Nos por tabata testigo recientemente di un pleito entre simpatisante di partido, uno ministro, otro periodista. Mientras esun tabata kere cu e ta cuestionando, e otro tabata haya esey acusacion y kier mira prueba. Dentro di poco esaki por tin su continuacion den corte. Esaki a pesar cu e periodista a haya retiro di su dunado di trabao, cu sa bon ta ken ta percura pa entrada na corant. Na dado momento, tambe partido mayor den oposicion a vocifera su dudanan den un carta, cu un lista di pregunta dirigi na e ministro en cuestion, cu e peticion pa contesta esakinan por escrito. Pa por trece un poco claridad, asina leu cu ta posibel, laga nos analisa loke tin riba mesa awor. Basicamente tin dos punto importante:
Ministro ta ser acusa, o sospecha, di tin participacion den cierto empresanan como doño, algo cu no lo cuadra cu su posicion di ministro;
Ta sospecha cu tin empresa cu ta ser privilegia pa e ministro, den otorgamento di contracto cu Aruba Tourism Authority (ATA).
Pa loke ta trata e prome punto: como contesta riba e acusacionnan, tanto e ministro como e director di e empresanan a desmenti cu e ministro ta doño. Pa proba esaki a mustra riba cu nomber di ministro no ta aparece como director niun caminda. Esaki por cualifica simplemente como un argumento sin fondo. Cualkier NV of otro forma legal por tin director sin cu ningun di nan ta doño. Doño ta ora bo ta accionista, bo so of hunto cu otro persona, di e compania. Of ora bo ta doño di un empresa individual, un ‘eenmanszaak’. Asina ta cu e copianan di Camara di Comercio cu ta mustra cu ta e amigo ta doño y no e ministro, no ta proba nada, tampoco na fabor di e ministro. Su defensa ta di mesun calidad cu e acusacion. Si por mustra e registro di accionista, up to date y confiabel di e companianan, nos lo ta papiando diferente. Tanten cu esey no ta riba mesa, nos ta papiando den bashi.
E asunto di permiso pa e logo di Aruba ta otro caso cu mester analisa separadamente. Kico ta e caso di e empresa GRAPHI-X & BEYOND (of GRAPHIX AND BEYOND, of G&B GRAPHIX and BEYOND N.V.)? Prome tabatin un eenmanszaak inscribi na KvK (GRAPHIX AND BEYOND) cu ta riba nomber di Natasha Roga. Dia 13 di maart 2003 a cera e negoshi aki. Dia 1 di september 2002 a habri un ‘vennootschap onder firma’ (VOF, partnership), GRAPHI-X AND BEYOND, cu dos partner, un di nan esposa di e ministro y e persona menciona anteriormente cu tabatin e eenmanszaak bao di (practicamente) e mesun nomber. Dia 12 di juni 2009 ta cera e ‘VOF’ y e señora Roga ta lanta riba mesun fecha atrobe un ‘eenmanszaak’ bao di e nomber Graphi-X & Beyond.
Despues a lanta un NV cerca notario, dia 5 di september 2011. E NV aki, cu nomber G&B GRAPHIX and BEYOND NV, cu tin como director y accionista unico e mesun señora Roga. E NV aki te dia di awe no tin un permiso di Asunto Economico pa opera, segun datonan publico di Camara di Comercio.
Awor ta bin e parti interesante di e storia: dia 24 di juni 2011, ora cu ATA ta saca un anuncio oficial bisando cu e compania Graphix & Beyond ta e unico compania autorisa pa uza e logo referi, ta existi un solo compania cu por tabata e beneficiario den e caso aki y esey ta e eenmanszaak nobo Graphi-X & Beyond, bao di KvK no. 38735. Na e momento ey, no tabata existi ningun G&B Graphix and Beyond NV ainda. Loke mester clarifica awor ta e traspaso di e permiso di e eenmanszaak di Graphi-X & Beyond pa G&B Graphix and Beyond NV, y manera ta resulta awor, di e NV aki pa DAMOX NV, cu a lanta 1 di augustus 2011, pues tambe despues cu a otorga e permiso na Graphi-X & Beyond. Si acaso a otorga e permiso na juni 2011 na un di e otro companianan menciona aki, anto mester splica con: companianan cu a cera caba, of companianan cu no tabata existi ainda, por haya un contracto cu ATA, un entidad semi estatal, cu ta mara na tur ley vigente pa haci negoshi legalmente corecto.
Nos conclusion den e puntonan trata aki ta cu: 1. Nos no ta expresa opinion algun tocante supuesto posicion di propietario di e ministro, mientras no ta mira prueba palpabel den forma di participacion como accionista den un empresa; 2. Nos ta kere cu e ministro mester duna mas pronto posibel un clarificacion, cu e documentonan corespondiente, ta con e otorgamento a tuma luga, y specificamente e traspaso, si esey a tuma luga, na dos ocasion pa dos entidad cu a primera bista no tin nada di haci cu esun cu a haya e permiso inicialmente; 3. Tambe mester clarifica pakico no a haci destaho publico nobo, y a opta pa traspasa e permiso sin mas riba otro entidad huridico. Palabra ta na ministro.
