Pa Sue y Mike Faulkner, yuda Meals on Wheels recauda fondo ta un yamado hopi special; Evento festivo pa recauda fondo ta necesario pa yuda cu cuminda cayente pa esnan cu mas mester

E ta e periodo di recaudacion di fondo y pa e ultimo seis añanan, Meals on Wheels tin sosten di un pareha di turista Mericano, pa yuda cu e organisacion haya mas placa pa yuda famianan cu cuminda cayente. Y awor nan ta hincando nan energia pa un festival di cuminda, un subasta y un encuentro festivo na Club Caiquetio, Diasabra 7 di November, esta e ‘Food Extravaganza & Boutique Showcase.’

Mike y Sue Falkner ya pa decadanan ta pasa parti di nan bida na Aruba y nan compromiso cu e isla ta serio y contribui cu Meals on Wheels cu pa 58 aña ta brinda cuminda cayente, dos biaha pa siman na adultonan mayor y famianan cu no tin e espacio financiero pa brinda nan mes y nan yiunan un dieta saludabel. Pa mayoria di e añanan, e circuito di Iglesianan Metodista na Aruba, cu ta consisti di tres Iglesia, tabata subsidia Meals on Wheels entre otro door di colectanan durante e servicionan. “Nos a tende di e accion aki pa hopi tempo. Nos a cuminza bin Aruba 38 aña pasa y nos tabata activo den e Iglesia di e tempo ey.” Na 2019, e pareha a cumpra nan cas na Aruba y cu tempo a bira mas activo den Iglesia Methodista, dirigi pa Reverendo Greenaway. Nan a tende di e programa y a ofrece nan ayudo. Nan a sugeri na Reverendo Greenaway pa organisa un subasta pa recauda fondo, manera nan ta haci na Merca y a haya luz berde mesora. “Nos a tene e prome subasta na Graf van Zinzendorf (awor Colegio Xander Bogaerts), e siguiente aña na e auditorium di John Wesley cu no tabata suficiente grandi. Despues nos a bay Club Caiquetio cu tin suficiente espacio.”

E actividad a sigui crece pa motibo cu a logra negoshinan contribui y haya un comunidad mas grandi pa contribui na e recaudacion di fondo. Ademas, e pareha ta conta cu hopi sosten di miembronan di Casa del Mar Beach Club, cu ta hendenan cu mescos cu nan, a namora di Aruba y kier contribui cu e isla.

“Meals on Wheels a yuda hopi hende cu no por sali di nan cas, adultonan y famianan cu no tin acceso na cuminda,” Sue Falkner a bisa Bon Dia Aruba.

Sue mes a lanta for di chikito den un mundo cu mester yuda. Su mama a lant’e di chikito pa contribui na comunidad, pa esnan cu menos recurso. Entre otro como mucha tabata organisa actividad pa haci donacion na un organisacion di Nacionnan Uni, yama ‘Care.’ “Nos a kere e tempo ey cu 50 dollar tabata hopi. Pa nos como mucha e tabata hopi,” el a bisa na harimento. Su casa, Mike tambe a keda hopi influencia pa e spirito di contribui di e mayornan di Sue, “y el a bira hopi bon den acerca hende pa donacion. Nos tin nos cacho chikito ‘Sascha’ cu ta un cacho di servicio cu ta yuda hopi tambe. Cada biaha cu Mike ta acerca hende pa donacion, e ta hiba ‘Sascha’ cu ne y esey semper ta yuda,” Sue Falkner ta conta. Desde nan envolvimento a logra entre otro pa cumpra un van nobo y awor kier bay pa e di dos.

E forma con Meals on Wheels ta yega na esnan cu mas mester ta pa medio di servicio medico, esta dokternan y trahadonan social cu ta percura pa traha e lista di esnan cu necesidad di ayudo. Ta controla si ta trata di hende cu no ta ricibi ayudo di otro instancia. Ta entrega cuminda cayente dos biaha pa siman, riba Diamars y Diabierna, cushina e mesun dia. Te awe ta sirbi como 80 pa 100 persona cu cuminda cayente y tin un lista di persona cu ta wardando pa ayudo, for di San Nicolas te Pos Chikito. “E necesidad ta grandi, “ Sue Falkner a bisa Bon Dia Aruba. “Mayoria ta hendenan adulto grandi, cu no tin hende pa cushina nan cas pa nan.”

“Nos tin necesidad pa mas fondo y mas trahado pa duna nan tempo pa asina nos por cubri un area mas grandi. Nos ta den proceso tambe pa recauda fondo pa cumpra un van nobo, pa asina reparti e cumindanan,” Valerie Connor di Meals on Wheels a bisa. E cumindanan ta prepara den e cushina di e auditorium di John Wesley, cu ta propiedad di e circuito Methodista di Aruba. “E cumindanan ta suficiente cu por hasta parti nan pa dos dia,” Mike Falkner a mustra. Valerie Connor ta encarga cu e proceso aki tambe y ta sigura cu aki ta cuminda saludabel, bon balansa.”

Sue y Mike Falkner ademas di ta yuda den organisa e evento, tambe ta ofrece nan tempo y transporte pa pasa busca cualkier donacion cu comunidad por tin pa Meals on Wheels, pa asina facilita e trabou di e organisacion na interes di comunidad di Aruba.

E pareha Falkner ta contento cu negoshinan manera Superfood, Caribbeann Overseas (cu tur luna ta entrega galiña pa cushina) ta contribui. Pero los di e cuminda cu ta ricibi, mester di mas boluntario tambe pa percura cu e programa ta continua. “E no ta facil pa haya boluntario,” Falkner a admiti. “Nos mester di mas hende cu por cushina. Si nos por haya mas boluntario pa cushina, nos lo por brinda mas ayudo.” Los di e boluntarionan, tambe lo kier sosten pa mantene e vehiculonan, paga seguro y hasta gasolin, pa asina sigura cu tur esfuerso cu ta hinca den prepara e cumindanan, por resulta cu ta entrega nan na esnan cu mas mester.

E ‘Food Extravaganza & Boutique Showcase,’ ta di 4:30 pa 8:30 pm na Club Caiquetio, na Paradera, ta inclui no solamente subasta y benta di articulonan, pero tambe oportunidad di cumpra cuminda di 11 restaurant varia cu a duna nan cuminda pa benta, for di 5 florin te na 22 florin pa platonan mas elabora. Por haci donacion directo pa medio di e cuenta na Aruba Bank, 2019966. Tur entrada ta bay directamente pa yuda hende den necesidad haya nan cuminda cayente.