Ayera tardi Sindicato Simar a tene nan reunion extraordinario cu e veld di enseñansa caminda a dialoga ariba e recortenan financiero den e veld di eneseñansa. Bon Dia Aruba a ricibi informacion cu durante e reunion tabatin 15 sindicato reuni demostrando union y apoyo pa henter e sector di educacion. Bon dia Aruba a contact Sra. Josepine Albertus, presidente di Simar, pa comentario ariba e reunion pero no a logra haya respuesta prome cu ciiere di edicion.
Durante e conferencia di prensa e dia anterior Sra. Albertus, a enfatisa cu Simar no ta para tras di e anuncio recien cu Minister di Enseñansa, Sr. Endy Croes a haci durante su ultimo rueda prensa, caminda el a anuncia cu mester haci un recrote di 11 miyon florin den e preupuesto di enseñansa. Informacion ricibi ta indica cu hopi puntonan a bin dilanti durante e reunion y di e puntonan primordial ta e 12.6%. Trahadonan di e sector ta opina cu e 12.6% cu mester entrega ta consecuencia di mal maneho y nan ta puntra nan mes aworaki cu Fase ta stop, dikon nan mester sigui entrega un parti di nan salario. Despues di 6 luna gobierno di Aruba mester a splica unda e placa ta bay, (artikel 8), pero na ricibi informacion y e respuesta cu a wordo duna ta pa busca e infromacion ariba google.
“Bo no por propone nada pasobra ora cu bo pidi gobierno pa dunabo transparencia, pa dunabo claridad bo no ta haye. Si nan sinta cu nos y mustra nos en berdad con cos ta, e ora nos por bisa ban wak unda por. Pero bo no por hustifica un recorte den enseñansa. E 25 miyon florin cu nos a saca aña pasa y cu nos ta sacando ainda e aña aki a costa nos maestro, maestronan cu a bay”, Sra. Albertus a bisa durante e conferencia di prensa.
E scarsedad di maestro den e sector ta hopi preocupante, segun Sra. Albertus a informa durante e rueda di prensa, Simar a ricibi for di gobierno rapport di e personeel aantallen, den un averahe di 2018 pa 2021, 138 perona a sali for di e aparato gubernamental, esey a rapport ta mustra. Di e 138 ey 107 persona tabata di e veld di enseñansa y ariba esaki Simar tampoco no a ricibi ningun claridad di parti di gobierno.
Durante e reunion tambe a trece pa dilanti cu e circumstancianan no ta yuda e maestronan. E edad di pensioen ta keda subi, desde cu un docente drenta enseñansa e ta keda cu e mesun salario. Mientras cu ministernan si tin 25 consehero y no ta duna señal di economisa, e problemanan social ta keda subi y e trahadonan social ta keda baha, no tin placa pa ayudo extra y tur cos ta cay ariba e maestronan. Pues a maestronan a bisa ya no mas. Sra. Albertus a splica durante e rueda di prensa cu si tuma nota di solamente e region di Caribe, otro islanan manera Corsow, Boneiro, Sint Maarten, y hasta Hulanda, e maestronan ta haya un salario mas halto cu un docente cu ta traha na Aruba y nan ta para menos dilanti klas. E no ta ni motivante ni atractivo pa otro maestronan bin Aruba pasobra ora cu imagina futuro, Aruba no ta rendabel pa e maestro.
Mas informacion di e reunion ta indica cu sector di enseñansa ta pidi gobierno transparencia, pero no ta ricibi esaki y den nan bista gobierno a perde tur credibiliad. Vooral ora cu situacion ta asina precario y ariba social media miembronan di gobierno ta pone potretnan di biahenan y vakantie, corte di cabey, protretanan unda ta bishita scolnan y ta saca yen potret, pero na final no ta bin cu un solucion pa e situacion. Ainda no a traha ariba presupuesto pero si ta sigui biba luhoso. Simar ta lamenta, y ta rabia tambe, cu pa gobierno enseñansa no ta un prioridad.
“Un cos mi sa ta cu e no ta responsabel pa sigui corta den enseñansa na unda cu e veld ya caba tin 4 cuater aña cu nos como directiva ta grita cu no por mas, situacion ta precario y e aña aki bo ta corta mas pasobra bo ta cuminsando di januari pa november y riba dje bo ta bin bisa atrobe cu bo tin cu corta mas”, Sra. Albertus a indica durante e rueda di prensa.
El a indica tambe cu tin trabou inmenso pa bay haci y enbes cu gobierno bisa ya cu Fase no tey mas, e fondo cu ta wordo kita mester di dje y hinke back den enseñansa, ta bisa aworaki cu mester recorte y esey ta algo cu Simar no por para su tras. “Nos tin cu sali pa dilanti pa e veld pasobra pesey nos tey, pa para a nan derecho, y e derecho di e alumno y pa e derecho di comunidad pasobra si bo wak e maestro cu ta dunando enseñansa ta forma e futuro di mañan di Aruba”.
Si no haci nada pa veld di enseñansa, e situacion lo sigui empeora. E ta alarmante pa wak cu di e cantidad di personan cu a sali di e aparato gubernamental, mas cu 75% di e cantidad ey ta di enseñansa so. Gobierno tambe mester wak cu e situacion ta precario, Sra. Albertus a bisa, y no por sigui corta den enseñansa, no por hustifike y e no ta responsabel. Si no tin enseñansa di calidad, esaki por afecta e turismo den futuro.
Durant e rueda di prensa, Sra. Albertus a splica tambe cu na e prome reunion cu minister e topiconan cu abata precario pa Simar tabata e parti di e instructornan di landamento. Simar a bay serca minister cu diferente otro punto y tin diferente cos cu ta ariba nan lista. El a informa tambe cu Simar tabatin reunion cu Minister Croes e siman aki, pero el a wordo hala pa otro siman y aworaki cu e ultimo desaroyonan, Simar no ta bay keda warda cada biaha, ta yega momento cu veld tin cu bisa ta basta. Y durante e reunion, segun infromacion ricibi, e veld di enseñansa a bisa ta basta. E preocupacion ta grandi, tur cos ta bira mas caro y gobierno ta worry. Situacion lo empeora si no yega na un solucion pronto.
