Ta clausura December 2015 colaborando cu e arte di cinematografía
Clausurando e aña, e medio digital di arte y entretenimiento, Aruba Luxury Living™ www.arubaluxuryliving.com, den collaboracion cu Bon Dia Aruba y Ladies Choice Aruba ta lansa portada pa December 2015 sosteniendo Aruba su arte, creatividad y talentonan local un biaha mas.
E tres instancianan aki ta sostene e portada di December pa cu e storia di un proyecto, 100% produci pa talentonan local. Ta trata aki di e arte di cinematografía cu lansamento di e pelicula, Siñami Stimabo.
Un pelicula scribi, produci y dirigi pa e dama Arubano, Marilyn Richardson. Cu e reto di un presupuesto hopi chikito un ekipo di ehecutivonan local, production local, grupo di actornan local hunto cu relacionista publiconan local a uni forsa – mayoria boluntariamente – pa pusha e vision di e director cu ta conta un storia cu ta refleha su propio bida.
Aruba Luxury Living™ ta pone un luz riba Aruba su talento y ehecutivonan local exhibiendo asina e parti artistico como tambe profesional di nos hendenan.
Cu un editorial mensual, e ultimo luna di aña aki, Aruba Luxury Living™ ta lansa su di 8 portada digital. Tur 8 portada hunto cu nan articulo correspondiente por wordo mira y lesa riba www.arubaluxuryliving.com.
