Recien a surgi e noticia cu a descubri un especie nobo di ‘praying mantis’ na Aruba. Reporta prome den medio noticiero Nature Today, e descubrimento a bin despues cu varios publicacion riba website iNaturalist a mustra un potret di un praying mantis cu ainda no a ser descubri pa cientificonan.

Aruba un “buraco den inventario” te awor

Den nos idioma Papiamento, nos no tin un palabra pa e “praying mantis”, kisas pasobra te awor no por a haci un clasificacion fisico. E insecto aki, nombra “praying mantis” den Ingles y “mantis religiosa” den Spaño, ta un insecto fini cu tin pianan largo, unda e dosnan dilanti ta posiciona manera e ta resando.

Prome cu e descubri aki, Aruba tabata considera un buraco den inventario di praying mantis den Caribe, segun experto Kris Anderson di Cornell University na Merca a declara den un rapport publica e aña aki. Esaki pasobra Aruba no tabatin ningun registro di praying mantis confirma y basa riba investigacion di specimen prome cu e investigacion aki. Den un estudio separa na 2025—conduci pa e mesun autor—tocante e especie Arubano a ser publica, pero esaki tabata basa riba potretnan di e especie y no riba observacionnan taxonomico di e insecto.

Riba 25 di november 2025, a conduci un expedicion di coleccion di e especie aki. Lidera pa Luc Willemse, y investigador y miembronan di Naturalisa, a colecta un par di e especie aki na Parke Arikok y a deposita e specimen aki den e museo di Biodiversity Center. E coleccion aki a marca e prome archivo fisico di e mantis registra na Aruba.

Notablemente, e team di expedicion a ripara cu e especie descubri na Aruba tabatin corespondencia cu e especie di praying mantis informalmente designa Brunneria cu descubri na Brasil. Tabata Willemse mes cu a invita Anderson pa describi e especie aki.

Clasificacion di e mantis no tabata facil

Segun Anderson ta conta den su rapport, e clasificacion di e especie nobo aki no tabata mesun facil cu loke a anticipa. De hecho, el a resulta den un reevaluacion completo di e henter e tipo.

E problema principal tabata, segun investigadornan, cu e sistema di identificacion tabata inconsistente pa e tipo Brunneria. Por ehempel, hopi caracteristica di e tipo tabata varia riba punto di bista, luz disponible ora ta haci observacion como tambe sexo di e specimen. Esaki a haci cu no por a confia e sistema pa duna un clasificacion exacto, pues investigadornan a realisa cu nan mester a reforma e marco.

Pa reconstrui e marco di clasificacion, cientificonan a tuma un acercamento enfocando riba analisis morfometrico, unda ta midi largura di torso, hala y proporcionnan entre segmentonan corporal, entre otro. E cientificonan tambe a conduci un analisis anatomico, unda e enfoca riba patronchinan cu ta distingui diferente especie y structura di antena. Cientificonan a ripara rapidamente cu nan por a distingui cada especie mas exacto usando e metodonan aki, cual a haci e sistema mas confiable.

Pa clasifica e especie di mantis haya na Aruba, a compara e specimennan colecta cu e marco recien reforma. Aki a compara e specimennan colecta cu otro especie haya den Latino America of esnan cu kisas a ser mal clasifica den pasado. Tambe a compara e specimennan aki cu otro specimen di e mesun tipo Brunneria.

Loke a descubri tabata remarcable: e specimennan Arubano a mustra varios caracteristicanan unico. Por ehempel, e specimennan aki tabata mas chikito compara cu otro specimen cu por ta famia. Tambe a descubri cu e proporcion di nan torso tabata distinto y a ripara cu nan tabatin un patronchi specifica den denticulo, cual ta pida cuero cu ta parce djente.

Loke a descubri tambe tabata cu e specimennan aki a adapta na e clima cayente di Aruba. Lo tabata pa e motibo aki cu Anderson a nombra e especie Brunneria Xerophila. Manera a splica den Nature Today su reportahe di e descubrimento, “xerophila” ta un palabra Griego y ta nifica “amante di seco”, referiendo kisas e clima di Aruba den cual ta parce e especie aki ta presenta.

Te awor, e especie nobo aki ta conoci na Aruba so. E especie Xerofila aki a mustra di por adapta pa un clima seco y cu menos yobida. Na mesun momento, e Brunneria Xerofila por core riesgo, esaki pasobra cientificonan ta considera e especie ecologicamente isola. Den otro palabra, e ta separa for di continente Americano pa via di lama cu ta mara nan na e isla. Te awor no tin un cifra di cuanto specimen di xerofila tin riba e isla, pero isolacion por resulta menos fluho di gene of por resulta cu e especie ta evoluciona den un manera unico. Isolacion tambe por resulta cu e especie ta bira endemico, specialmente si no tin esfuerso pa proteg’e.

E descubrimento aki a mustra cu aunke nos ta un isla chikito, tur dia nos por haya descubrimentonan nobo y siña mas di nos naturalesa. Tambe e ta mustra con hopi biodiversidad riba nos isla ta keda indocumenta.

Pero esaki ta unda Aruba Conservation Foundation ta hunga un rol importante. ACF hunto cu Naturalis Biodiversity Center ta colabora pa haci trabao den naturalesa, unda nan ta traha pa mapa e biodiversidad di Aruba mas miho. ACF, como organisacion legalmente asigna pa sigura proteccion di bestia riba e lista di bestianan protegi, ta carga e responsabilidad pa mantene e poblacion di e bestianan aki saludable—y claro hunto cu boluntarionan den comunidad.

Fuente y potretnan: Anderson, K. (2026): Two New Species of Brunneria Saussure, 1869 (Mantodea: Coptopterygidae) with Novel Diagnostic Characters and a Key to the Species. Soothsayer, Journal of Mantodea Research. 7 (1): 55-88.