Aborto ta un topico di hopi controversia pa añanan largo. Instituto Guttmacher, un instancia specialisa den tema di salud reproductivo, ta informa cu entre 1.64 mil miyon di hende muhe den edad reproductivo rond mundo, solo cuater di cada 10, esta un 37% ta biba den paisnan unda aborto ta permiti bao di tur circunstancia y 6% di nan ta biba den paisnan unda aborto ta prohibi completamente.

Mas cu un 97% di hende muhe den edad reproductivo na America Latino y Caribe ta biba den paisnan cu leynan hopi restringi pa aborto of leynan cu ta prohibi aborto completamente. Ta calcula cu cada aña ta tuma luga rond di 25 miyon di aborto ilegal of no sigur na nivel mundial, segun calculacion di Organisacion Mundial di Salud. Casi un 97% di e abortonan clandestino ta tuma luga den paisnan considera di tercer mundo na Africa, Asia y America Latino.

Na Merca aborto a bira legal na cualkier etapa di embaraso. Despues cu Corte Supremo a haci aborto legal na Merca na 1973, e controversia ainda ta sigui keto bay. Corte Supremo a dicidi cu e feto, como cu no por biba sin e sosten di e mama durante e prome trimester, no tin derechonan constitucional. Mientras cu otronan ta argumenta cu e feto lo mester tin mesun derechonan constitucional cu e mama. Antes hende cu tabata contra aborto tabata wordo yama anti-aborto, y esunnan cu tabata a fabor tabata wordo yama pro-aborto. Sin embargo den tempo reciente, tanten cu e debate a sigui crece, esunnan cu ta contra aborto ta wordo yama pro-bida y es nan cu ta respalda aborto ta uza e palabra pro-choice.

Diferente pais rond mundo a haci aborto un practica legal. Moralidad, religion, etica etc. ta hunga un rol hopi importante pa determina si aborto ta un practica cu tin hustificacion of no. Un di e puntonan di bista cu ta pesa hopi ta cu ningun hende tin derecho di tuma bida di otro ser. Aunke e feto ta den un etapa preliminar di bida, e ta un ser bibo.

Argumento contra aborto

– Durante ultimo añanan, diferente estudio a mustra cu aborto por laga atras problemanan di salud pa e mama. Algun di e complicacionnan medico ta cu e trompanan di falopio ta blokia, cervix zwak, daño den matriz y den sistema di reproduccion loke por causa cu despues no por sali na estado. Aparte di esey tambe tin un chens mas halto di futuro aborto y nacemento prematuro.

– Un di e argumentonan principal ta cu niun hende tin derecho di corta bida di algo cu providencia a crea. E feto tin un alma, e cual lo bira despues den e formacion di un ser humano, nos ta nenga e chens di existencia na un hende riba e mundo aki. Un feto ta hopi chikito pa por defende of proteha su mes y ta depende di e mama pa sobrevivi.

– Un postura religioso ta cu yiunan ta regalo di Dios. Tur cos cu ta pasa na e mundo aki ta pasobra ta Dios su deseo. Si Dios kier pa un mucha nace, Dios lo cuida di dje tambe. Mata un alma cu ta bay florece kiermen cu nos ta pone un obstaculo na Dios su deseo, si e providencia a dun’e bida, tur cos lo ta drecha pa e mucha. Si e mucha a ser treci na e mundo aki, mester dun’e full su chens pa biba pasobra Dios a plania algo p’e.

– Aunke no por bisa si aborto ta un acto impordonabel, si ta un acto cu no ta wordo lubida, ta causa hopi daño den e futuro di henter e famia. E muhenan cu ta aborta un mucha ta haya hopi dificil pa deal cu stress, pasobra no por nenga cu e ta esun cu a pone fin na bida di su mesun yiu. Estudionan a mustra cu e nivel di stress ta mas halto den hende muhe cu a practica un aborto compara cu otro muhenan.

