Den ultimo siman te cu diaranson ultimo, 280 persona riba e seis isla Caribense den Reino Hulandes a ricibi un test positivo pa Covid-19, casi e mesun cantidad cu un siman prome. Esaki ta loke Instituto Nacional di Salubridad Publico y Medio Ambiente di Hulanda, RIVM, ta skirbi den su reporte semanal.
Aruba a reporta e mayor cantidad di infeccion nobo, cu 94 resultado positivo. A nota un aumento chikito den e cifranan semanal tanto na Aruba como Corsou.
Mientras cu riba Sint Maarten e cantidad di casonan ta bahando. E cifranan na Bonaire a registra un caida skerpi siman pasa, di 414 na 345 persona per 100mil habitante ricibiendo un test positivo. No a reporta ningun infeccion nobo na Saba
Siman pasa a reporta un infeccion nobo na St. Eustatius, cu ta trata di un pashent cu a test positivo na final di su periodo di cuarentena.
Ocho caso nobo
Mientras tanto, ayera Departamento di Salubridad Publico di Aruba, DVG a reporta cu 7 persona a recupera di e malesa, y ademas a registra ocho caso nobo di Covid-19 na Aruba, di cual dos no ta residente. E cifranan aki ta representa un tasa di positividad entre nos residentenan di dies porciento, dobel e recomendacion di Organisacion Mundial di Salud (WHO). WHO ta recomenda pa aumenta e cantidad di persona cu ta test na momento cu e tasa di positividad ta mas cu cinco porciento.
E cantidad di casonan activo di Covid-19 ayera tabata 169. E cantidad di fayecidonan ta 173.
Datonan di DVG ta ilustra casonan nobo di Covid-19, e malesa causa pa e virus SARS-CoV-2, cu un averahe semanal di 17 caso pa dia, y un averahe di tasa di positividad semanal di diesun porciento pa dia.
Igualmente, DVG a informa cu actualmente na Aruba tin dies persona interna pa ricibi tratamento pa Covid-19. Di esakinan, tres ta den Unidad di Cuido Intensivo, mientras siete ta riba piso general. Ademas na Colombia tin actualmente ocho pashent di Aruba den Unidad di Cuido Intensivo, y otro tres riba piso general.
