Minister di Husticia, Integracion, Transporte Publico y Energia, mr. drs. Arthur Dowers, a duna inicio oficialmente na e prome reunion di Commissie Hondenproblematiek Aruba, cu tin como tarea principal pa desaroya proposicionnan concreto y solucionnan duradero pa atende e problematica di cachonan riba caya na Aruba.
Durante e reunion, Minister Dowers a presenta su vision y a enfatisa e necesidad di un enfoke integral y structural pa atende e situacion aki. Pa hopi aña caba, Aruba ta enfrenta un cantidad grandi di cachonan sin doño y cachonan cu tin doño, pero cu ta cana liber riba caya. E situacion aki ta crea preocupacion pa siguridad publico, bienestar di animalnan y trankilidad di nos comunidad. Entre e consecuencianan ta incidente di mordemento, situacionnan peligroso den trafico y otro inconveniencia pa ciudadanonan.
E comision ta consisti di representante di Directie Volksgezondheid (DVG), Korps Politie Aruba (KPA), Animal Welfare Aliance Aruba, Luna Foundation, Animal Care Clinic, Bureau City Inspector (BCI) y expertonan di cacho. Anke van Dijk di Bureau Minister di Husticia ta encarga cu presidencia di e comision, mientras cu mr. Rasheema Orie ta brinda sosten huridico y administrativo como assistent di e comision.
E composicion amplio di e comision ta permiti pa combina conocemento y experencia di diferente instancia gubernamental, organisacionnan dedica na bienestar di animalnan y expertonan den comportamento di cacho. E cooperacion aki ta esencial pa yega na solucionnan cu ta tene cuenta cu tanto siguridad di comunidad como bienestar di cacho.
E meta di e comision ta pa enfoca riba solucionnan duradero y sostenibel, cu no solamente ta atende e consecuencianan di e problematica, sino principalmente su causanan. E meta ta pa desaroya un enfoke structural cu por contribui na reduccion di e cantidad di cachonan riba caya y promove responsabilidad pa doñonan di e animalnan.
Cu e instalacion y prome reunion di e comision aki, Gobierno ta duna un paso importante pa atende un problematica cu durante hopi aña ta afecta nos comunidad. Minister Dowers ta enfatisa cu e situacion ta exigi accion coordina, responsabilidad comparti y solucionnan cu por tin un efecto duradero pa siguridad y bienestar di Aruba.
