A honra prome hende muhe parlamentario di e islanan

WILLEMSTAD – Diabierna ultimo riba peticion di e parlamentario Giselle McWilliam a honra e prome parlamentario femenino di Antia anterior, Angela Altagrasia ‘Tata’ de Lannoy den presencia di su famia y parlamentario.

Su potret a haya un luga di honor banda di otronan cu a hunga un papel grandi den democracia di Antia Hulandes anterior. E ta e prome hende muhe cu su potret ta na e muraya aki di parlamento di Corsou.

Habri caminda
Angela Altagrasia de Lannoy, (1913-1983), nace na Corsou, riba 4 di augustus a hurament’e den parlamento di Antia Hulandes. For di lantamento di Partido Nashonal di Pueblo e tabata activo den e departamento di hende muhe di e partido. El a habri caminda pa hende muhe tuma parti na gobierno.

Na 1977 Lucina Elena da Costa Gomez-Matheeuws a bira e prome minister femenino di Antia Hulandes. Despues lo a sigui cuater hende muhe mas. Da Costa Gomez-Matheeuws hasta tabata e di cinco prome minister muhe na mundo. Hulanda nunca no tabatin un prome minister femenino.

Espacio pa mehoracion
Nos por ta orguyoso di esaki, Mc William ta haya. Toch no ta un motibo pa no duna atencion mas na emancipacion di hende muhe segun e: “Bo ta ripara si den sector priva, cu tin hopi hende muhe den directiva y na cabes di organisacion importante. Hopi biaha mi ta mira cu den hopi comision cu ta lanta tin solamente hende homber. Nos mester percura pa esakinan tambe tin hende muhe den nan.”

Parlamentario Ana Maria Pauletta ta añadi: “Nos a coy hopi punto caba pa derecho di muhe. Ta importante pa envolvi e muhe den comunidad, pero specialmente pa ‘empower’ e muhe tambe. Nos mester enfoca riba esaki awor. Pa e hende muhe sinti su mes mas sigur den un posicion cu responsabilidad.”

Casi mita di ambtenaar ta hende muhe
3 di e 9 puestonan di minister na Corsou ta un hende muhe ta yen’e. Awor cu minister di Desaroyo Economico Steven Martina a baha y a pone Neysa Isenia dilanti pa tuma e funcion over, e relacion a bira 5 homber y 4 muhe. Bou di ambtenaarnan di gobierno di Corsou 1.614 miembro di personal ta muhe di e total di 3.325 .

Pauletta: “E cara di pobresa te ainda ta un muhe, mayoria di cliente di Desaroyo Social, Labor y Bienestar ( DSLB) ta muhe, hende muhe ainda ta haya nan hopi biaha cu violencia domestico. Tur esakinan ta punto di agenda y tema cu mester pone riba un plataforma mas halto y trata integralmente.”

Hende muhe Caribense den funcion cumbre

Na Aruba Evelyn Wever-Croes for di 2017 ta e prome minister di e pais. Sint Maarten tabata prome, mesora despues di 10-10-‘10 Sarah Wescott Williams a bira prome minister. Actualmente Leona Marlin-Romeo for di 2018 ta prome minister.

Cinco prome minister femenino tabata na mando di Antia Hulandes. Como di prome Lucina Elena da Costa Gomez-Matheeuws, na 1977 e tabata prome minister pa un temporada cortico. Maria Liberia – Peters di 1984 te 1986 y di 1988 te 1994 tabata prome minister. Despues a sigui (minister actual) Suzy Camelia – Römer na 1993 y 1998. Mirna Luisa-Godett a reemplasa su ruman homber Anthony Godett como prome minister na 2004 y e ultimo prome minister prome cu e renobacion estatal tabata Emily de Jongh-Elhage, di 2006 te ku 2010. Aruba for di 2008 tin e prome presidente femenino di Banco Central, alabes e prome di Reino tambe..

 

You May Also Like

Dominica sufriendo di dañonan grandi cu pasada di horcan Maria

Segun prome minister di Dominica Roosevelt Skerrit, e isla ta sufriendo di dañonan hopi ...

350 victima di traficacion rescata: Aruba tambe a yuda

Polis a rescata casi 350 victima di traficacion na 13 pais den e region ...

Kico ta y ken ta integra e milicia Bolivariano di Venezuela

Despues di varios yamada sin exito pa haci un formacion, e sargento cu ta ...

Mexico: 2017 a surpasa tur record anterior di asesinato

Na final di 2017, Mexico a suma 29.168 homicidio intencional, e cifra mas halto desde ...

Cuba: Cientos di Cubano a sali di Colombia den caravana caminda pa Merca

Despues cu nan a keda deteni pa casi dos siman na varios pueblo di ...