image.jpeg

Desde diadomingo ultimo a inicia e “CEO’s & Finance Conference” di Caribbean Electric Utility Services Corporation (CARILEC) na Cayman Island. Ey tur CEO y CFO di e companianan di utilidad di e region Caribense ta topa pa discuti oportunidadnan, retonan, metodologia nobo y miho practicanan cu ta empordera participantenan pa sirbi nan pais miho. Pa Aruba ta presente e director di Utilities Aruba N.V., director di N.V. Elmar y director di W.E.B. Aruba N.V.

 

Tema di e conferencia e aña aki ta “Power. People. Partnership”, den cual a enfoca riba aspectonan di liderazgo, maneho financiero, leynan y reforma di maneho riba energia y sin lubida maneho di cambio. 

 

Mester bisa cu diamars a tuma luga e “Board Meeting” di CARILEC den cual a haci un apelacion riba Drs. Frank Hoevertsz, e director di Utilities Aruba N.V. pa e asumi un posicion como miembro di e hunta di directiva. Pa Aruba claro esaki ta un honor grandi, specialmente pa motibo cu ta considera e adelantonan di nos isla den e forma con ta procesa y distribui awa y coriente, pero tambe e vision “green” cu henter Caribe ta admirando di nos. 

 

Ta bon pa menciona cu durante e reunion anual a anuncia creacion di CAREC, cu ta para pa “Carilec Renewal Energy Community”, un comision lanta pa pusha desaroyonan di energia renobabel den henter Caribe. Claro cu eynan a elogia e adelantonan di Aruba y a haci un apelacion riba Drs. Frank Hoevertsz pa e encabesa e comision y comparti cu otro companianan di Caribe e miho practicanan y e logronan di Aruba den e cuadro aki.

 

A establece CARILEC desde aña 1989 cu 9 miembro como parti di un proyecto di modernisacion electrico, cu fondo di USAID y implementa dor di NRECA den un “Co-operative Agreement” pa 5 aña. Awendia CARILEC ta conta cu no menos di 92 miembro cu ta inclui 34 miembro completo cu ta companianan di coriente y 53 miembro asocia cu ta companianan envolvi den algun servicio di utilidad y 5 miembro afilia. 

 

E Hunta di Directiva ta conta cu no mas di 15 miembro, cu mester ta den funcion di CEO na e compania unda e ta traha. Ta eligi e miembronan durante e reunion anual pa un temporada di 3 aña. Secretariado di CARILEC ta situa na Saint Lucia.

Fuente: comunicado gobierno

LEAVE A REPLY

Please enter your comment!
Please enter your name here