Carta di Director di Inspeccion di Enseñansa Heinrich Hessen tabata base di e decisionnan di Minister di Enseñansa Rudy Lampe riba futuro di Colegio San Nicolas. Bon Dia Aruba a ricibi e copia di e analisis aki.

Segun e documento, e team di maneho, MT, sr. Samuel Dumfries y sra. Robin-Ann Didder a tuma encargo di Colegio San Nicolas, CSN, na Augustus for di ex rector Hubert Goedgedrag. Informacion riba e cantidad di alumno, klasnan y clusters tabata parti di e traspaso.

Desde September 2020 a reuni diferente biaha riba e formularionan digital y e norma pa yena esakinan. Aunke cu oficialmente mester a entrega e formularionan aki pa 15 di September pa e aña escolar 2020-2021, mirando e ahustacionnan a dicidi pa pusha a fecha pa 1 di October 2020. Pero, a pesar di tur esfuerso di e MT di CSN pa por ricibi e formularionan aki, pues tambe riba e distribucion di e scol no a keda aproba ainda.

Motibo di esaki ta cu a kibra diferente norma. Inspector Hessen a bishita e scol dia 19 di November pa por a yega na palabracionnan nobo y concreto pa e cantidad di klas, e tabelnan di les y e ocupacion di scol.

Banda di determina e cantidad di klas, e revision di e cantidad di alumno y revision di e tabel di les, a haci un control adicional riba ehecucion di trabou door di docentenan, cu sea ta yuda e desaroyo y proceso di siñamento di alumnonan cana bon of ta tranca esakinan.

E controlnan a tuma luga basa riba diferente keho di mayor riba e hecho cu cierto docentenan no tabata coregi examennan (proefwerken), tabata keda sin duna cifra y tin prestacion educativo abou.

Locual Hessen a conclui

A base di e bishita aki a bin diferente punto dilanti. Segun e tabel di cantidad di alumno pa 1 di September 2020 y basa riba e norma di 28 alumno pa klas, CSN mester tin 25 klas. Na comienso di aña escolar 2020-2021 tabatin 31 klas.

Tin 2 cluster -1 alumno den Ciclo Basico 2. Ta trata di alumnonan cu tin problema of no tin bista. Cada alumno tin cuater luga necesario, cu ta uno pa e assistent, uno pa e mashin di braille, uno pa e ekiponan necesario y material special. Pa motibo di e situacion special aki, no por pone tur klas hunto. Cada alumno di cluster-1 a bay den un klas di 19 alumno. E otro klasnan tur a keda yena te cu 26 alumno. Tambe CSN tabatin 2 alumno den cluster-2 cu ta pa hobennan cu problema di oido. Un di e alumnonan tabata caba den e ultimo añanan di HAVO y e otro a bandona scol.

Segun e situacion nobo di December 2020, Ciclo Basico 1 na CSN tin un promedio di 23.5 alumno. Ciclo Basico 2 tin un promedio di 23.2 alumno. Havo 3 tin 22 alumno; Havo 4, 27.5 alumno; y Havo 5 tin 24.1 alumno. HL 1 tin un promedio di 24 alumno y HL2, 24 tambe.

Locual Inspector di Enseñansa Hessen a descubri ta cu mientras cu e tabel di les pa HAVO ta regla pa ley, esta e LBHAM, Juli 2015, AB 1999,no 62, CSN a mantene su propio tabel di les. E discrepancia entre locual ley ta prescribi y e tabelnan di les a keda describi den un rapport pa Minister.

Door di ahusta e tabel di les actual cu esun exigi pa ley, ta crea ocupacion nobo. Door di acumula tur ta yega na un diferencia di 105 ora di les entre e sistema cu e Inspector a topa cune y esun cu ta rekeri pa ley. Locual mester haci ainda ta wak con por hinca e diferente cluster cu otro, pa e klasnan 5 di HAVO. A habri un cantidad di clusters cu ta desvia di e cantidad di alumnonan cu ta permiti pa forma uno. Asina a habri un cantidad di cluster adicional pa cierto materia (vak) pa forma gruponan mas chikito.

Clima di scol sigur

Pa por garantisa un clima di scol sigur, mester bin un plan di siguridad di scol. Un di e puntonan riba cua un plan asina mester ta basa ta e prevencion di escalacion y incidentenan. Señalamento di posibel risiconan ta importante. Pa motibo cu no tin control (surveillance) na CSN dificilmente por actua of reacciona mesora riba incidentenan, escalacionnan y posibel comportacion di tentamento riba tereno di scol.

Clima di siñamento sigur

Pa stimula un clima di siñamento sigur, e ta importante pa e alumno sinti su mes autonomo y competente. Esaki ta rekeri cu e mester haya reaccion mesora riba su prestacion di siñamento, di forma cu e alumno por regula su mesun proceso di siñamento. Mas ainda, un sentido di habilidad ta stimula un actitud positivo pa siñamento cerca alumnonan.

E anotacion di cifranan ta cay bou di e oranan no mara di docentenan. Pa medio di discuti e testnan y haci conoce e resultadonan, por guia e alumnonan den nan proceso di siñamento y lo por bin un regulacion propio. Pero si docentenan no ta laga e alumnonan sa kico nan punto ta, pues no sa e rendimento di siñamento di e alumno, esaki ta stagna e proceso di siñamento di e alumno.

E control riba e totalidad di cifranan cu mester duna alumnonan di 18 di November 2020 a constata cu falta hopi cifra pa diferente materia. Pero durante e control aki no a tene cuenta cu e absentismo di e docentenan, e carta di Inspector Hessen ta bisa.

Reaccionnan

Bon Dia Aruba a compronde di diferente fuente cu a prefera pa no keda identifica cu e problema di Colegio San Nicolas ta falta di organisacion, structura y liderazgo na nivel di e cuerpo di docente y maneho. E nivel di absentismo na Colegio Arubano San Nicolas ta hopi halto, pero locual kizas ta mas preocupante cu algun docente no ta sinti e necesidad pa avisa cu nan ta malo y ta keda sin presenta na scol sin mas. Y esnan encarga cu e scol no ta tuma paso ya cu e actonan aki ta sosode sin cu tin consecuencia pa nan. consecuencia ta cu alumnonan ta cay atras den les.

“CSN ta draai riba overtime. Tin algun docente ta cobrando overtime pa oranan cu nunca nan a traha. Tin mucha cu no a haya les mes, tin biaha pa lunanan. . Ta cobra muchanan pa buki pero ta stencil nan ta haya. Algun docente no ta presenta na scol mes, no tin control,” a bisa Bon Dia Aruba. “Diferente docente a dicidi pa kita di e scol pasobra nan no por acepta e falta di structura. Calidad ta hopi abou, pasobra hopi hende tin miedo di mustra e problemanan real, y kizas punta dede riba coleganan cu ta faya.”

Di otro banda, docentenan di CSN ta hopi disgusta cu nan nomber a keda publica den un rapport cu a bay pa henter comunidad. No a tene cuenta cu nan privacidad y ni cu condicion specifico di cada uno. Y e publicacion di nan nomber ta bin despues di lunanan di comunicacion dificil, pa no bisa imposibel cu e Minister di Enseñansa.

LEAVE A REPLY

Please enter your comment!
Please enter your name here