Cantidad di personal di Gobierno a baha den 10 aña, pero e costonan si a subi. Y tin diferente factor cu a contribui na esaki y e obhetivo di e Plan di Maneho di Reduccion di Gasto di Personal ta pa aplica instrumentonan pa yega na un reduccion di gasto structural.

E plan aki tabata traha pa Departamento pa Recurso Humano DRH, hunto cu representantenan di Ministerio pa Asuntonan General, Integridad, Cuido di Gobierno, Innovacion y Energia, ademas di representantenan di Ministerio pa Asuntonan Economico, Finanzas y Cultura. E tarea tabata pa pone riba mapa e gasto di personal, haci esaki visibel pa asina yega na su maneho y yuda reduci e peso financiero na forma structural.

Accion21 a puntra pa e plan

E plan aki ta di comienzo di 2018, pero ta awor numa a keda publica despues cu lider di fraccion di Accion21, Sr. Miguel Mansur a pidi e documento y a mand’e pa Parlamento.

E plan strategico di maneho integral ta contene 30 instrumento cu mester contribui na control y reduccion di gasto di personal y tabata pa e periodo di 2018 pa 2021. E tabata traha prome cu e pandemia y e crisis financiero cu e pandemia a trece cune. Tampoco tin den dje e reduccion di 12.6 porciento cu Gobierno a impone basa riba condicionnan di Hulanda pa por a haya sosten di likides.

Meta di e plan tabata pa yega na reduccion directo di gasto di personal. DRH lo mester a sigui cu concretisacion y cuantificacion di otro instrument cu efecto pa baha e gastonan a termino medio y largo.

E intencion di e plan tabata pa traha conhuntamente cu tur actor pa maneha e gasto di personal te ora yega e nivel optimo, cu ta un relacion eficiente di e grandura di aparato publico, e costonan mara na dje y e servicio na publico.

E obhetivo tabata pa tur aña baha e gasto di personal cu tres miyon pa por a kibra cu e tendencia historico di aumento di gasto, pa asina e costonan ta hustifica e calidad y e grandura di e aparato.

Cantidad di empleado a baha, gasto a subi

Na Mei 2018, Pais Aruba tabatin 5011 empleado directo. Entre grupo aki tin 1052 docente cu ta cay bao Direccion Scolnan Publico, DPS. E docentenan di DPS ta forma 21 porciento di tur e empleadonan publico y ta exclui di e proceso pa baha cantidad di empleado mirando cu tin falta di suficiente docente.

Excluyendo e docentenan, e analisis a saca afo cu tin un aumento di 10 miyon florin di gasto tur aña pa personal di Gobierno. Compara cu 2009, e gastonan a subi cu 22.9 porciento den 10 aña, cu ta un aumento di 90 miyon florin. E momento mas halto di aumento di gasto tabata na 2013, durante cual aña a registra un aumento di gasto di personal di 108 miyon compara cu 2009.

E cantidad real di personal sinembargo a baha compara cu 2009, atrobe cu excepcion di 2012 y 2013. E tendencia den e 10 añanan tabata di reduccion di personal di 5099 te 5011 na 2018. Pero asina mes e costonan si a sigui subi.

Gobierno como dunado di trabao

Den e componente ‘costo di personal’ tin dos factor cu ta hunga un rol den aumento di gasto. Di un banda tin e salarionan, ‘toelagen,’ y pago di overtime. Pero tambe tin e otro factor di contribucion di Gobierno como dunado di trabao na fondonan social.

Na 2014 a mitiga e gastonan pa Gobierno pa loke ta e contribucion pa Fondo di Pensioen General di Aruba, APFA, pero di otro banda e pago di dunado di trabao pa e fondo di AOV/AWW y AZV a conoce aumento.

Riba dje tin e crecemento automatico di costo di salario y otro gasto relata na salario, pa motibo di e asina yama periodieken y promocion, ademas di e compensacion pa pago di aumento di costo di bida cu ta sosode pa medio di primanan cu ta paga na comienzo y fin di aña ( bashi premie y bonus), ademas di e asina yama ‘reparatie toeslag.’

A identifica un total di siete instrumento di maneho di costo. Nan ta limitacion pa tuma hende den servicio; keda sin renoba contract laboral; elimina e automatismo pa aumento di salario pa medio di periodiek y promocion; rebaha overtime; uso di areglo di VUT; keda sin reemplasa tur hende cu ta bay cu pensioen; y reduccion pa medio di personanan cu ta sali di servicio pa otro motibo.

Reforma personal publico

A calcula cu e medidanan aki lo a produci un reduccion di 12.2 miyon florin na 2018, otro 11.7 miyon na 2019, 9.9 miyon na 2020 y 14.8 miyon florin na 2021. Manera a bisa caba, na 2020 Gobierno a corta 12.6 porciento den salario y toelage di tur empleado publico como parti di e condicionnan pa por a haya sosten di likides di Hulanda.

Bon Dia Aruba lo sigui amplia riba e Plan di Maneho di Reduccion di Gasto di Personal den proximo edicionnan, mirando cu a pesar cu circunstancianan a cambia, no ta conoci si a logra implementa tur e instrumentonan cu a propone. Ademas tin e condicionnan di e agenda di ehecucion cu ta parti di e landspakket pa Aruba unda ta bay hopi profundo riba kico kier logra cu aparato gubernamental y e reformanan cu e ta trece cune. Reformanan cu Gobierno a bay de acuerdo cune cu ta encera revision di e structura di salario, revision di produccion di empleadonan publico y mehoracion di servicio pa medio di digitalisacion.

Bon Dia Aruba tambe a tuma contacto cu Sr. Mansur riba su opinion di e plan presenta aki, kende a bisa cu e ta analisando esaki y lo duna su observacion den curso di awe.

 

LEAVE A REPLY

Please enter your comment!
Please enter your name here