AFTA ta prepara ley pa regula costo di pago cu carchi despues cu estudio a señala tarifa halto na Aruba

Aruba Fair Trade Authority (AFTA) ta trahando riba preparacion di legislacion nobo pa regula e costo relaciona cu transaccion cu carchi di pago na Aruba. E proceso ta sigui un investigacion di mercado cu AFTA a completa na 2025, cu a conclui cu tarifanan pa pago cu carchi na Aruba ta seis te siete biaha mas halto compara cu Europa y Merca. Segun AFTA, un parti importante di e costo ta e denominado “afwikkelingsvergoeding”, un tarifa estableci pa companianan di carchi manera VISA y Mastercard.

Debi, entre otro, na cantidad grandi di pago cu turista ta haci cu carchi na Aruba, AFTA ta calcula cu alrededor di Afl. 45 miyon ta sali for di economia Arubano cada aña como consecuencia di e tarifa aki.

Den su rapport di e prome seis luna di 2026, AFTA ta duna un actualisacion di e proceso cu a sigui despues di publicacion di su investigacion riba tarifa di transaccion cu carchi na 2025. E autoridad a cuminsa durante prome mitar di e aña cu preparacion di reglanan cu eventualmente mester establece un limite pa e tarifa cu ta ser cobra durante e tipo di transaccionnan aki.

E investigacion original a cuminsa despues cu empresanan a expresa preocupacion tocante e costo halto y falta di claridad riba e tarifanan cobra pa acepta pago cu debit y credit card. E asunto ta relevante pa negoshinan cu ta acepta pago cu debit of credit card, pasobra diferente costo ta forma parti di proceso di un transaccion electronico.

Na final di 2025, AFTA a conclui a base di e investigacion cu tarifanan pa transaccion cu carchi na Aruba ta seis te siete biaha mas halto compara cu esunnan na Europa y Merca. Segun e autoridad, e componente mas grandi di e tarifanan aki ta e afwikkelingsvergoeding.

E tarifa aki ta ser determina pa companianan di carchi manera VISA y Mastercard y, segun AFTA, ta ser aplica uniformemente pa banconan. Cada biaha cu un pago cu carchi tuma lugar, e banco di e comerciante mester paga e afwikkelingsvergoeding na banco di e consumidor.

E funcionamento aki tin un efecto particular den caso di Aruba. Un parti grandi di pago cu carchi riba e isla ta ser haci pa turista. Esaki ta nifica cu den hopi transaccion banconan di Aruba mester paga e tarifa na un banco den exterior, dependiendo di unda e carchi di e consumidor a ser emiti.

Segun calculacion presenta pa AFTA, como consecuencia di esaki alrededor di Afl. 45 miyon ta sali for di economia Arubano anualmente. E autoridad ta identifica reduccion di e salida di placa aki como un di e motibonan pa introduci regulacion di e afwikkelingsvergoeding.

E cambio cu AFTA ta preparando ta concentra specificamente riba posibilidad di establece un maximo pa e afwikkelingsvergoeding cu companianan di carchi ta determina.

Segun AFTA, regulacion mester haci posibel pa pone un limite riba con halto e tarifa ta. Cu esaki, e autoridad ta busca limita cantidad di placa cu ta sali for di Aruba pa exterior como consecuencia di transaccion cu carchi. Pero e meta di e regulacion ta mas amplio cu solamente reduci salida di placa.

AFTA ta indica cu e marco nobo mester contribui na mas eficiencia y transparencia den mercado di pago, promove condicionnan igual pa diferente participante den mercado y contribui na un sistema di pago cu ta funciona bon. Den desaroyo di e regulacion mester tene cuenta cu interes di comerciante, consumidor, institucion financiero y economia Arubano.

E intencion ta pa crea un marco legal moderno, transparente y balansa pa e tarifanan relaciona cu transaccion basa riba carchi.

E rapport no ta indica ainda cuanto exactamente e tarifa maximo lo ta, ni cuanto reduccion e regulacion eventualmente por produci den costo total di pago cu carchi. Tampoco e documento ta establece cuanto di un posible reduccion eventualmente lo yega directamente na consumidor of comerciante. E informacion cu AFTA ta presenta den e rapport ta concentra na preparacion di e marco legal y e meta di regula e afwikkelingsvergoeding.

Un desaroyo importante durante e prome mitar di 2026 ta cu ya tin acuerdo tocante e forma huridico cu e regulacion mester haya.

