Diahuebs marduga dos dama ta yega warda di polis na San Nicolas tur spanta.
Ey nan ta conta cu dos homber lo a caba di asalta nan. Segun e dama di inicial F, e y su amiga a baha di bus dilanti warda di polis. Di eynan ambos a cuminsa cana direccion Weg Seroe Preto/IsaacWagenmakerstraat.
Atura di e misa e dama F a sinti su tas wordo ranca masha duro mes, caminda e ta cay. F a sigi conta polis momento cu e ta ariba vloer un homber full na preto bisti y cu un petchi preto a bolbe ranca e tas pa di dos biaha, y e biaha ey si ela logra bay cu e tas.
F a sigi bisa polis cu tabata tin un otro homber mas, esaki tabata largo y delega. E tabata bisti completamente na blanco y su cabey tabata tin krul preto. E cabayero aki, pues e di dos tambe a ranca tas di su amiga y core bay ariba IsaacWagenmakerstraat direccion Imsan. E dama nan no a logra wak nan color di cuero. Den e tas di F tabata tin su cosnan personal manera telefoon di e marca BLU, un cartera preto cu placa aden, i.d , carnet di azv, carchi di Arubus, jabi cas y mucho mas.
Den careda di 3:05 polis a baha e dama nan na nan cas. Durante un control caminda e incidente a tuma luga nan ta haya e telefoon BLU. Polis a tene loke nan a haya pa asina continua cu e investigacion.
