(CuraçaoChronicle) – Curaçao Refinery Utilities (CRU) lo cera su porta permanentemente pa fin di september. Tur empleado permanente a ricibi oferta di un schema di redundancia. Pa empleadonan cu no ta di acuerdo cu esaki, a solicita un permiso di retiro via ministerio di Desaroyo Social, Labor y Bienester (SOAW).

Esaki a keda comunica na personal di CRU diaranson ultimo via un memo interno firma pa Marcelino de Lannoy, director di Refineria di Corsou (RdK). CRU ta un subsidiario di e propiedad di gobienro RdK, cu ta doño di instalacion y propiedadnan di refineria. E speransa ta ainda cu lo haya un operador nobo prome cu fin di september cu lo ofrece e empleadonan un trabao. Pero e cortina a baha irevocablemente pa CRU.

Den evento cu no yega na un acuerdo cu CORC (Curaçao Oil Refinery Complex), ‘RdK lo continua tuma su responsabilidad y busca otro operador’. “Pero esey no ta altera e hecho cu CRU lo cera su porta for di dia 30 di september 2021”, De Lannoy a skirbi den e memo pa e personal di CRU.

Den gasto di personal so, lo spaar alrededor di 3.3 miyon florind pa luna. Di e mas di 900 empleado di Isla cu CRU a tuma over pa fin di 2019, alrededor di 540 ainda ta riba payroll. E memo interno ta mustra cu empleadonan cu bay di acuerdo pa termina nan acuerdo laboral riba dia 30 di september lo ricibi dos luna di salario adicional, incluyendo cesantia como compensacion. Pero esnan cu no firma e contract pa dia 28 di juli lo ricibi ‘solamente loke ley ta prescribi y esey ta un maximo di dos siman di salario’. Pa e grupo aki, CRU lo aplica pa un permiso di retiro di ministerio SOAW.

Den un comunicado di prensa, CRU ta enfatisa cu no tabatin otro opcion sino stop e actividadnan di e compania. E subsidiario di RdK ta operando profundamente den cora pa mas cu diesocho luna. No ta responsabel mas pa financia e perdidanan enorme, loke ta den violacion di regla- y leynan existente. Ademas, ainda ‘no tin prospecto di un operador tumando over e personal’. Den otro palabra, ‘CRU mester stop operacion pasobra no tin entrada pa cubri e gastonan’.

RdK ta bisa cu ta haciendo tur lo posibel pa logra firma un acuerdo cu e compania priva local CORC prome cu fin di september. Pero tanto e memo interno como e comunicado di prensa ta laga cla cu e negociacionnan no ta bayendo bon.

“E transferencia di e refineria y e terminal petrolero ta suheto na cierto condicionnan, cu cual CORC no a cumpli ainda.” Esaki ta nifica por ehempel cu no por demostra cu tin suficiente fondo pa start up e refineria.

De Lannoy a splica cu CORC no ta doño di ningun placa ni petroleo y ta depende riba aliadonan pa esaki. “Esey ta e problema. Ademas, un permiso ambiental y otro permisonan mester wordo otorga. Tur cos ainda no ta completo.”

Warda sin fin te cu tur cos ta na ordo no ta un opcion. De Lannoy: “Di tur e partido y entidadnan involucra, RdK ta e unico cu mester sangra. Nos ta paga miyones tur luna pa mantene e instalacionnan y personal. CORC no ta cumpli cu condicionnan, pero no ta costa nan nada.”

Mientras tanto, banda di CORC ta perturbantemente silencioso. Ambos director, Javier Hernandez y Manoel ‘Lito’ De Silva De Freitas, ta silencioso pa varios luna. CORC BV a keda estableci specialmente na september 2020 pa operacion di e refineria na Corsou y, segun e registro comercial na Camara di Comercio, su obhetivo comercial ta ‘refinacion di petroleo, compania di trading, transshipment, loading y unloading’.

LEAVE A REPLY

Please enter your comment!
Please enter your name here