Home Editorial A perfect storm…

A perfect storm…

383

Den un glas di awa

Gran parti di e comunidad a keda sorprendi ayera cu e entrevista cu un funcionario di banco, unda e persona a duna un splicacion di e cambio cu a bin den e ley di BBO/BAVP y BAZV, cu tin consecuencia pa e banconan comercial. Kico ta e caso? Den pasado e ley di BBO a laga e fee riba transaccion bancario liber di BBO, tambe tempo cu e BAZV a bin na vigor.

Den e cambionan haci recientemente den e ley, cu a conduci tambe na e creacion di e impuesto nobo, cu prome tabata yama BPPS, pero den amienda di Staten a haya e nomber mas creativo, pero no necesariamente mas elegante di BAVP, a bin tambe, sin cu el a haya tanto atencion, e cambio unda di awor en adelante si ta bay cobra BBO, etc. riba e transaction fee. Pa tur claridad, cu e minister tambe a duna den su reaccion rapido ayera tardi, no ta trata di cobra 6% di e diferente impuestonan riba e suma di transaccion, sino e recompensa cu e banco ta cobra pa realisa e transaccion, e ‘fee’. Esey no por ta otro tampoco, pasobra si bo cobra 6% riba un suma di transaccion cu ta core anualmente den biyones, lo nos a mas cu resolve tur problema financiero cu gobierno tin. Ehemplo: 6% di 1.000.000.000 florin ta 60 miyon florin, casi igual na loke un porciento di BBO ta gara den henter economia anualmente.

Un poco trabao di calculacion lo a trece nos caba na e conclusion cu e cos ey no por ta. Ademas, si nos scucha e entrevista di e funcionario di banco bon, e no tabata papia di cobranza di BBO y otro impuesto similar riba e transaccion, sino tabata referi clara y corectamente na e ‘transaction fee’. Aparentemente mal entendedor tampoco mester di hopi palabra pa e confundi su mes. Por ta cu e confusion tabata grandi, pasobra e gobierno anterior en berdad si tabata kier a introduci un impuesto riba e suma total di e transaccionnan bancario, cu finalmente no a sigui, tambe pa e oposicion fuerte di tur banda, incluyendo un institucion manera Banco Central y tambe e banconan comercial, gremio y sindicato.

En todo caso, mirando e confusion cu e noticia a duna, e minister encarga cu financia a haya necesario pa calma e asunto di biaha, teniendo un rueda di prensa pa splica e asunto. Esey tabata mustra diligente, pa saca e rumor aki inmediatamente for di aire. E unico disonante tabata cu e funcionario di banco no tabata mester a haya tanto critica, pasobra e no a bisa nada incorecto. Y de paso esaki ta yama e pregunta, pakico e ministerio mes no a dedica algun esfuerso pa trece e aspectonan aki bao di atencion di publico mas tempran den e proceso?

Normalmente, ora mester introduci ley nobo, hasta sa reserva un cierto suma pa informacion na prensa y publico. Den e mundo digital di awendia ni esey no ta costa tanto. Unico cos cu un ministerio mester ta un asesor cu conocimento di trabao di informacion, cu ta saca tur e partinan di e ley cu mester clarifica pa publico, y ta hinca esaki den un of mas recado di prensa, punto. Tempo cu cada ministro tabata traha cu un staf reduci, nos por a pordona nan pa falta di capacidad di ehecucion, pero asina mes den cierto caso nan tabata logra pa haci esaki conhuntamente cu e departamentonan envolvi. Awendia cu cada minister tin un bateria di colaborado, lamentablemente nos no ta mira tanto mehoracion den esaki y esey no tin hustificacion.

Di otro banda, pa keda autocritico tambe, nos redaccion no a capta e detaye aki cu tabata describi cu suficiente detaye den e Memorie van Toelichting. Cerca nos si berdaderamente capacidad di ehecucion ta semper limita, mas e momento laat den e proceso cu e documentonan aki ta bin na disposicion di prensa. Ey tambe tin cos pa drecha.

Kico nos por siña di henter e asunto aki, cu a resulta un ‘tormenta den un glas di awa’? Prensa mester cuminsa haci un miho trabao di informa publico. Mientras, manera bisa anteriormente, e funcionario bancario no a bisa nada robes, e headline di e articulo tabata bisa: “Entrante 1 di juli banconan mester cobra clientenan 6% riba tur transaccion.” Nos no ta bay bisa cu a haci esaki a proposito, pasobra nos no por sa, pero e ta sugeri en berdad cu ta bay cobra 6% riba e suma di transaccion, loke no ta e caso, y no ta loke ta bisa den e entrevista. Den situacionnan asina, lo ta recomendabel pa prensa mantene su mes na duna informacion cu no ta solamente factualmente corecto, pero tambe completo. E idea ta toch, pa publico comprende? Of tin otro meta den e asunto aki?

Di otro banda, henter e ‘core core’ aki lo tabata innecesario, si den e periodo prome cu e ley a pasa den parlamento, a duna informacion completo y detaya, evitando asina cu prensa ta duna su propio interpretacion na un cierto asunto. Nos no ta bisa cu gobierno no ta desea di haci un bon trabao informativo, pero e tormenta aki tabata innecesario.