe nos por conclui cu nan mascarada a cay. Si bo ta papia di politica nobo, bo mester cumpli sigur cu lo basico di e “politica bieu”: duna cuenta, comunica y sea transparente den decisionnan cu bo ta tuma.” Para pa bo decision y argumenta esaki, cual sigur nan no a haci.

Tromp-Lee a desmenti categoricamente e insinuacionnan cu e cambio aki ta pa motibo di falta di respet of abuso di poder. “Bisa berdad no ta un ofensa. Pa por debati cu contenido mester tene reunionnan, y e coleganan mester bin prepara y critico, no pa actua como cheerleaders,” el a enfatisa.

Compromiso permanente cu pueblo

A pesar di e cambio di liderazgo den e comision, e parlamentario a reafirma su compromiso serio cu e pueblo di Aruba:”Mi por laga e encargo di un presidencia, pero mi no ta laga mi compromiso y responsabilidad como representante di pueblo un banda. E trabou cu mi a haci tabata un trabou di curason pa nos pais. Pasobra e titulonan ta temporal, pero e responsabilidad pa nos pueblo ta permanente.”

Pa termina, Tromp-Lee a haci un apelacion fuerte pa e presidente nobo y e comision cuminsa funciona debidamente y yama e reunionnan pendiente y di urgencia aki den e unico interes di Aruba, y no pa complace gobierno of interesnan di coalicion.