Ningun hende no ta nenga e problema. Segun Oficina Central di Estadistica (CBS), un adulto cu ta biba su so tabata mester Afl. 2.697 pa luna na augustus 2026 pa cubri su gastonan basico. Un trahado riba salario minimo ta gana Afl. 2.007. Hasta cu e reparatietoeslag di Afl. 175, e ta keda cu un falta di Afl. 515 tur luna.

E contesta di Prome Minister Mike Eman (AVP) ta simpel: mara salario minimo na e bestaansminimum. E aumento lo cuminsa dia 1 di januari 2027 y lo wordo haci den fase den tres aña. Na final, ta trata di un aumento di mas o menos 34%, di Afl. 2.007 pa Afl. 2.700. Esey ta mas o menos 10% cada aña, pa tres aña. E intencion ta bon. E plan no ta bon.

Un decision sin estudio

Gobierno no a presenta ningun estudio di impacto, y ainda no tin ningun estudio cientifico cu ta midi e efectonan. Futuro, e socio di coalicion di AVP mes, ta pidi pa un decision “basa riba evidencia”. Den Parlamento, fraccion di PPA ta yama e manera di implementacion “absurdo” y ta cuestiona e velocidad di e plan. Gabinete a pospone e decision cu dos siman pa purba un dialogo atrobe, pasobra no a sinta cu sindicato y sector priva di antemano. Na juni, Gobierno a priminti cu un aumento lo bin despues di un dialogo social. Awo e dialogo ey mester tuma luga den dos siman.

Hasta e conseheronan di Gobierno mes ta bisa otro cos. Sociaal Economische Raad (SER) a conseha pa prome haci e estudionan necesario y papia cu sindicato y otro partido. Na februari 2026, SER a duna conseho, na peticion di Gobierno mes, riba un aumento den tres fase. SER a bisa cu esey ta posibel, pero cu Gobierno mester prome papia cu tur partido, pasobra e cambio lo afecta prijsnan, y cu e mester tuma otro medida hunto cu e aumento, manera un rebaha di belasting temporal pa empresario y yudansa pa famianan cu entrada abao. Gobierno a tuma e tres fase, pero no e condicionnan.

E salario minimo pa ora di Afl. 11,58 a cuminsa apenas na januari 2026, y ningun hende no a evalua su efectonan ainda. CBS no tin ni dato actual di salario: su tabelnan detaya di entrada ta di 2010 y 2016. Con Gobierno por dicidi un aumento di 34%, si e no sa ni cuanto trahadonan ta gana awo?

Y e momento ta bisa hopi. E subida lo cuminsa e mesun dia cu Eman ta baha como Prome Minister. E dos fase siguiente, y tur e consecuencianan, lo cay riba su sucesor.

Hasta Organisacion Internacional di Trabao (ILO), e defensor di mas fuerte di un salario digno, ta conseha un “progreso gradual for di salario minimo pa salario digno”, basa riba “dato solido” y consulta cu trahado y empresario. E plan di Aruba ta gradual, pero e no tin ni e dato ni e consulta.

Ken lo paga

Segun Gobierno mes, 18.262 trahado den sector priva ta gana Afl. 2.500 of menos. Na final di e tres fase, tur di nan lo gana menos cu e salario minimo nobo. Riba cada florin di aumento, empresario ta paga tambe 8 te 10% di contribucion social. Un calculacion conservativo ta pone e costo adicional, ora e aumento ta completo, na mas o menos Afl. 80 miyon pa aña, y esey ta prome cu e efecto domino: un trahado cu añanan di experiencia lo no acepta di gana casi mes cos cu un trahado nobo pa mesun trabao.

Un parti grandi di e trahadonan aki ta traha den restaurant, bar y hotel. Den e sectornan ey, salario basico no ta henter e entrada. Segun Aruba Tourism Authority, algun restaurant y bar ta carga mas o menos 15% di “service charge” riba e cuenta di grupo, cu ta wordo parti entre henter e personal, incluyendo cushina. Riba esey, bishitante ta duna tip. E comparacion cu e bestaansminimum ta wak solamente e salario basico. Sinembargo, otro trahado, den limpieza, comercio y construccion, casi no ta haya tip. Esey ta mustra precisamente e problema: e plan ta trata tur hende igual, mientras cu nan situacion no ta igual.

