Abogadonan di e tabloide Britanico, The Sun, a urgi un hues Britanico ayera pa rechasa e demanda di Johnny Depp pa difamacion contra e corant, pasobra e strea di pelicula supuestamente no a revela evidencia relaciona cu su uso di droga.
Depp ta demandando editor di e corant, News Group Newspapers, y director ehecutivo Dan Wootton, tocante un articulo di 2018 acusando e actor di ta violento y abusivo contra su ex-casa, Amber Heard.
E huicio ta programa pa cuminsa na Corte Supremo na London dia 7 di juli proximo. Na un audiencia preliminar ayera, abogadonan di The Sun a argumenta cu mester rechasa e caso pasobra Depp no a revela mensahenan di texto mustrando cu el a purba di cumpra ‘MDMA y otro narcotico’ mientras e tabata na Australia cu Heard na 2015. Abogado Adam Wolanski a bisa cu no revela e textonan tabata un violacion di un orden di corte anterior rekeriendo Depp pa duna tur documento di otro caso di difamacion contra Heard na Merca.
Den corte, Wolanski a lesa mensahenan di evidencia di Heard den cual el a bisa cu e tabata someti na ‘un evento di tres dia di abuso fisico’ na man di su ex-esposo, durante cual el a tuma MDMA (ecstasy) y a bebe hopi.
Depp fuertemente ta rechasa cu e tabata violento. Su abogado, David Sherborne a bisa cu e caso di difamacion ta trata si ‘e acusadonan por proba cu e acusador a comete violencia domestico serio y pone Heard den miedo. No si Depp a pidi droga’.
Hues Andrew Nicol a bisa cu e lo duna veredicto riba aplicacion di The Sun den proximo dianan.
Ta spera cu tanto Depp como Heard lo duna evidencia personalmente na e huicio na London, cual a ser posponi for di maart pa motibo di e pandemia. Ta spera cu testigonan lo inclui ex- pareha di Depp, Vanessa Paradis y Winona Ryder, ambos a entrega declaracion di sosten na Depp.
