editorial.jpg

Recientemente den e editorial aki nos a toca brevemente e asunto di derecho di e ciudadano pa apela contra un decision di un entidad gubernamental. Hopi aña atras esey tabata solamente posibel via un caso den corte, loke naturalmente no tabata na alcance di e ciudadano cu un cartera chikito. 

Desde añanan 90 a bin un cambio di esey. A introduci e ordenanza riba hurisdiccion administrativo (LAR: Landsverordening Administratieve Rechtspraak), cu ta duna e posibilidad na cualkier ciudadano, sea persona natural o persona huridico, pa registra obhecion contra decision di gobernacion riba un peticion haci na cualkier instancia gubernamental.

E opcion aki a crea expectativa bastante grandi e tempo ey, pero despues di tanto aña ta bon pa evalua cuanto efecto e ley aki tabatin desde e mas di binti aña cu a transcuri desde su entrada na vigor. Pa atende e casonan di apelacion a crea un organismo nobo, conoci como Bezwaaradviescommissie LAR. E comision ta consisti di tres o cinco persona, cu cierto trayectorio y experiencia huridico, specificamente den gobernacion. E comision ta conta cu un aparato administrativo modesto. Kico asina ta e proposito di e ley aki? Manera bisa caba, duna mas posibilidad na e ciudadano pa apela contra un decision gubernamental, unda e persona ta sinti cu e decision a afecta su interes personal. Pero e ta implica mas cu esey. Ta spera di banda di e organismo gubernamental, cu lo recoge e experiencia cu cierto caso den e proceso di apelacion, evitando cu casonan similar tambe ta termina den un apelacion na LAR tambe.  E pensamento ta cu e proceso di apelacion a lo largo ta yuda mehora e procesonan administrativo den henter gobernacion, pasobra e organismonan aki mes ta mehora nan proceso y proceduranan, pa evita cu cierto tipo di problema ta keda ripiti.

Kico den practica por ta e problemanan cu ta surgi y cu por evita den futuro? Un di e problemanan cu ta surgi, sin cu ta duna conocemento na esaki, ta e hecho cu e ciudadano ta entrega su obhecion (bezwaar) na e entidad (bestuursorgaan) cu a tuma e decision contra cual e ta apela. Den caso cu e manda un copia di su apelacion pa comision LAR, nan ta na altura di e apelacion, pero no por haci nada te ora haya e documentonan for di e entidad cu a dicidi. Si e caso no yega nunca, e ciudadano tin un problema pasobra LAR no ta trata e caso sin esey sucede. Mester ta posibel, pa obliga e entidad gubernamental procesa e apelacion, dunando comision LAR  e potestad pa trata e apelacion cu of sin cooperacion di e entidad en cuestion. Esaki ta garantisa e ciudadano cu su caso lo keda trata di cualkier manera. Esaki ta pone mas presion riba e organismo gubernamental pa atende su casonan di apelacion debidamente.

Otro problema cu ta surgi ta e caso, unda a haci un peticion di varios elemento, unda a avansa cu e caso te den corte, ya cu ora e caso no keda cla den comision LAR, semper ta keda e caminda habri pa bay hues. Kico por,  y a yega di sucede den caso concreto caba? Mientras e caso ta den corte, gobierno ta tuma un decision parcial pa loke ta e elementonan di e peticion, obligando asina e ciudadano bay cerca comision LAR pa apela contra e decision parcial, mientras cu e otro caso ta sigui den corte. E tipo di procesonan aki ta hiba na confusion grandi, un berdadero ‘van het kastje naar de muur’ unda hasta hues no sa bon mas si algo mester bay pa LAR of mester trata e asunto den corte. Tur esey por evita cambiando e ley di tal manera, cu unabes e caso a bay pa corte, e no ta bolbe pa LAR pa ningun decision parcial.

Un otro aspecto importante di e ley aki ta cu e veredicto di e comision LAR ta keda un conseho na e organismo en cuestion. Esey significa cu por ignora e veredicto y sigui cu  maneho manera e ta, sin cu algo ta cambia pa e ciudadano. Es decir, e idea cu e caso na LAR lo yuda pa reflexiona riba mehoracion di e  procesonan administrativo no ta bira realidad y no ta logra e mehoracion.

Pregunta ta keda kico ta e balor pa un ciudadano  cu no tin asina hopi conocemento huridico y no por haci nada contra e deseo di e departamento gubernamental pa frustra su intento pa logra cambio di e decision. Den caso di esnan cu recurso financiero amplio, nan no ta perde pa gana y ta sigui pa corte, pareu e posibilidad presenta. Pa nan, LAR ta parce mas un estorbo pa nan sigui bay corte y haya un decision di hues cu si ta obliga gobernacion revoca e decision, si hues duna veredicto na fabor di e apelante. Recomendacion: despues di tanto aña di funciona, lo ta bon pa haci un evaluacion profundo na funcionamento di e ley y e circunstancianan bao di cual e comision ta opera. 

 

LEAVE A REPLY

Please enter your comment!
Please enter your name here