Segun AFTA, Gobierno, Directie Wetgeving en Juridische Zaken (DWJZ) y otro stakeholder involucra a yega na acuerdo cu un Landsverordening separa ta e manera mas adecuado pa regula e afwikkelingsvergoeding.

E direccion aki ta cuadra cu e opcion preferi cu tabata inclui den e documento inicial prepara pa e proceso. E Landsverordening nobo lo existi banda di e futuro legislacion relaciona cu dunadornan di servicio di pago y sistemanan di pago.

Esaki ta nifica cu regulacion di e tarifa di carchi no lo warda necesariamente riba un marco legal mas amplio pa sector di pago, sino cu tin intencion di trata e asunto mediante legislacion specifico.

AFTA ta haya tambe un papel importante den preparacion di e ley. Segun e rapport, tin acuerdo cu e autoridad lo participa activamente den preparacion di e regulacion y, despues cu e ley drenta na vigor, lo actua manera supervisor di cumplimento di e marco legal nobo. AFTA ta considera e funcion aki consistente cu su papel como supervisor di mercado y su experiencia den funcionamento di mercado y regulacion economico.

E siguiente fase lo concentra riba redaccion di e legislacion. AFTA a acorda cu minister y DWJZ cu e autoridad mes lo prepara un prome concepto di e Landsverordening, hunto cu e memorie van toelichting corespondiente, esta e documento cu ta splica contenido, meta y fundamento di un proyecto di ley.

Segun e rapport, e decision pa laga AFTA prepara e prome concepto ta permiti e autoridad haci uzo di e conocemento y experiencia cu ya el a acumula durante e investigacion di mercado y trabao despues riba e tema. AFTA ta señala tambe cu esaki por yuda e proceso legislativo avansa mas eficientemente, teniendo cuenta cu capacidad limita disponibel pa preparacion di legislacion.

Sinembargo, pa AFTA e preparacion di e concepto no ta nifica cu e regulacion ta aproba of cu e por drenta na vigor inmediatamente. Despues cu e prome conceptonan ta cla, e propuesta ainda mester pasa door di e proceso legislativo regular.

Segun e plan inclui den e rapport, esaki ta inclui elaboracion huridico adicional, coordinacion entre e diferente departamento gubernamental, conseho di Raad van Advies y finalmente tratamento pa Parlamento di Aruba.

Pa di dos mitar di 2026, enfasis ta riba preparacion di e prome concepto di e legislacion y otro trabao necesario pa prepara e proceso legislativo formal. E rapport no ta menciona un fecha exacto pa entrega di e proyecto na Parlamento, tampoco un fecha cu e ley lo por drenta na vigor.

E proceso legislativo actual ta resultado directo di e investigacion cu AFTA a haci na 2025. E estudio ey tabata concentra riba tarifanan pa transaccion cu carchi na Aruba y a origina despues cu sector empresarial a expresa preocupacion tocante e costonan halto y falta di claridad riba e tarifanan cobra pa acepta pago cu carchi di debito y credito.

E conclusion cu tarifanan local ta seis te siete biaha mas halto cu na Europa y Merca a pone atencion particularmente riba e afwikkelingsvergoeding. AFTA ta identifica precisamente e componente aki manera e parti mas grandi di tarifa total y como un costo cu, den contexto di Aruba, ta causa salida considerable di placa pa exterior.

E cantidad calcula di Afl. 45 miyon pa aña ta relaciona cu caracteristica particular di economia Arubano, unda turismo tin un papel importante y turista ta haci un cantidad grandi di nan pago cu carchi emiti pa institucionnan financiero den exterior. Den e casonan ey, segun e mecanismo describi pa AFTA, banco di e comerciante na Aruba ta paga e afwikkelingsvergoeding na banco di e consumidor.

Regulacion cu AFTA ta preparando ta busca interveni specificamente den e parti aki di e sistema, estableciendo e posibilidad pa limita e costo di e tarifa determina pa companianan di carchi.

E desaroyo ta forma parti di un agenda mas amplio di AFTA pa 2026. Den su rapport di seis luna, e autoridad ta menciona preparacion di regulacion pa transaccion cu carchi como un di su temanan principal, hunto cu investigacionnan riba transporte di container, garantia di airco y mercado automobilistico, y preparacion pa regulacion di awa y energia.

Cu esaki, e investigacion cu AFTA a cuminsa riba costonan di transaccion cu carchi ta drenta un fase nobo, esta preparacion di legislacion. E meta ta pa yega na un sistema di pago mas transparente y eficiente, mientras e proceso legislativo ainda mester sigui su curso prome cu e regulacion nobo por drenta na vigor.