Te cu awo, marihuana y cocaina a wordo haya den cargashon di droga

Baho mundo a habri siman cu un sla duro atrobe, ora cu Polisnan Maritimo a descubri un cargacion grandi di droga, durante pleno transporte pa nos isla via lama, den vecindario di Santana di Cacho den Colony. A tuma e droga den beslag mientras cu e 2 sospechosonan ta den man di husticia, pendiente e investigacion cu a cuminsa awor.

Segun Vocero di Polis ainda e cantidad di droga no ta conoci mirando cu mester test y pisa cada paki, e ta un proceso cu ta tuma su tempo. Tambe teniendo na cuenta cu e investigacion ta uno inespera pa UGC y tin otro investigacionnan andando, cual a haci cu tin mas trabou. Tur cos ta mustra cu ta trata di paketenan di marihuana y di cocaina cu a wordo haya.

Mientrastanto e dos personanan haya abordo ta deteni.

Informacion relato di polis:

Dialuna mainta Polis a haya notificacion di un boto sospechoso, mesora Central di Polis a coordina pa manda patruya di San Nicolas pa Sero Colorado, pa maneha e situacion na tera, mientras cu a manda BP-2, e boto di Polisnan Maritimo, pa bay mesora na e sitio. Den menos di 5 minuut e boto di Polis a informa cu e ta na e sitio y a topa cu e boto cu e nomber “Porfin”. Asina cu Polisnan a subi riba e boto y a start cu nan control rutinario, a topa cu un cantidad considerabel di droga.

Considerando e hayazgo grandi aki, pa mas o menos 11:00am, Polis a detene dos homber Arubiano abordo di “Porfin”, kendenan awor lo mester bay duna cuenta di e droga encontra den e boto. Polisnan Maritimo a pasa e caso y e detenidonan over pa e Departamento di Crimen Organisa cu awor lo continua cu e investigacion.

Ta importante resalta e hecho cu Polis ta conta cu e sosten y cooperacion di comunidad pa suministra informacion asina cu nota un movecion sospechoso y/of iregular. Asina por mira cu un “tip” importante awe a conduci na un accion relampago, kitando droga for di caya y garando esunnan cu ta haci nan mes culpabel na transporta y bende droga. Ta hunto so Polis y comunidad por percura pa tene nos isla mas sigur y un isla mas dushi pa biba.