(NLTimes) – Dia di Open House di NVM, organisacion di makelaar, a atrae un cantidad grandi di hende diasabra. Alrededor di 66.000 posible comprador a bishita e casnan participante, mas cu durante e edicion anterior na maart, ora e evento a atrae 52.000 bishitante.
Makelaar nan ta indica cu e tempo cla di diasabra probablemente a yuda. Tambe mas propietario a habri nan propiedadnan pa bishita e biaha aki. Entre 11:00 di mainta y 3:00 di atardi, hendenan cu tabata buscando cas por a drenta casi 14.500 cas sin mester haci cita.
Un ola di propiedadnan di huur cu a ser poni na benta tambe a aumenta cantidad di cas disponible pa cumpra e aña aki. Na maart, apenas 8.900 cas na benta a participa.
Segun NVM, algun bishita a duna resultado inmediato. Na Rosmalen, un cas a ser bendi na bishitantenan e mesun diasabra atardi ey, mientras un oficina na Apeldoorn a reporta por lo menos tres oferta.
E cantidad mas halto di bishitante a keda registra na un cas na Arnhem, unda organisadornan a conta 66 bishitante.
