Cu un sala di parlamento casi bashi, asina a wordo trata y aproba presupuesto 2020. Algun parlamentarionan a abstene di bay sesion di tratamento di e presupuesto aki, debi cu nan a bay exterior recientemente y nan ta den cuarentena actualmente.

E presupuesto trata ayera a cambia substancialmente den e nota di cambio cu gobierno a introduci pa atende cu e situacion di emergencia nacional debi na e presencia di e coronavirus na Aruba.

For di inicio principal fraccion di oposicion AVP a bisa cu lo sostene gobierno cu aprobacion di su presupuesto. Y a pesar cu e debatenan no tabata esun custumbra ora di trata presupuesto di pais Aruba, toch a surgi algun discrepancia. Particularmente ora cu den su punto di ordo, parlamentario independiente, Daphne R.Y. Lejuez a pidi e documentacion di nota di cambio di e presupuesto pa por studi’e un rato prome cu nan ta bay na e preguntanan. Esaki debi cu presupuesto 2020 cu inicialmente nan a ricibi, a resulta totalmente cambia cu 1.3 biyon florin pa atende cu e crisis di Covid-19. Presidente di parlamento, Juan “Ady” Thijsen a reacciona energicamente bisando cu “aworaki no tin tempo pa hunga politiek”, ya cu e mes a manda pa tur parlamentario e nota di cambio aki un dia prome.

Di su banda parlamentario Richard Arends ta indica na presidente di parlamento cu a pesar cu tin urgencia pa presupuesto wordo aproba, esaki no ta kita cu como parlamentario, nan mester cumpli cu nan trabou di control. Es mas el a laga sa cu e tin su preocupacionnan serio riba e ‘formato nobo di e presupuesto.’

El a expresa su comprension pa henter pueblo di Aruba, ya cu e situacion cu nos ta bisando aden ta uno di nerviosismo y panico. “Pero nos mescos cu polis, mescos cu enfermeronan, awe nos tambe ta asumi nos rol como parlamentario, y si tin un cos cu semper mester keda draai ta nos democracia,” el a bisa.

El a pidi garantia riba e concepto di e nota di cambio cu nan a ricibi un dia prome, si esaki ta e mesun cu nan a ricibi ayera mainta. Tambe el a puntra si e nota di cambio aki a conta cu e conseho di Raad van Advies; y tambe rapport di Banco Central Aruba (BCA). A pesar cu eventualmente no tabata e momento pa trece e puntonan aki dilanti, pero e ta urgi gobierno pa pensa riba e posibel consecuencia contabel cu e fiansa di 1.3 biyon florin por tin, y cu bo no por controla.

Parlamentario Alvin A. Howell di fraccion di POR a anuncia e entrega di dos mocion. Mientras cu parlamentario Ricardo Croes di RED a bisa cu e no ta duna niun ‘step patras’ riba su interpretacion di Statuto di Reino. Fundamentalmente el a referi categoricamente cu e responsabilidad y garantia di nos bienestar ta cay primeramente riba gobierno di reino, ya cu Aruba no ta un estado den e mundo aki, sino Reino Hulandes ta un estado.

LEAVE A REPLY

Please enter your comment!
Please enter your name here