‘Carnaval den september’

Partido POR y AVP tabata tin nan parada di auto, MEP a subi caya tambe pa sigui campaña y recauda fondo pa st. Maarten. Esakinan entre otro tabata e actividadnan politico cu a tuma luga pa locual ta e ultimo fin di siman prome cu eleccion, cual hopi den comunidad a considera manera un carnaval den luna di september.

Hopi tabata comenta online como tambe riba caya di con e fin di siman aki a mustra y te hasta sinti manera un carnaval den luna di september. Esaki pa motibo di tur e ambiente cu tabata tin di partidonan politico riba parada y campaña pa locual tabata ultimo fin di siman prome cu eleccion diabierna awor. Cuminsando cu diasabra anochi, partido POR a tene su prome parada politico como partido nobo pa bay siguiente eleccion. E parada a ilumina tur districto na Aruba cu autonan cargando diferente tipo di luz blauw riba nan estilo lightning parade. E parada a inicia na Noord y termina na San Nicolas na un actividad di politico Allan Howell. “Ta falta algun dia so. Ban traha duro, ban busca e un voto extra ey pa nos por logra diabierna awor manera Andin a bisa, celebra cu na Aruba tin un partido, tin un forsa nobo y nos ta bay hiba Aruba pa dilanti
, tabata comentarionan di lider di partido POR Otmar Oduber. E parada a bay sin ningun strobacion y polis a percura pa dirigi trafico miho cu tabata posibel. Nos a purba varios biaha di haya un reaccion for di Cuerpo Policial riba con a bay cu e maneho di trafico den e fin di siman aki cu tur e actividadnan politico, pero no a logra.


Coordinacion di trafico
Ayera trafico tabata druk cu e parada di auto di AVP y militancia di MEP tambe riba caya ta campaña na mesun momento. Manera nos a menciona, nos no a logra haya un reaccion for di polis riba con a coordina pa maneha trafico durante e diferente actividadnan aki. Nos redaccion a tuma nota por ehempel na rotonde di Tanki Flip, polisnan un rato a haya nan mes den un situacion poco fastioso pa dirigi trafico. Algun hende a keha cu polis a kibra e parada aki aya, pero otronan a remarca cu polisnan a haci un tremendo trabao.

Nan tabata dirigi e parada di autonan y duna oportunidad na otronan pa pasa cu no tabata den e parada, haciendo esaki na un manera trankilo y toch mas lihe cu tabata por pa no causa stagnacion innecesario di trafico. Partido MEP tabata riba caya, bayendo bario pa bario recaudando fondo pa st. Maarten. Esaki a cuminsa 12.30 na YMCA San Nicolas y termina na cede di un di e candidatonan, conoci manera Plaza Starke na Oranjestad, pa 7or di anochi. A finalisa e campaña cu Robert y su Solo Banda Show. Segun un publicacion riba e pagina di Facebook di MEP, nan a logra recauda mas o menos 8500 florin.

Nos no a logra haya reaccion for di ningun automobilista pero tabata notabel si cu no tur hende tabata tin pasenshi den trafico durante e actividadnan politico aki. Tabata tin un incidente na crusada dilanti di banco CMB Noord, unda cu aparentemente un auto a alcansa un of dos persona riba caminda. Nos no a haya informacion di autoridadnan riba kico a bay robes akinan.

Parada di AVP
‘Sla, sla nan t’ey haya, sla!’, tabata e himno di simpatisantenan di AVP ayera. E parada di auto di AVP a cuminsa na cas di partido na playa y termina na Carnival Village, San Nicolas. E parada a cuminsa basta trempan, cu hendenan wardando na banda di caminda for di 9or di mainta y ambiente na rotonde di Pos Chikito te oranan di atardi.

Riba rednan social mesora fuentenan y simpatisantenan di partidonan di oposicion a cuminsa comenta riba cantidad di vehiculo cu tabata tin den e parada compara cu ultimo eleccion. Esaki nan a calcula tabata un poco mas cu 800 auto, compara cu ultimo eleccion cu nan ta bisa tabata mas cu 2.000. Nos no a logra confirma esaki pero nos a observa cu ya pa 4or di atardi e cabes di e parada tabata drentando Pos Chikito, mesun momento cu e rabo tabata saliendo for di Paradera.

Un di e comentarionan di minister di salud Alex Schwengle durante e parada: “Ta mustra cu e famia di AVP ta birando hopi mas grandi.” Algun di e comentarionan cu Bon Dia a haya for di hende para na banda na St. Cruz, tabata cu simpatisantenan di e partido geel no a haci fastioso manera tabata e caso riba ultimo aña electoral. Tabata tin algun simpatisantenan di partido MEP sinta na banda, cu nan bandera y T-shirtnan mirando e parada di AVP pasa. Sinembargo otronan si a comenta cu tabata tin algun simpatisante di e partido geel cu tabata of a purba kibra e parada den auto. “Hende sin pasenshi of ta desespera”, un persona a comenta.

Por a mira hasta algun simpatisantenan di e partido POR cu tabata para ta wak e parada di AVP pasa banda di e rotonde di Paradera. Tabata notabel tambe algun tiramento di palabra entre simpatisantenan di tur partido, pero na final di dia tur cos tabata concentra riba ambiente.