E caso penal contra Chania Fernandes Pedra, chauffeur acusa den conexion cu e accidente fatal di hit-and-run di 4 di januari, cu originalmente tabata programa pa yega na tratamento den contenido, no a ser trata den contenido durante e audiencia di ayera.
Aunke un abogado di Corsou a presenta via video call pa asisti e acusado, Fernandes Pedra a indica cu e no a acepta e abogado como su defensor. Alabes, Corte a ricibi un peticion nobo pa suspende su detencion preventivo. Hues a rechasa e peticion y a fiha 4 di november como fecha nobo pa trata e caso, lagando cla cu pa e fecha ey e acusado mester percura pa tin representacion legal.
Fernandes Pedra ta acusa den conexion cu e accidente cu a sucede dia 4 di januari 2026 riba L.G. Smith Boulevard, den cercania di Renaissance Mall. Josely Paulina Vasquez Gonzalez, di 65 aña, y Carlos David Vialez Valerio, di 54 aña, ambos naci na Republica Dominicana, a perde nan bida despues cu un SUV a dal nan mientras nan tabata crusando caminda. Despues di e impacto, e chauffeur a sigui core.
Segun e acusacionnan presenta door di Ministerio Publico (OM), Fernandes Pedra ta enfrenta, entre otro, acusacion relaciona cu homicidio di dos persona, intento di homicidio di dos otro persona, sigui core despues di e accidente, stuur bao influencia y stuur sin un rijbewijs valido.
E caso, sinembargo, a bolbe topa cu e problema di representacion legal cu ya pa varios luna ta complica e proceso. Durante e audiencia, abogado Dickens di Corsou tabata presente via video call. Segun Fernandes Pedra, e abogado a presenta como posibel defensor apenas e dia prome cu tratamento di e caso.
Fernandes Pedra a indica na hues cu e no a duna su aprobacion pa Dickens represent’e. El a splica cu e no conoce e abogado y tampoco tin suficiente informacion tocante su experiencia pa pa acept’e como su abogado. Segun e acusado, e ta warda reaccion di dos otro abogado cu eventualmente por representa e.
Durante audiencia anterior, Fernandes Pedra a pidi asistencia pa por haya un abogado, despues cu el a keda sin abogado. Na augustus a sali na cla cu, despues di contacto cu abogadonan na Aruba y na Corsou, abogado Dickens di Corsou tabata e unico cu a bin dilanti dispuesto pa asumi e caso.
Hues a indica cu Dickens ta un abogado cu experiencia den derecho penal y cu, mirando e peticion anterior di Fernandes Pedra pa haya asistencia legal, e no tabata compronde completamente pakico awor e acusado ta rechasa e opcion cu a ser presenta. Sinembargo, Hues a enfatisa cu si Fernandes Pedra no kier Dickens como su abogado, Corte no por oblig’e pa acepta e abogado. Hues a laga bon cla si cu aworaki e bala ta den man di Fernandes Pedra y ta su responsabilidad pa percura pa e haya un abogado.
OM a expresa su descontento cu e situacion y a enfatisa cu famianan di e victimanan y comunidad ta warda riba claridad tocante e caso. Fiscal a cuestiona con Fernandes Pedra ta pensa di sigui awor, mirando cu ya a haci diferente intento pa haya representacion legal p’e.
E problema di asistencia legal no ta nobo. Prome cu e intento pa haya un abogado nobo, Fernandes Pedra ya tabatin otro representacion legal, pero diferente abogado a retira for di e caso. Tambe a haci intento pa Moszkowicz, un hurista Hulandes, brinda asistencia legal na Fernandes Pedra. Sinembargo, e no por actua como su abogado den e proceso penal na Aruba, entre otro pasobra e no ta registra pa eherce como abogado na Aruba.
Prome cu e audiencia di ayera, Corte a ricibi un peticion nobo di Fernandes Pedra, den cual el a solicita pa suspende su detencion preventivo y pa e caso no ser trata den contenido na e momento ey. Durante audiencia, Hues a aclaria cu, aunke anteriormente intencion tabata pa e caso yega na tratamento den contenido, pa e sesion di ayera esaki ya no tabata planea.
E documento di seis pagina ta firma door di Fernandes Pedra mes, pero na final ta aclara cu A.M. Moszkowicz a yuda cu formulacion di e peticion. E documento enfatisa explicitamente cu Moszkowicz ta un hurista y no ta actua como su abogado den e caso penal.
