E conflicto laboral na Arubus a conoce un desaroyo nobo despues di combersacionnan entre sindicato SEPPA y gobierno, cu segun secretario general Magaly Brito a resulta den diferente compromiso financiero cu por crea espacio pa un CAO nobo. Entre e puntonan menciona tin regreso di entrada relaciona cu pasaheronan di crucero, aumento di fondo pa Arubus y un proceso pa atende e debe di impuesto di compania.
Segun informacion cu Brito a comparti cu un medio local, un di e cambionan ta cu entrante 1 di october, entrada di e asina yama Cruise Passenger Fee (CPF) lo bolbe ser destina pa Arubus. E contribucion aki ta relaciona cu pasaheronan cu ta yega Aruba via crucero y cu antes tabata conecta cu operacion di Arutram.
Segun Brito, e entrada a ser kita for di Arutram na 2020. Cu e areglo nobo, e intencion ta pa Arubus no mester carga e mesun peso financiero relaciona cu Arutram, creando mas espacio financiero dentro di compania.
E di dos punto ta financiamento pa un CAO nobo. Brito a indica cu gobierno a pidi Arubus pa presenta su calculacionnan financiero di nobo. Basa riba esaki, gobierno lo aumenta e fondo destina pa e compania entrante 1 di januari 2027, cu e meta pa un CAO nobo por drenta na vigor for di e mesun fecha. E fondo adicional, sinembargo, ainda mester pasa door di e proceso necesario den Parlamento.
Negociacion no a termina ainda. SEPPA y Arubus tin un reunion planea pa diamars 6 di october pa yega na un acuerdo final tocante e CAO nobo cu lo mester drenta na vigor dia 1 di januari 2027.
Pa compensa e trahadornan pa e periodo actual, segun Brito, a acorda pa haci un pago unico, manera a sucede den añanan anterior. En bes di aplica e condicionnan di e CAO nobo retroactivamente pa 2026, trahadornan lo ricibi e suma aki separa. Arubus a propone dia 8 di december 2026 como fecha pa haci e pago.
Otro asunto cu a forma parti di e combersacionnan ta e debe di impuesto di Arubus. Brito a indica cu Minister di Finansa a duna instruccion pa inicia e proceso necesario pa atende e debe.
E desaroyo nobo ta bin despues di accion laboral di personal di Arubus na comienso di siman. E conflicto ta andando pa varios aña caba, mientras cu situacion financiero di Arubus a keda un di e puntonan principal cu ta haci dificil un acuerdo riba un CAO nobo.
Basa riba e compromisonan nobo, SEPPA a cancela e accion laboral mas amplio cu tabata planea pa ayera.
