Directiva di Hospital y sindicato ABV lo reuni awe y mañan riba e preocupacionnan y exigencianan di e sindicato, pa asina por yega na un resolucion cu ta na beneficio di ambos. Tanto Gina Maduro, Presidente di ABV como Jacco Vroegop, Presidente di Hunta di Directiva a bisa cu no por sigui corta sin mas den cuido, poniendo no solamente salario sino hasta e trabou di e trahadonan di hospital den peliger.

E declaracion a bin ayera tardi, despues cu mediado di Gobierno Anselmo Pontilius a envolvi den e disputa cu a desemboca den pone trabou abou Dialuna mainta, unda ABV a dicidi pa bay pa e asina yama ‘schema di Diadomingo’ unda a sigui brinda cuido na pacientnan, pero sin intervencion electivo. Awe y mañan ta sigura cu e operacion di hospital ta normal y tur hende cu mester bin pa cualkier operacion electivo lo haya su tratamento.

Segun Gina Maduro, locual a sosode ayera mainta ta cu a tene un reunion general riba e reduccion di cinco porciento riba salario, y ta e momento ey a dicidi pa e demostracion. Pero mirando cu ta bay negocia, a manda informa e miembronan y comunidad cu pa awe y mañan lo tin trankilidad y e partidonan ta na mesa. Locual ta bay pasa ta cu ABV y Hospital lo papia di e situacion financiero pa mira con pa yega na otro y si en bes di corta cinco porciento den salario, pa pasa pa corta den e beneficionan indirecto. “Nos no ta ni pidi e bonus mas cu otronan den Reino a haya. Nos djis kier pa no mishi cu nos salario. Si mester corta den gasto di personal, corta den e indirectonan.” Maduro a bisa cu a informa Secretario di Estado Raymond Knops cu kier trato igual manera tur otro trahado di hospital y cuido den otro paisnan den Reino ta ricibi. “Aruba ta unico pais den Reino cu mester a entrega salario. Pakico Aruba so? P’esey nos a laga e mensahe bon cla.”

Maduro a enfatisa cu e condicionnan cu Hulanda a impone pa e prome tranche di sosten di likides tabata mara na condicionnan cu a conta pa Aruba so y no pa otro paisnan. “Corsou a para fuerte. St. Maarten a para fuerte. Pero Aruba tabata e unico cu a entrega. Nos den cuido a bisa cu ta basta. Miembronan a bisa cu nos no ta dispuesto pa entrega salario. No tur hende a entrega salario na Aruba. Y otro sectornan cu loonsubsidie ta traha menos. Aki ta traha mas y ta gana menos. For di Maart nos ta den un lucha. Mi mes a haya COVID-19. Otro trahadonan tambe. Specialistanan tambe tabata afecta pa COVID-19.” Esey ta motibo tambe pakico ABV a sinta cu representantenan di specialistanan, tanto esnan den servicio di hospital como esnan para riba nan mes pa mira kico ta e siguiente pasonan pasobra, “nos tur a sinti e efecto.”

Jacco Vroegop di su banda a bisa cu e ta compronde e preocupacion y e siguridad cu tin hopi tempo andando. E cortamento di 5 miyon florin pa luna den cuido y cortamento di salario a bin como sorpresa pa e Director di e hunta di directiva, particularmente mirando cu tur caminda rond mundo, net awor ta pone mas placa disponibel pa cuido. Pero e ta reconoce tambe cu Aruba a ricibi hopi sosten di Hulanda, den forma di personal specialisa pa trata casonan di COVID-19 y aparatonan. Vroegop ta spera di lo por convence Hulanda pa absorba e gastonan actual di e di tres ola di COVID-19 na Aruba.

Vroegop a asumi su funcion na September ultimo y e ta bisa cu e ta sinti su mes hopi envolvi cu hospital, e personal y comunidad. Como semi-Arubiano e t’ey aki pa bringa pa Aruba. “E pandemia sinembargo a pone e pais bou presion. Nos tarea, hunto cu ABV y otro instancia partner den cuido mester sigui duna miho servicio. Nos kier evita cu e cortamento di gasto tin impacto riba e calidad y siguridad.” Jacco Vroegop a splica cu a haci peticion na Gobierno di Aruba y na Raymond Knops pa no kita mas placa di cuido, pasobra e impacto no ta solamente pa esnan cu ta afecta pa e virus, pero tambe pacientnan di cancer kendenan a tarda pa haya tratamento pa motibo di cu tabata forsa pa haci escogencianan.

“Knops a laga sa cu ta habri pa papia di placa, pero cu mester papia na nivel macro y tin e solidaridad pa hunto bringa pa e isla. Nos como Directiva di hospital a papia di esey, cu IMSAN, SABA, HAVA y otro partner. Nos a reuni pa hunto bin cu un mensahe cla pa splica pakico no por spaar mas riba cuido.”

E Director di hunta di directiva a bisa di ta compronde e accion di ABV, pasobra si cortamento ta sigui, a lo largo lo no papia mas di salario so, pero tambe lo nifica cu ta corta den trabou mes. “Hende kier claridad. Pero, nos ta lamenta accionnan manera awe si,” Vroegop a bisa ayera tardi. “ Con bon e intencion por ta, nan tin un impacto negativo pa negociacion. No solamente cu directiva, sino tambe cu Hulanda. E ta mina nos posicion cu Hulanda y region.”

Jacco Vroegop ta optimista cu lo yega na un bon palabracion cu ABV den e dos dianan aki. En todo caso, Diabierna awor lo sali un carta pa VNO, Gobernador, Parlamento y Gobierno na nomber di tur partner den cuido di Aruba, pa splica pakico no por sigui corta den cuido na Aruba.

Cu mester reforma ta un hecho y hospital y e otro partnernan a compromete di bin cu un plan di reforma pa mira con por bira mas eficiente door di mehora procesonan y colabora cu otro. E ta sigura cu e gruponan di trabou di tur cu ta envolvi den cuido lo bin cu un plan concreto cu por keda implementa pa e di dos mita di 2021.