Varios representante di companianan di tour cu ta ofrece excursion off-road na Aruba a uni nan voz pa expresa preocupacion tocante ceramento di camindanan y colocacion di baranca na diferente parti di Costa Norte. Durante un conferencia di prensa recien, representantenan di e sector a indica cu e medidanan ta limita acceso na rutanan cu nan ta uza pa excursion, pero segun nan e asunto ta bay mas leu cu solamente impacto riba nan actividad comercial. Nan ta considera cu acceso na Costa Norte tambe ta importante pa residentenan local cu tradicionalmente ta uza e area pa recreacion, pesca, surfing y otro actividad.

E conferencia di prensa a tuma lugar cerca di Lighthouse caminda a pone barancanan pa cera e caminda cu e operadornan di tour tabata uza pa pasa cu vehiculo off-road. Representantenan di diferente compania a presenta hunto, enfatisando cu den e asunto aki nan no ta mira otro como competidor, sino como parti di un solo industria cu ta enfrenta e mesun preocupacion.

Segun nan, durante ultimo periodo nan a observa ceramento y colocacion di baranca y otro obstaculo den zonanan di Costa Norte. E desaroyo aki a crea preocupacion entre operadornan cu ta depende di acceso na e area pa ofrece excursion na bishitantenan.

E operadornan a indica cu e asunto no ta limita na e ruta unda nan a tene e conferencia. Nan a menciona diferente parti di Costa Norte, incluyendo e zona entre California Lighthouse y Alto Vista, y a expresa preocupacion cu restriccionnan por sigui extende den direccion di Bushiribana, Natural Bridge, Blackstone Beach y Daimari, te cerca di entrada di Parke Nacional Arikok.

Pa e sector, un reduccion continuo di rutanan accesibel por cambia considerablemente e tipo di excursion cu companianan por ofrece. Costa Norte ta forma un parti importante di varios tour off-road, particularmente pa bishitantenan cu kier conoce otro parti di Aruba fuera di zonanan hotelero y beachnan mas frecuenta.

Segun e operadornan, bishitantenan frecuentemente ta reacciona positivamente ora nan conoce e paisahe di Costa Norte di Aruba. Nan ta considera e contraste entre e costa mas bruto y e zonanan turistico tradicional manera un elemento importante di e experiencia di conoce Aruba. E sector ta señala cu comentario di bishitantenan riba plataforma online tambe ta mustra interes pa actividadnan cu ta permiti nan explora naturalesa y e parti menos urbanisa di e isla.

E preocupacion di e companianan ta cu si cada biaha menos ruta ta disponibel, e oferta di actividadnan por bira mas limita. Nan ta teme cu esaki eventualmente por concentra mas bishitante den beachnan y otro atraccionnan popular, aumentando presion riba e mesun lugarnan durante dianan cu actividad turistico ta halto.

Sinembargo, e operadornan ta enfatisa cu nan preocupacion no ta exclusivamente relaciona cu turista. Segun nan, Costa Norte ta un area cu pa generacionnan a ser uza pa residentenan di Aruba pa diferente actividad. Nan a menciona famianan cu ta pasa tempo den e area durante fin di siman, piscadornan cu ta uza camindanan pa yega na e costa, y personanan cu ta practica surfing of otro actividad recreativo.

Pa e motibo ey nan ta enfatisa cu ceramento di e rutanan aki tambe un asunto di acceso di comunidad local na un parti di e isla cu hopi hende ta considera como parti di nan herencia y forma tradicional di recreacion.

Durante e conferencia, e operadornan a reconoce importancia di proteccion di naturalesa. Nan a menciona specificamente e duinnan como un area cu mester ricibi proteccion y unda acceso di vehiculo no mester ser permiti. Segun nan, un parti di e solucion por ta borchinan mas cla y visibel pa indica unda trafico no ta permiti y kico ta e motibo pa proteccion di cierto zona.

E sector ta considera cu proteccion di naturalesa y continuacion di actividad off-road no necesariamente mester exclui otro. Nan ta propone pa identifica y designa rutanan specifico unda vehiculonan por sigui pasa, mientras zonanan vulnerable ta keda protegi. Di e manera ey, segun nan, por controla trafico mihor sin cera acceso na un parti grandi di Costa Norte.

