Actualmente comunidad keto bay ta den shock, ta sinti rabia y gran parti ta cuestiona e siguridad riba Aruba. Bon Dia Aruba a haya confirmacion tambe di minister di Husticia cu e atraconan arma ta aumentando. Actualmente tin un conferencia di turismo y felicidad tumando luga y den comunidad ta cuestiona esaki mirando e preocupacion creciente pa siguridad na Aruba.
Na e conferencia di turismo Tico Croes a revela e cifra di e indice di felicidad di nos isla. E meta di e estudio ta pa investiga e conexion entre felicidad y turismo. E proceso di coleccion di informacion pa e encuesta a separa sexo, edad y luga (bario). E meta tabata pa encuesta 500 persona, sinembargo a encuesta 465.
Desde 2011 pa awo tin mas cu 2000 encuesta colecciona tocante e topico aki. 78% di e populacion ta considera nan mes como un persona feliz.
Bon Dia Aruba a puntra minister encarga cu Turismo Otmar Oduber despues si e ta pensa cu e topico di e conferencia ‘felicidad’ ta clash cu e sentimento pafo di e conferencia cu tin actualmente. “Mi ta kere cu e resultadonan cu nos a mira durante di e conferencia aki, nos mester ta satisfecho di dje. E ta un acumulacion di encuestanan haci na diferente ocasion cu ta mustra cu nos comunidad ta uno cu ta biba un bida satisfecho pa 78%. Esaki ta mustra cu e desaroyo y e forma cu nan ta biba tin nan cu un grado di felicidad hopi halto.
Mester keda promociona Aruba
No por bisa cu ta stop di promove Aruba y stop di haci eventonan cu ta atrae turista bin Aruba anto dedica e placa na siguridad, e ta continua di bisa. Pasobra haciendo esey bo ta bay economicamente atras y ta crea mas problema pa siguridad. Problema di siguridad hopi biaha ta bin di aspectonan social, sea di comunidad, di hobennan cu no a haya oportunidad segun circunstancia normal, pero tambe a base di problema social di otro pais. Hendenan cu ta bin akinan pa busca un miho bida y den esaki nan ta haya nan confronta ta haci cosnan cu nan no a desea di haci, segun e mandatario.
“Mi ta kere e dos cosnan mester wordo separa, Aruba no por hunga cu su turismo y ta depende pa casi 88 porciento di entrada bruto di turismo. Kiermen personanan cu ta purba trece esaki den discusion pa stop cu promocion di Aruba y hinca e placa den siguridad no ta compronde e materia, of no ta realisa e consecuencia mas negativo cu lo tin si mester haci esaki. Mi ta kere cu por combina nan dos.”
Mas placa pa siguridad
E ta encera un ‘partnership’ di e nacion den su totalidad pa por sigura e trankilidad cu semper a conoce na Aruba, sr. Oduber ta pensa. “No por cera wowo pe y a mira na diferente oportunidad pa dun’e atencion. Di parti turismo a papia hunto cu ATA riba posibilidadnan pa sigui sostene e aspecto di siguridad na Aruba. Ya caba ta haciendo esaki pa algun aña unda cu tres kwart miyon florin ta wordo poni disponibel pa polis. Banda di esaki Aruba Hotel & Security Foundation AH&SF siman pasa a acorda despues di e mocionnan cu a bin den parlamento un suma adicional 1 miyon florin. Den e dianan nos dilanti manera cu e conferencia caba lo sinta hunto cu ATA y lo yama Cuerpo Policial, AH&SF, y minister di Husticia, pa mustra cu kier sigui sostene e empeño cu ta wordo haci, e minister ta bisa tambe.
‘Hopi biaha a bisa y naturalmente locual a tuma luga nos no kier mira. Pero mas ainda e sector turismo kier mira hopi mas wordo inverti den prevencion. Na momento un sucedido tuma luga e tin impacto riba turismo. Mester evita na tur momento loke a tuma luga, e ta inaceptabel y como gobierno y comunidad nos no por bira sin gevoel pe y mester actua riba dje”, e mandatario ta termina.