E pensionado ta paga, sin haya nada

Aruba tin 24.187 pensionado di AOV, mas cu e 18.262 trahado cu ta gana Afl. 2.500 of menos. Nan no ta gana ni un cen mas cu un salario minimo mas halto, pero ora prijs di cuminda, remedi y transporte subi, nan ta paga. Gobierno a subi e reparatietoeslag pa pensionado di Afl. 200 pa Afl. 600 den menos cu un aña. Si prijsnan subi atrobe, e presion pa subi e reparatietoeslag ey ta bin atrobe, y tur contribuyente lo paga p’e.

E trampa

Aruba ta importa casi tur cos. Ora costo di trabao subi mas o menos 10% cada aña, pa tres aña, prijsnan ta sigui. E bestaansminimum ta wordo calcula for di e prijsnan di producto basico, y cuminda so ta 42% di e presupuesto di un famia. Si salario mas halto pusha prijs di cuminda ariba, e bestaansminimum ta subi tambe, y e diferencia ta habri atrobe. E bestaansminimum no ta keda para: e meta di 2027 lo no ta e meta di 2029.

Un caminda miho: baha e costo di bida

Si Gobierno kier cera e diferencia, e caminda di mas directo ta pa baha e bestaansminimum mes. Pa un famia di cuater persona, tres gasto ta domina: cuminda (Afl. 2.385 pa luna), vivienda (Afl. 1.675) y transporte (Afl. 353). Gobierno tin herment concreto:

*Cuminsa cu e costonan cu Gobierno mes ta controla. Awa y coriente ta bin di companianan di Gobierno. Manera presidente di CUA, Frans Ponson ta bisa: Gobierno ta doño y tin monopolio riba e costonan aki, y e por cuminsa baha nan awo mes.

*Habri e mercado di internet. Pa un famia, un conexion basico di 100 Mbps ta mas cu suficiente. Den nos region, Starlink ta cobra XCG 71 pa luna pa esey; na Aruba, e plan di fiber mas barata di Setar ta Afl. 139. Esey ta Afl. 68 menos pa luna pa cada cas.

Den su calculacion di e bestaansminimum, CBS ta conta Afl. 179 pa luna pa comunicacion, incluyendo internet, pa un famia di cuater persona. CBS ta uza e clasificacion internacional COICOP di Nacionnan Uni, y den e clasificacion ey, comunicacion ta inclui acceso na internet. Spaar Afl. 68 ta casi 40% di esey, y ta baha e bestaansminimum directamente. Pero Setar ta 100% di Gobierno, y Gobierno ainda no a duna Starlink permiso pa opera na Aruba. (Mira tambe nos articulo “Aproba Starlink y baha e bestaansminimum”.)

*Kita e 7% di BBO, BAVP y BAZV riba cuminda basico. Actualmente tur cuminda ta paga 7% na frontera, y despues atrobe den e cadena di benta. Un famia cu ta gasta Afl. 1.000 pa luna na aros, lechi, webo, galiña, pan y azeta lo spaar mas o menos Afl. 70 pa luna.

*Pone derecho di importacion riba 0% pa productonan di bida diario. Pasta y berdura den bleki ta paga 6%. Habon, papel di baño y pamper ta paga 6%, y kotex y pamper di plastic te 12%.

*Amplia e lista di canasta basico. Departamento di Asunto Economico, Comercio y Industria (DEACI) ta fiha prijs maximo.

*Huurtoeslag pa hende cu ta huur na sector priva. Awo subsidio di huur ta existi solamente pa cas di Fundacion Cas pa Comunidad Arubano (FCCA). Na 2021, AVP mes a traha riba un “Huurtoeslagregeling” pa cas y apartamento priva. Awo AVP ta den Gobierno: introduci e regla ey.

*Transporte mas barata. Transporte di bus gratis of cu descuento pa famianan cu entrada abao, pensionado y studiante, y no subsidia gasolin pa tur hende.

E medidanan aki tin un costo pa Gobierno. Pero Gobierno a cera su presupuesto cu surplus na 2023 y 2024, y debe publico a baha di 116% pa menos cu 70% di Producto Interno Bruto (GDP). E tin e espacio pa paga un yudansa cla y dirigi.

Prome baha e costo, despues subi e salario

Ningun hende no ta contra un salario cu un famia por biba di dje. Pero e caminda pa yega aya ta cuminsa cu e gastonan cu Gobierno mes ta controla: e belasting riba cuminda, e prijs di awa, coriente y internet, y e costo di huur. Gobierno por baha esakinan mañan mes, sin cu ningun trahado perde su trabao y sin cu ningun pensionado paga e cuenta.