(AFP) – Candidato presidencial derechista, Flavio Bolsonaro, a sali for di Brazil y ta biahando pa Merca a pesar di un orden di corte cu ta prohibi su persona di sali for di e pais, media di Merca a reporta diamars.
E yiu homber di ex-lider Jair Bolsonaro a perde eleccion presidencial diadomingo contra Luiz Inacio Lula da Silva y a rechasa reconoce e derota.
E senador derechista a bisa dialuna cu hues di Corte Supremo a duna orden pa e entrega su paspoortnan. Bolsonaro ta bao investigacion pa supuesto corupcion y labamento di placa, y cu e perdida den eleccion aki tambe lo perde inmunidad parlamentario.
E homber di 45 aña tabata bayendo Florida, segun CNN a reporta, citando un fuente oficial anonimo. Otro media di Merca a confirma cu e ta dirigiendo su mes pa e pais.
US State Department a bisa diamars cu e lo duna visa na Bolsonaro y su famia, sin confirma su plannan di biahe.
Un fuente policial cercano a bisa AFP cu e senador su paspoortnan a ser cancela, agregando cu “no tin record formal di Flavio Bolsonaro saliendo for di e pais.”
Sinembargo e tin nacionalidad di Italia desde 2023, segun un documento Italiano di parlamento cu AFP a wak.
Manager di campaña di Bolsonaro Rogerio Marinho a expresa shock tocante e reportahenan cu e candidato derota a huy for di Brazil. “Te ainda nos no tin noticia tocante su paradero,” el a bisa reporteronan diamars na Brasilia. “Mi a ricibi un mensahe di dje awe mainta, unda el a bisa cu e lo laga un tempo pasa y despues e lo papia cu nos, y te ey,” Marinho a bisa.
“Esey ta e unico comunicacion cu nos a tin cu ne.”
Begonsoso
Lula a yama huy for di e pais un acto “bergonsoso.”
“Un persona cu ta sali for di nan pais mester tin algo pa sconde. E acto di sali for di Brazil ta bergonsoso,” el a remarca na Brasilia durante celebracion di su di 81 cumpleaños.
Bolsonaro a bisa dialuna cu e prohibicion riba su salida for di Brazil ta un tactica pa spant’e. “Mi nunca tabatin ningun intencion di sali for di e pais,” el a bisa den un video publica riba Instagram.
President Mericano Donald Trump, un aliado cercano di Jair Bolsonaro, a bisa dialuna cu eleccionnan na Brazil tabata “manipula” despues di e derota di Bolsonaro Junior.
Flavio su ruman homber Eduardo, un ex-legislador basa na Merca, ta mantene laso cercano cu Cas Blanco.
Siman pasa, el a bisa un podcast Mericano cu Flavio Bolsonaro mester sali for di Brazil den bista di un derota electoral, mirando e investigacionnan activo den su contra.
Den su declaracion dialuna, Lula su desafiador tambe a bisa cu e lo lidera e oposicion di e gobierno iskierdista.
Despues di Lula su victoria cu 51.8% di e voto, Bolsonaro a bisa cu e lo busca anula e resultado, citando e decision di extende oranan di votacion pa motibo di dificultadnan di transport cu a preveni cu algun ciudadano por a vota.
Lula a pidi e extension, di mesun manera cu Bolsonaro pa e mal tempo den cierto parti di e pais.
Siguendo paso di su tata
Tur apuesta tabara riba un victoria di Bolsonaro despues cu el a keda den posicion top den e prome ronda di eleccion anteriormente e luna aki.
El a campaña riba un promesa pa libera su tata, ken ta bao aresto domiciliario pa plania un golpi di estado despues di su propio derota electoral contra Lula na 2022.
