Ayera mainta Cuerpo di Polis a informa riba un accidente basta serio na Camacuri unda un auto a bolter y e chauffeur, un muhe di 33 aña, lamentablemente a perde su bida.

De un comunicado di prensa di ayera diadomingo mainta Cuerpo di Polis a splica cu pa mas o menos 6:05 di mainta central di polis a haya informacion di un accidente cu a tuma luga na altura di MotorWorld riba e caminda di Camacuri.

E prome informe di nan a señala cu tabata trata di un auto cu lo mester a bolter y tabatin un persona pega bao di e auto.

E prome patruya a yega na e sitio y a constata cu tabatin un persona pega bao di e auto, cu ta un Nissan Cube preto numera A-61366.

A pidi ambulance cu maximo urgencia na e sitio mirando e situacion di e victima (chauffeur) pero lamentablemente no por a haci nada mas pa e victima.

Pa 7:10 di mainta dr. Texier a constata morto di e chauffeur di nomber Reina Rosalinda Caroline Roga, naci na Aruba dia 22 september 1990, ken tabatin 33 aña di edad.

Na e sitio a presenta specialista di trafico como tambe polis tecnico pa asina por haci nan investigacion. Departamento di slachtofferhulp tambe a presenta pa duna e famia asistencia.

Otro accidente fatal den mesun area cu resultado fatal casi dos siman atras

Casi dos siman pasa, tambe a tuma luga un otro accidente fatal na mesun area na altura di Aruba Bank caminda un auto lo a alcansa un peaton.

Cuerpo di Polis a informa e dia ey cu na yegada di e prome patruya nan a haya cu un persona masculino banda di caminda y tabata mustra hopi critico. Mirando su situacion, a pidi ambulance cu maximo urgencia.

Na e sitio polis ta topa tambe cu e auto KIA Sportage color preto A-18809. Polis a acerca e chauffeur na unda ta constata cu e lo ta bao influencia alcohol y a bay over pa realisa e test. Mirando e resultado, nan a detene e chauffeur di e auto KIA Sportage.

Un rato despues ambulance a presenta pero no por a haci nada mas pa e victima.

Pa 11:45 di anochi di 21 di april Dr. Texier a constata morto di e homber Altair Jaques Brelaz, naci na Brazil di 54 aña di edad y ken tabata bibando na Aruba.