Vocero di AZV, Solange Tchong a laga sa cu conseho di specialista di AZV ta evaluando e caso di Sr. Albertico Valdes, kende a haci un solicitud pa sigui su tratamento di salud na Colombia.

Sra. Tchong a abstene di bay den detaye riba e caso aki pa respet na privacidad y derecho di e pashent. Pero si el a laga sa cu pronto nan lo duna un contesta riba Sr. Valdes su peticion cu nan ta considera uno compleho cu ta tuma su tempo.

“Nos tin tur atencion na su caso y como AZV nos ta haciendo lo mas posibel pa por yud’e atrobe denter di e ley di AZV,” Sra. Tchong a declara. Pues denter di loke e seguro medico general aki por cubri p’e, el a agrega.

El a bisa cu e caso di e pashent aki ta uno cu nan ta conoce na aña 2018, caminda e tempo aya, pa prome biaha Sr. Valdes a bay prensa y tambe a expone su diferencia di opinion pa loke ta su condicion medico. E tempo aya un evaluacion a tuma luga cu a resulta na su fabor pa medio di e comision di expertonan medico (CGZ) cu a dicidi pa laga Sr. Valdes bay Colombia pa e haya tratamento.

El a bisa cu e ley di AZV ta stipula cu mester tin cierto criterionan na cual un pashent ta cumpli medicamente, y esaki ta wordo controla pa medio di CGZ. Nan ta e comision cu ta evalua tur peticion cu ta drenta na AZV pa saca pashent pa haya tratamento afo.

Situacion actual

E situacion actual di Sr. Valdes ta cu e mes a manda un peticion pa AZV. Normalmente e proceso aki ta bay via un specialista cu den bo nomber ta haci e peticion cerca AZV; y despues CGZ ta esun cu ta evalua finalmente e caso. AZV por compronde di Sr. Valdes cu tin diferencia di opinion ariba su caso. Den esey a resulta cu for di dia 27 di october ultimo, AZV a ricibi un peticion di Sr. Valdes.

Sra. Tchong a reconoce cu en berdad nan tin algun simannan cu nan comision ta evaluando su caso pa medio di e mesun comision CGZ. Esaki ta e parti cu Sr. Valdes a indica cu e ta pendiente di e parti aki pa bin cu un reaccion.

Independiente cu sr. Valdes a wordo manda Colombia dos aña pasa, cada peticion cu ta drenta na AZV ta wordo evalua di nobo. No ta un argumento -segun vocero di AZV- pasobra e pashent a yega sali afo pa haya tratamento medico, esey no ta un motibo pa bisa cu AZV ta mand’e un biaha mas.

Nan ta wak cada biaha e condicion fisico, salud y situacion den cual e malesa ta. Vooral den e parti di oncologia caminda nan tin diferente grado di e malesa cu e comision medico ta evalua. Tampoco nan no ta evalua solamente e malesa mes, sino cu nan ta evalua si tin otro complicacion of otro condicionnan.

Evaluacion

E caso aki no ta uno facil, ya cu e ta un caso basta complica medicamente. Esaki ta haci cu e evaluacion aki a tuma un par di siman extra prome cu por cay un decision di parti di AZV.

E no a bay mucho den detaye riba e caso aki ya cu tur nan personal, incluyendo nan comision di evaluacion, ta mara na e secresia medico. Tampoco e no ta haya prudente di parti di AZV di bay discuti decision medico den publico. E comision ta consisti di 4 pa 5 experto, caminda hunto nan ta bay tuma e decision. El a agrega cu basa riba cada opinion, nan mester yega na un resultado colectivo na bienestar di e pashent cu ta bay bira e decision cu lo wordo notifica na Sr. Valdes.

E caso di Sr. Valdes no ta un excepcion. Regularmente prensa ta trece den publicidad casonan cu e mesun asegurado ta trece dilanti treciendo nan malcontento riba cierto servicio of atencion cu nan ta spera for di AZV. Sra. Tchong a bisa cu e tipo di casonan aki ta mantene nan skerpi pa futuro. El a declara cu ta intencion di AZV di resolve e tipo di caso aki di un manera of otro, pero e no ta facil.

El a bisa cu AZV ta tene cuenta cu e situacion aki y nan ta evalua esaki. E hecho cu nos ta un isla chikito nos tin cierto limitacion, entre nan nos sector medico. Pero di otro banda tin e mesun ley di AZV, caminda a pesar cu nan ta di acuerdo of no cune, nan ta keda mara riba loke e mesun ley ta prescribi. Y esaki ta algo cu semper nan ta purba di splica na e aseguradonan.

El a trece dilanti cu ta un hecho cu tin cierto tratamento cu no ta cay den e pakete. Un di nan ta relaciona cu transplante di organo cu no ta den e pakete mes cu excepcion di e cornea y transplante di riñon. Esaki ta trece cune -segun e vocero di AZV- cu cierto peticionnan mester wordo nenga a base di loke e mesun pakete ta contene.

Tin casonan cu AZV mester haci un excepcion te ora cu nan por yega na un solucion mas structural. Pero el a laga sa cu nan ta casonan hopi excepcional, mayoria di nan ta 2 pa 3 caso pa aña, unda AZV ta haya su mes pa bin cu un decision excepcional.

 

 

 

 

LEAVE A REPLY

Please enter your comment!
Please enter your name here