E barco Freewinds su personal ta bin realisando un campaña di informacion tocante di Covid-19. Pero tambe nan ta bin realisando un trabao pa desinfecta varios area publica di Aruba.

Sr. Ken Weber, kende ta capitan di puerto di e crucero cu tin Aruba como su home port, a informa na Bon Dia Aruba cu ya caba nan tin varios siman trahando hunto cu e cuerpo di brandweer di Aruba pa desinfecta cantidad di area publico.

El a laga sa cu pa realisa e trabao aki nan ta uza e miho desinfectante di mundo. Ta trata di e producto Decon 7. E desinfectante aki a wordo crea originalmente pa ehercito Mericano.

Divulgacion di informacion.
Igualmente mirando e proceso di flexibilidad cu ta tumando luga gradualmente, considerando cu e cantidad di casonan di COVID-19 a baha substancialmente yegando casi na cero. E flexibilidad aki di e restriccionnan cu a facilita e apertura di un cantidad di negoshi, no ta nifica cu nos a stop di combati e virus.

Nan ta haya cu e miho arma pa sigui combati e virus ta via di educacion pa medio di informacion efectivo. “Un gran campaña di prevencion ta bal mas cu un tonelada di cura,” segun Cap. Weber.

Pa duna e informacion aki e barco Freewinds a bin cu un serie di tres buki cu ta facil pa compronde. Nan ta: “Con pa mantene bo mes y otronan saludabel”, “Con pa proteha bo mes y otronan cu mask y handschoen” y “Con pa preveni plama e malesa pa medio di isolacion.” E bukinan ta obtenibel den tres idioma: Ingles, Spaño y Hulandes

Nan ta haya cu ta di vital importancia pa tin e informacion aki pa preveni daño di Covid-19 por ocasiona pa nos habitantenan y economia di Aruba. Boluntarionan di sciensologia di e barco Freewinds ta distribui e bukinan na supermercadonan, boticanan, pomp stacion y tiendanan y otro negoshi riba nos isla.

Durante nan campaña di informacion, esaki ta e comentarionan di comerciantenan estableci den caya principal. Sr. Benjamin Pick, di La Moderna kende despues di a ricibi un cantidad di e bukinan a comenta: “Mi ta kere cu esaki ta un idea hopi bon y mi lo parti esakinan pa tur mi cliente. Lo mi parti tur e bukinan. No ta problema. Esaki ta hopi positivo”

Igualmente Sr. Harsh Nathani di Sketchers a duna e siguiente declaracion: “E ta un proyecto hopi bon. Un bon iniciativa pa hende haya sa con pa proteha nan mes. Y mi ta kere cu mester educa nan mes y yuda otro pa sa con pa combati e virus aki. Hopi danki na Freewinds.”

E bukinan aki ta gratis y e ta accesibel na gran cantidad di tienda cerca di bo. Igualmente tur hende interesa por haya e buki, conhuntamente cu informacion adicional con pa mantene bo mes saludabel, riba internet na: www.scientology/prevention.