Reino Hulandes, cual tambe Aruba, a firma un acuerdo importante cu Merca pa miho colaboracion den e lucha contra criminalidad y terorismo internacional. Aki bou por lesa e relato di ministerio di Husticia:
Diahuebs a firma un Memorandum of Understanding (MoU) entre Departamento di Husticia di Merca y Ministernan di Husticia di Reino Hulandes pa maximalisa cooperacion entre e paisnan den e lucha contra di crimen organisa y terorismo internacional den e teritorionan di Caribe Hulandes. Dicho reunion a tuma luga na Hulanda. Minister di Husticia mr. Drs. Arthur Dowers a firma e MoU di parti di Aruba.
E documento ta enfoca riba duna realce na e cooperacion existente y reenforsa aplicacion di ley y e sistema di husticia penal den e partinan Caribense di Reino Hulandes, asina Minister Dowers a splica. El a agrega cu e convenio ta un di e resultadonan di e bon relacion y cooperacion continuo cu ta existi entre e diferente partnernan y cu tur ta mira un beneficio den traha ainda mas di cerca hunto riba e tereno menciona.
E MoU ta reconoce cu e islanan tin un posicion geografico den region di Caribe cu ta haci nan vulnerabel y e grandura di e islanan por ta causa di retonan pa cu e lucha contra di crimen organisa y terorismo internacional.
Den e acuerdo ta cubri topiconan manera stimula actividadnan conhunto, mas intercambio di informacion pa cu investigacionnan criminal y mantencion di orden y siguridad publico, fortificacion di cooperacion mutuo pa cu e tereno forensico y organisacion di e sistema di husticia penal.
Un tereno cu ta ricibiendo hopi mas atencion na Aruba den e ultimo añanan, esta capacitacion di personal, tambe ta inclui den e MoU, subrayando e importancia di e procesonan aki, Minister Dowers ta laga sa. Den futuro lo bay mira tambe entre otro mas asistencia tecnico pa cu organisacion di e sistema di husticia, entre otro pa medio di uzo di facilidadnan, entrenamento di personal y ekipo y materialnan, como tambe intercambio di experticio.
E lucha contra crimen internacional organisa y terorismo ta rekeri mas colaboracion y nos paisnan ta keda vulnerabel; cu un acuerdo manera esun firma awe nos ta traha hunto y hunto cu Merca, pa haci nos personal, nos cadena di husticia y servicionan envolvi cu esaki mas fuerte y mas resistente, asina Minister Arthur Dowers ta comenta.
A firma e Memorandum of Understanding dia 2 di juni na Amsterdam, Hulanda, pa “Attorney General” di Merca, Loretta Lynch; Minister di Siguridad y Husticia di Hulanda, Ard van der Steur; Minister di Husticia di Corsou, Nelson Navarro; Minister di Husticia di Sint Maarten, Edson Kirindongo y Minister Arthur Dowers pa Aruba.
