Fuentenan ta indica cu tin plannan pa cuminsa opera e incinerator na Parkietenbos entrante prome siman di juli, pero te ainda no a entrega oficialmente un peticion pa un hindervergunning, cual riba su mes por tarda par di luna.

Bon Dia a confirma cu Directie Wetgeving en Juridische Zaken (DWJZ) cu ainda Serlimar den e caso aki no a aplica pa e hindervergunning cu ta necesario pa opera e incinerator. DWJZ si ta na altura cu ta pendiente pa ricibi e papelnan di e Sui Generis, pero te na momento cu a skirbi e articulo aki no a haci e peticion, cual por tuma par di luna — hopi biaha 3 — si no laga niun papel afo ora haci e peticion.

Sinembargo nos redaccion a compronde cu tin plannan pa cuminsa opera e incinerator ya caba for di prome siman di juli, pues e ora si esaki ta corecto lo ta optando pa opera e incinerator ilegalmente, algo cu DWJZ tambe a indica na nos cu no tin mag. Den cierto casonan, por ehempel ora ta trata di permiso pa restaurant, un negoshi por opera si haci take-out mientras no tin e restaurantvergunning, of si no bende alcohol mientras no tin e permiso necesario pa haci esaki. Pero ora ta trata di hinder (molester) esaki ta algo completamente otro y pa e rason ey no por opera te cu haya e firma di minister di husticia pa opera, segun nos fuentenan na DWJZ.

E unico otro manera cu lo por bay opera e incinerator na Parkietenbos sin un hindervergunning emiti pa minister di husticia ta si pasa un Landsbesluit h.a.m., segun e Hinderverordening.

‘Incinerator no ta cumpli cu normanan di siguridad y no por ta cerca di aeropuerto’

E ciudadano habitante di e area di Parkietenbos cu ta entamando un caso contra gobierno, Anouk Balentina, ainda no a haya cita pa nan trata su caso sumario (kort geding), maske e ta wardando desde februari. Balentina ta indica cu e incinerator no lo por ta situa na Parkietenbos pasobra esaki ta demasiado cerca di aeropuerto, y e ta haya cu AAA NV tambe tin un rol den percura cu no pone esaki opera den un radius di 13 kilometer di aeropuerto manera cu OACI ta indica (Organisacion di Aviacion Civil Internacional).

Ademas, Balentina ta señala cu hasta Dienst Technische Inspecties (DTI) a stipula cu e incinerator mester tin sprinklers (sproeiers) na unda opera esaki pa preveni e menasa di un explosion, en caso cu tin chispanan den e area rond di unda ta pone e incinerator.

E ciudadano ta haya cuestionabel tambe cu no ta dicidi di kima riba tereno di refineria, manera cu e Final Report Integrated Solid Waste Management Aruba ta indica.