Den e siman di dialuna pa diadomingo ultimo, e grupo di Polis cu ta carga e nomber di “Flex-Team” tabatin e tarea pa controla y patruya den tur area unda tin concentracion di hobennan considera como problematico. Nan a patruya specialmente den e casnan di pueblo na Sero Patrishi, Bushiri y Madiki. A atende cu tur formacion di grupo, a core cu e hobennan for di e area y manda nan cas. A haya poco droga tambe den nan poder, specialmente Marihuana.
E grupo special aki a topa tambe cu formacion di grupo di hende den otro areanan conoci, manera dilanti Manuelito’s Bar, Circle K y Hotel Bacarat, pa cual a atende cu nan cu man duro! Den hopi caso, ora Polis yega pa controla, mesora ta core tira nan droga abou na suela pa asina bisa despues cu no ta di nan e tabata. Asina a topa cu varios sakito cu contenido parecido na cocaina of marihuana.
Un otro area cu ta birando popular den oranan di anochi pa formacion di grupo ta Eagle Beach, unda ta consumi alcohol compaña cu musica zonando masha duro. Aki tambe, durante control, a topa cu droga y algun arma blanco. A core cu tur hende for di e area, locual nan no a gusta mucho.
E problematica di hobennan aglomerando na Palm Beach Plaza tambe a haya atencion y e hobennan cu siguridad di e mall a identifica como problematico a haya di tende y a core nan di e sitio. Den e proceso a topa cu poco marihuana tambe riba algun di nan. Mayoria tabata menor di edad.E mesun grupo aki a detene un total di 7 persona, di cual 6 tabata ilegal y nan a atende un atraco arma. Na Warda di Polis, despues di e controlnan, a acumula 2 cuchiu, varios sker, 6 procesado di marihuana, 4 sakito di cocaina, 4 saco di marihuana, varios sigaria di marihuana, un mea preto cu ta bisti riba cara, etc.
Polis ta adverti cu lo sigui controla den e dianan nos dilanti, den un esfuerso pa kita mas droga y arma for di riba caya.
Fuente cmunicado KPA
