Diaranson disturbio cu kimamento di auto y daño material a sacudi Corsou durante un accion di protesta di e trahadonan di refineria Isla y tambe di Selikor, riba entrega di 12.5% di salario.

Corsou ta bibando cierto situacion semehante na esun di nos actualmente. E situacionnan cu a bira pio cu e crisis di coronavirus, y tambe e presion di Hulanda pa bin cu cortamento di gasto y reforma pa facilita ayudo financiero. E sosten financiero aki ta condiciona. Actualmente decision a cay cu mita di locual ta e pago di vakantie ta esun cu ta wordo paga pa empleadonan publico, locual ta trece su presion cune.

E clima actual manera esun di Corsou cu lo por start pa algo similar na Aruba, ta un preocupacion cu gobierno. E hecho tin di haci cu ainda nos no a sali di e crisis cu nos ta, asina minister di Finanzas y Asunto Economico, Xiomara Maduro a declara na Bon Dia Aruba. E no ta un crisis di salubridad so, pero tambe di likides. Den nos caso nos ta hayando sosten financiero di Hulanda pa atende cu e problema di likides. Pero tambe pa gobierno por cumpli cu e programa di subsidio di salario pa empresanan y percura asina pa entrada di e trahadonan.

Mescos cu Corsou, Aruba tambe tin problemanan y presion cu a conduci cu trahadonan a yega di subi caya cu tur e consecuencianan cu tin. Minister Ruiz-Maduro a bisa cu na Aruba gobierno ta purba di evita e tipo di accion aki mas cu ta posibel. “Dios no laga cu cos aki tin cu pasa na Aruba, pasobra bo ta kibra bo luga,”el a declara.

E sa cu no tur hende ta contento. Pero e ta argumenta cu gobierno ta trahando constantemente pa percura cu nos pais por cumpli cu nan obligacionnan financiero. Esaki ta trece cune –segun e mandatario– cu nan mester tuma decisionnan cu ta necesario pa pais Aruba. Pasobra si no ta wordo tuma no tin pa mañan.

Nan no ta contra hasta cu e hendenan tin cu manifesta, pasobra e ta un derecho. Pero si mester compronde e situacion dificil cu nos ta aden. Sinembargo e hecho cu cos ta bay dificil, no mester pensa cu pa medio di rabia nos por soluciona e situacion aki. E mandatario a agrega cu sigur mester tin comprension pa e situacion y purba di ta hopi transparente den e decisionnan cu ta wordo tuma.

 

Nan ta purba di tur manera pa por yega na e fondonan necesario pa atende cu nan obligacion. E mandatario a declara cu logicamente, gobierno no kier pa na Aruba bini e tipo di disturbio aki. E ta haya cu den e situacion aki duna cara ta algo hopi importante.

P’esey el a dicidi ayera di duna un splicacion cu cifranan na e trahadonan di Serlimar cu a bay den accion ayera. E no ta desconoce cu den tur e situacion financiero y presion cu gobierno ta pasando aden, tin influencia politico tambe, mientras cu no mester tin espacio pa esey.