E argumento central den e peticion ta cu Fernandes Pedra ta deteni pa un periodo prolonga sin cu e tin un abogado cu efectivamente ta asistie. Segun e documento, Corte ya a reconoce durante audiencia di 20 di augustus cu, mirando naturalesa y gravedad di e acusacionnan, asistencia legal adecuado ta necesario. E peticion ta argumenta cu asigna un abogado riba papel no ta suficiente si e profesional no tin contacto cu e acusado, no studia e dossier completo y no por evalua e evidencia tecnico ni formula peticionnan di investigacion.
E peticion ta pone enfasis riba complehidad di e dossier. Entre otro, ta cuestiona calculacionnan relaciona cu velocidad di e vehiculo, cantidad di imagen pa seconde den material di video y e manera cu e reconstruccion tecnico di e accidente a ser haci. Tambe ta menciona posicion di e peatonnan prome cu e impacto, condicionnan di luz, visibilidad y e momento cu e peliger por a bira perceptibel pa chauffeur manera aspectonan cu, segun e peticion, un abogado mester por investiga y evalua.
Otro punto den e documento ta e investigacion di testigonan. E peticion ta señala cu Corte anteriormente a aproba e peticion pa scucha Y.K. Willems y H.A. Fernandez Rivas, pero despues a dicidi cu nan no lo ser scucha, teniendo na cuenta e carga psicologico cu un interogacion por causa. Segun e peticion, un abogado por a analisa si tabatin otro manera pa obtene informacion di e testigonan, por ehempel mediante pregunta por escrito of videoconferencia, y asina percura pa interesnan di Fernandes Pedra ser representa durante e proceso.
Ademas, e peticion ta argumenta cu detencion prolonga, combina cu incertidumbre tocante con y ki ora e caso lo por ser trata, ta causa presion personal y psicologico riba Fernandes Pedra. E documento a propone diferente condicion si Corte lo a dicidi suspende detencion, entre otro obligacion pa keda na un adres aproba, presentacion regular na autoridadnan, prohibicion pa sali di Aruba, entrega di paspoort, disponibilidad pa polis y Corte, supervision electronico y prohibicion pa tene contacto cu testigo of famianan envolvi.
Hues, sinembargo, a rechasa e peticion nobo pa suspende detencion preventivo. Durante evaluacion, Corte a tene cuenta cu e naturalesa y circumstancianan di e caso y e gravedad di e acusacionnan. Hues a considera tambe e impacto cu un liberacion na e momento aki por tin riba famianan di e victimanan y comunidad, hunto cu e desaroyonan reciente rond di representacion legal di e acusado.
Esaki ta otro biaha cu Corte ta nenga un peticion di Fernandes Pedra pa warda tratamento di su caso den libertad. Na juli y augustus, peticionnan similar tambe a ser rechasa.
Durante e audiencia, Hues a informa tambe cu a ricibi material adicional relaciona cu investigacion. Entre e documentonan nobo tin e proces-verbaal tocante cadena di custodia di e computer di e vehiculo y manera e material a ser transporta pa Hulanda pa investigacion. Tambe a ser agrega un rapport psicologico tocante Fernandes Pedra. Segun Hues, preparacion di e rapport a tuma mas tempo cu inicialmente tabata spera, pero awor e documento ta forma parti di e dossier. E contenido y conclusionnan di e rapport psicologico no a ser trata den detaye durante e audiencia di ayera.
Fernandes Pedra mes a haya oportunidad pa dirigi palabra na Corte. El a expresa remordimento y a pidi disculpa na famianan di e victimanan, indicando cu nunca tabata su intencion pa algo asina pasa. El a reconoce cu ningun disculpa por cambia loke a pasa ni trece e victimanan back, y cu e ta consciente di e dolor cu el a causa. El a indica cu e no ta purba busca excuus pa loke a pasa. Alabes, el a señala cu e situacion ta dificil p’e mentalmente, pero cu e ta comprende cu su situacion no por ser compara cu e dolor cu famianan di e victimanan ta experimenta.
Corte a fiha dia 4 di november pa tratamento di e caso. Hues a enfatisa cu e proceso ya a tarda demasiado y cu e caso mester por a ser trata den contenido mas prome. El a laga bon cla cu e problema rond di representacion legal no por sigui causa posposicion indefinidamente y cu pa e fecha ey Fernandes Pedra mester percura pa un abogado ta presente y prepara pa su defensa. Te e momento ey, e lo keda den detencion preventivo.
