(AFP/NYPost) – Un Learjet a cay den un bario den sur di Florida, algun kilometer leu di resort di presidente Mericano, Donald Trump, diadomingo, matando tur persona abordo, oficialnan a bisa.
Varios clip no verifica riba rednan social mustrando e accidente mortal ta mustra un avion casi vertical ta dal na velocidad halto den suelo, creando un bala grandi di candela y lagando un crater cerca di un caminda druk.
“E accidente di avion di awe na Palm Beach County, Florida, ta un tragedia horibel,” minister di Transporte, Sean Duffy a bisa den un declaracion, confirmando cu tur nuebe persona den e avion a muri.
Duffy a bisa cu e avion, un Learjet 60, a sali di Austin, Texas y tabata bayendo Bahamas.
E accidente a sucede cerca di Cresthaven, un bario den Palm Beach County cu ta menos di 11 kilometerfor di cas di Trump, resort Mar-a-Lago.
“Obviamente esaki ta un accidente cataclismico di avion,” gobernador di Florida, Ron DeSantis a bisa reporteronan cerca di e escena. “Tabata parce un misil bayendo abao,” el a agrega, bisando cu o tabatin reportahe di niun hende riba tera resultando herida.
Trump tabata na Mar-a-Lago diadomingo, pero a sali bay for di e aeropuerto internacional nobo, recien yama President Donald J. Trump International Airport tiki despues di aborda Air Force One pa 11:55am, como un ora prome cu e accidente di e Learjet.
E avion a cay cerca di entrada di un parke di cas mobil, comisionado di Palm Beach County, Joel Flores a bisa, notando cu como 600 residente a keda evacua y reubica na shelter.
“FAA y Hunta Nacional di Seguridad di Transporte ta bay investiga” e accidente, Administracion Federal di Aviacion (FAA) a bisa den un declaracion.
A reporta tormenta den e area. Trump tabatin un paraplu mientras el a aborda Air Force One.
Den un grabacion di audio comparti riba e website liveatc.net, por scucha un persona den e cabina ta reporta “turbulencia modera” y bisando cu e tripulacion tabata “controlando e ijs.”
E persona a bisa cu e avion tabata “garando precipitacion” y tabatin mester “di subi”, tiki prome cu bisa “Mayday, mayday, nos ta descendiendo 10.000 pia pa minuut.”
Seconde despues, e persona a bisa cu nan tabata “declarando un emergencia” mientras e avion a cay 20.000 pia pa minuut. “Nos ta bay dal den suelo,” e persona a bisa, tiki prome cu comunicacion a corta.
Co-piloto di 20 aña di edad
E co-piloto cu a ser scucha ta pidi ayudo den e audio menciona a keda identifica como Nathalia Gadelha Filgueiras, un hoben di 20 aña di edad cu a ricibi su licencia di piloto mientras ainda e tabata den scol secundario.
Mama di Filgueiras, Camila, y su stiefvader a confirma pa The Post cu e tabata e co-piloto bulando e Learjet 60 for di Texas pa Bahamas.
E mama yen di dolor a bisa cu su yiu muher, kende lo a haci 21 aña na januari, tabatin nuebe luna ta traha como piloto comercial.
“Mi tabata kier pa e biba su soño, pero mi tabata sa cu su soño lo ta e cos cu lo kit’e fo’i mi,” Camila a bisa for di su cas na Palm Beach County. “Mi tabata sa cu un avion lo kit’e fo’i mi. Mi semper tabata sa, pero mi tabata asina orguyoso di dje. Mi sa cu e tabata bibando su soño.”
Esposo di Camila, Thiago Corteleti, 44, a bisa The Post cu Filgueiras tabatin 1.300 ora di experiencia di vuelo. El a manda mensahe di texto na su pareha, Justin, apenas 10 minuut prome cu e avion a crash, el a bisa. “El a bisa, ‘mi tin turbulencia, mi tin ijs,’” Corteleti a bisa.
E piloto jong, kende a lanta na Palm Beach County, anteriormente a sali den medionan local ora el a ricibi su licencia di piloto priva cu apenas 17 aña di edad na october 2023 – prome cu e tabatin su rijbewijs.
