Durante un conferencia di prensa teni dialuna 16 di november 2026, Parlamentario Endy Croes a vocifera e malcontento y preocupacion creciente cu ta reina den nos comunidad pa cu e maneho actual di Gobierno. Segun e Parlamentario, unda cu bo bira den tur skina di Aruba, bo ta topa cu un pueblo irita, decepciona y sin rumbo, cu ta buscando contesta cla riba kico realmente ta pasando cu nos Pais.
Croes a critica fuertemente e falta di gobernacion y liderazgo di parti di e gabinete actual, señalando cu e ta wordo percibi den pueblo como un gobierno di puro show. “Nos ta mira un gobierno cu tin Aruba stanca; un gobierno cu no ta goberna y cu no ta tuma decision. E percepcion den pueblo ta cu esaki ta un gobierno di puro show, mientras e problemanan real di nos comunidad ta keda sin atencion,” Parlamentario Croes a enfatisa.
Prioridadnan robes
Den su disertacion, Parlamentario Croes a cuestiona seriamente e prioridadnan di Prome Minister Mike Eman. Segun Croes, e mandatario ta pasa mas tempo na Hulanda cu na Aruba mes, lagando asuntonan urgente riba nos isla sin e atencion debido. El a remarca cu mientras comunidad ta warda riba solucionnan real, e trabou di e Prome Minister na Aruba ta parce limita na tareanan superficial manera piki sushi y verf cas, loke ta demostra un gobierno sin vision y sin un rumbo cla pa futuro di nos pais.
Falta di claridad pa 1 di januari 2027
Un otro punto di suma importancia cu Parlamentario Endy Croes a trece dilanti ta e falta di transparencia pa cu e transicion gubernamental na comienso di aña nobo. Segun e Parlamentario, falta apenas algun siman pa Prome Minister Mike Eman retira, pero te ainda no tin un plan concreto presenta ni pueblo a ricibi splicacion oficial riba con gobernacion lo continua entrante 1 di januari 2027.
Croes a enfatisa cu e silencio aki ta crea un incertidumbre innecesario na un momento crucial pa nos pais — caminda ya caba tin varios crisis y asuntonan delicado riba mesa, manera e situacion critico den cuido medico y na hospital, e discusionnan rond di HOFA, e retonan financiero y costo di bida halto y e tensionnan den e coalicion mes — lagando tanto Parlamento como comunidad den scuridad riba ken lo asumi e liderazgo di nos pais y kico lo ta e rumbo di Aruba na inicio di e aña nobo.
Pa finalisa, Parlamentario Endy Croes a haci un apelacion serio na gobierno pa asumi su responsabilidad, duna cuenta na Parlamento y brinda pueblo di Aruba e claridad, stabilidad y trankilidad necesario. Segun e Parlamentario, despues di tanto incertidumbre y falta di maneho, comunidad ta exigi transparencia y gobernacion real, cerando su mensahe cu: “Aruba merece miho!”



