Home Deporte Gasto di personal y coriente ta stroba mantencion di facilidadnan deportivo

Gasto di personal y coriente ta stroba mantencion di facilidadnan deportivo

167

Segun un rapport cu a drenta circulacion den pueblo, gastonan halto di personal y coriente ta practicamente impedi Fundacion Facilidadnan Deportivo (FFD) pa haci mantencion adecua na facilidadnan deportivo. Pa aña 2018, gobierno ta subsidia 2,95 miyon florin. Adicional di esaki, e fundacion tin proyecta pa ricibi mas o menos 416 mil florin na huur di espacio y facilidad.

Segun e rapport (traha pa un compania renombra den mundo di accounting) ta indica, setenta y shete porciento (77%) di e suma cu gobierno ta subsidia, ta bay na paga gasto di payroll (personal). Esaki ta traduci su mes na un suma di poco mas cu 2,2 miyon florin. Un otro 10% (272 mil florin) ta bay na paga gastonan di coriente. Cu un entrada total di 3,36 miyon florin y kitando tur gasto, ta keda 433 mil florin pa mantene y repara tur facilidad deportivo na Aruba.

E rapport ta indica cu normalmente Fundacion Lotto pa Deporte tambe ta aporta na FFD pero tumando na cuenta cu Lotto pa Deporte a paga un debe atras cu FFD tabata tin cu AIB na un balor di 6,16 miyon florin, Lotto pa Deporte no lo aporta durante 2018 na FFD.

Durante e siman cu a pasa, a drenta e noticia cu e organisacion CONCACAF a keur af e facilidadnan deportivo di Aruba. Esaki minister encarga cu deporte Dangui Oduber (MEP) ta categorisa manera ‘un berguensa nacional’ y ta splica Bon Dia Aruba cu mester bin claridad di kico ta pasando cu deporte na Aruba.

E minister ta sigui splica cu mester bay sinta hunto cu e fundacion pa bin claridad ta dicon e gastonan di personal ta asina halto y pa wak si ‘di berdad e ta hustifica’. E mandatario ta bisa cu deporte no ta algo pa haci chansa cu ne. “E ta un parti esencial di nos comunidad su desaroyo, tanto di salud como e formacion di futuro generacion. E no ta djis un tema di wak e como algo pret y sigur tur atencion debido mester wordo duna na dje.” E minister ta finalisa bisando na Bon Dia Aruba cu e ‘ta spera cu esaki no ta un un Lotto gate number 2’.