Polis a detene un agente policial diahuebs riba sospecho di trafico ilegal di hende of mensensmokkel.

Su esposa tambe a keda deteni. Ambos a presenta ayera tardi dilanti hues-comisario y nan detencion a keda alarga, segun un comunicado di Ministerio Publico (OM).

E sospecho contra e dos sospechosonan aki ta encera cu nan a duna hendenan entrada na Aruba, mientras nan tabata sa cu esey ta contra ley. Tambe nan a duna acomodacion na e mesun personanan aki y na otronan sin estadia legal na Aruba. Ademas ta sospecha nan di falsificacion y di a pone e personanan aki traha ilegalmente.

Den boca di pueblo, e terminonan trafico ilegal di hende (mensensmokkel) y trata di hende (mensenhandel) ta ser bruha hopi biaha. Sinembargo, ta trata di dos hecho castigabel totalmente diferente.

Mensenhandel

Ora di trata di hende of mensenhandel ta referi na explotacion di persona. Esaki por tuma diferente forma.

Explotacion laboral ta (por ehempel) ora un persona tin cu traha bao di condicionnan malo, cu un sueldo hopi abao, sin dia liber of sin e posibilidad pa bay di trabao. Explotacion sexual ta ora ta obliga un persona pa haci actonan sexual sin cu nan mes kier. Explotacion criminal ta ora ta obliga un persona pa comete crimennan, manera transporta droga.

Mensensmokkel

Den e investigacion aki ta trata di trafico di hende of mensensmokkel.

E delito aki ta referi na crusa frontera di un pais na un manera ilegal. Hasta si e persona doño di curpa cu ta ser trafica mes kier bin Aruba (por ehempel dor di drenta como turista y keda pa traha), e ta contra ley. Practicanan asina ta debilita maneho di Pais Aruba y ta trece riesgo y gasto pa henter comunidad.

Ademas sospechosonan di e tipo di crimen aki ta gana gran cantidad di placa na un manera ilegal, mientras cu otro ciudadanonan mester traha duro y largo pa gana nan bida. Esaki ta duna e sospechosonan un bentaha deshonesto riba otro persona (y nan negoshi) cu si ta cumpli cu regla y ley.

Pa colmo, e personanan envolvi tabata hopi dependiente di e sospechosonan. Nan tabata traha pa nan y ta biba cerca nan. Nan mester a obedece, sino nan lo perde nan lugar di biba y nan entrada. Nan no tabata ni sigura. Esey kiermen cu si algo a pasa nan, tur gasto lo a cay pa comunidad carga.

Cu un agente policial, kende precisamente mester mantene ley, ta envolvi den e tipo di hecho asina ta haci e cos mucho mas serio.

E investigacion den e caso ta andando. Mas informacion lo por ser duna na momento cu desaroyo di e investigacion ta permiti, e comunicado di OM ta finalisa.