– Aborto ta contra e huramento Hipocratico cu tur dokter ta haci. Un dokter of un nurse cu ta practica aborto ta kibra e regla di oro tocante cu nan lo haci tur cos cu ta na nan alcance pa preserva bida di ser humano.

Argumentonan pro-aborto (pro-choice)

Pro-choice aborto ta referi na e vision politico y etico tocante cu un hende muhe mester tin derecho completo riba su fertilidad. E mester tin e libertad di dicidi si ta sigui of ta stop su embaraso. E movemento pro-choice ta hiba na garantisa e muhe su derechonan reproductivo. Es nan cu ta pro-choice ta argumenta esaki den apoyo na aborto:

– Prome cu tur cos ta hopi importante compronde pakico un muhe ta opta pa aborto. Tin hende cu ta kere cu e muhe ta cruel of cu e no ta worry pa e feto. E sorto di pensamento aki mester ta fuera di cuestion. Absolutamente niun hende ta disfruta aborto. E pregunta ta pakico nan a tuma e decision di aborto na prome luga?

– Muhenan ta scoge pa aborto debi na cantidad di diferente circunstancia. Niun hende ta aborta sin un rason valido, cual por inclui, sociedad, responsabilidad, edad etc. Si un muhe tin menos cu 21 aña, e ta mucho jong pa tin un baby. E por ta un persona hopi inmaduro y no ta den posicion di tuma e responsabilidad di un bida nobo. Por ta cu e no ta capaz di provee e baby cu tur loke e mester. Un mama menor di edad no ta cla psicologicamente pa maneha e responsabilidad di un mucha. Hopi di nan ta cuminsa traha pa por sostene e mucha. Esaki di un manera o otro ta kibra e futuro di e muchanan ey, den e casonan asina –segun pro-choice– aborto ta bira e miho opcion.

– Control riba su curpa y e libertad di dicidi. Ora un muhe ta na estado, ta su curpa ta esun cu ta bay den stress di embaraso. Si e ta dicidi no sigui cu esaki, e tin e libertad pa haci’e. Nenga e derecho aki ta viola su libertad mas basico.

– Un di e preguntanan mas frecuente tocante aborto ta: “Ki ora e bida ta cuminsa”? E feto por ta bibo, pero segun pro-choice, solamente ta celulanan di sperma y webo. Ta berdad cu bida den tur expresion mester wordo respeta. Sinembargo e dilema ta si feto tin mas derecho cu esun cu hende muhe tin caba?

– Aborto ta wordo haci cu tur cuidao. Mayoria di nan ta wordo haci durante e prome trimester unda ta mas sigur. Como resultado di esaki, aborto tin 0.5% di riesgo cu e muhe por desaroya un complicacion serio. Esaki no ta afecta e salud di hende muhe of su capacidad pa concebi den futuro.

– E ta bira pio den casonan di violacion, si e muhe a wordo viola, definitivamente e lo no kier haya e yiu. Forsa e mucha muhe pa tuma e responsabilidad di un criatura cu a ser concebi despues di un acto asina lo pone mas stress riba su mente. Den casonan asina dicon e mester paga pa eror di un homber? E sorto di embarasonan asina ta miho pa stop nan.

– Haci aborto un practica no legal, no ta bay stop e hende muhe di practica esaki. Si e aborto ta practica di manera ilegal, anto lo wordo haci den luganan no autorisa y esaki si lo hiba un riesgo pa e salud di e muhe.

Pa conclui

Entre e tendencia di esunnan cu ta contra aborto y esunnan cu ta respalda aborto, lo ta bon pa actua di manera responsabel pa evita sexo no sigur. Ta berdad cu e muhe tin derecho di tin su propio escogencia. Tampoco nan no mester ta victima di un extra responsabilidad di concepcion. Sinembargo tambe ta berdad cu hende muhe tin e bendicion di duna nacemento na otro bida, y pa e motibo ey mester acepta su responsabilidad.

 

LEAVE A REPLY

Please enter your comment!
Please enter your name here