Un posibilidad cu nan a menciona ta pa prepara rutanan designa specificamente pa vehiculo 4×4. E idea ta pa establece camindanan cla cu por ser uza tanto pa companianan di tour como pa otro usuario, mientras acceso na area cu ta sensitivo ta keda restringi. Segun e operadornan, un sistema asina por contribui na mas seguridad y na mesun momento facilita proteccion di naturalesa.

Seguridad tabata otro punto cu nan a pone enfasis riba dje. Operadornan a rechasa e idea cu companianan di tour simplemente ta sali cu e intencion di core iresponsablemente na e Costa Norte. Nan a indica cu evita accidente ta un prioridad, tanto pa proteccion di bishitantenan como pa nan propio personal y reputacion di e sector.

Tour guidenan no solamente ta conduci bishitantenan di un punto pa otro. Durante excursion nan ta duna informacion tocante e isla, orienta bishitantenan tocante comportamento sigur, splica kico por y no por haci den diferente area y compaña e grupo durante henter e recorido.

E operadornan ta considera cu nan tin tambe un funcion como representante di Aruba. Durante excursionnan nan ta recomenda restaurant, tienda, atraccion y otro actividad, loke segun nan ta contribui na economia di e isla. Nan ta mira excursionnan no solamente como un producto individual, sino como un manera pa bishitante conoce mas di e isla.

Ademas di e consecuencianan pa e companianan, nan a subraya tambe e impacto cu e situacion por tin riba trahadornan den e sector. Nan a splica cu hopi tour guide ta cabes di famia y ta depende di e actividad pa nan entrada. Un reduccion den cantidad of alcance di e tournan por tin consecuencia directo pa empleadonan y nan famia.

E sector ta considera cu e aspecto economico mester forma parti di cualkier decision tocante acceso na e Costa Norte. Turismo ta un pilar importante di economia di Aruba y excursionnan ta forma parti di e oferta cu bishitantenan tin durante nan estadia. Segun e operadornan, Aruba no mester perde di bista cu bishitantenan no solamente ta busca hotel y beach, sino tambe experiencia cu ta permiti nan conoce e isla.

Na mesun momento, nan ta reconoce cu uzo intensivo di area natural por exigi regulacion. Nan posicion ta cu regulacion mester busca un balansa entre proteccion ambiental, seguridad, actividad economico y acceso recreativo.

E operadornan ta pidi p’esey pa busca solucionnan alternativo prome cu opta pa ceramento completo di camindanan. Entre e posibilidadnan tin definicion di ruta autorisa, borchinan mas cla, proteccion mas visibel di duinnan y otro area vulnerable y organisacion di trafico off-road di un manera mas controla.

Segun e sector, un modelo cu ta establece unda vehiculo por y no por pasa por crea mas claridad pa tur usuario. Esaki por aplica tanto na e operadornan di tour como na residentenan y bishitantenan cu ta explora e area independientemente.

E preocupacion principal expresa durante e conferencia ta cu, si ceramento di ruta continua sin alternativa, acceso na un parti considerable di e Costa Norte por bira cada biaha mas limita. Pa e operadornan, consecuencia di esaki no lo keda solamente den sector di tour, sino por afecta recreacion local, actividad tradicional y e diversidad di experiencia cu Aruba por ofrece como destinacion.

Nan ta spera p’esey cu por yega na un solucion cu ta conserva e naturalesa di Aruba sin elimina acceso responsabel na e Costa Norte. E sector ta dispuesto pa forma parti di dialogo tocante un sistema di ruta designa y otro medida cu por combina seguridad, proteccion ambiental y continuacion di actividad turistico y recreativo.

Pa e operadornan, e meta final ta pa Costa Norte keda un area cu tanto residentenan como bishitantenan por conoce y disfruta, mientras e partinan cu mester di proteccion special ta ser conserva. Nan ta considera cu un balansa entre e diferente interesnan ta preferibel na un situacion unda ceramento di caminda ta bira e solucion principal.

Reunion cu minister Herde


 Despues di e declaracionnan di e sector, minister Rene Herde a indica ayera tardi cu e lo tene un “Encuentro cu Minister” awe diabierna, cu e companianan y operadornan concerni, di 2pm pa 4pm na John F. Kennedy Education center, cu intercambio di informacion riba ruta pa UTV como tema central.

Segun e minister a bisa den un comunicado di prensa, “e reunion ta brinda oportunidad pa e operadornan comparti nan preocupacionnan, experiencia y sugerencianan directamente, mientras Gobierno por informa riba e pasonan cu ta tumando y e alternativa den preparacion y kita tur mal informacion circulando.”