Kier solucion rapido pa e situacion di watersports; no kier laga tempo bay perdi pa kibra e cultura ‘lax’ di enforsa regla. AHATA a manda un carta cu recomendacion riba regulacion y implementacion di leynan y medida di seguridad riba beach pa Prome Minister Evelyn Wever Croes.

E carta ta sigui un reunion cu Prome Minister y Departamento di Infrastructura y Planificacion, DIP a organisa hunto cu diferente actor relevante, incluso ATA y AHATA riba e tema di watersports. Esaki despues di e accidente tragico unda un hoben a perde su bida. Durante e reunion cu a tuma lugar dia 29 di Maart, a papia di e proceso di permiso actual, preocupacionnan y necesidadnan.

AHATA ta pendiente di otro reunion y pa e motibo aki a concipia recomendacionnan y a entrega nan na Gobierno.

AHATA den su carta a bisa cu manera a discuti den e reunion na fin di Maart, falta di regulacion y implementacion consistente a causa un cultura ‘lax’ (floho) cu no ta enfoca riba disciplina y seguridad. E recomendacionnan cu AHATA a formula ta pa eleva seguridad pa tur hende cu ta gosa di e areanan di beach popular na Aruba.

Permiso precario

Segun AHATA e permiso precario pa e area di e negoshi di watersports cu ta bende e tournan, mester rekeri por lo menos cu tur capitan, of esun cu ta maneha e boto tin un licencia di nabegacion valido; cu ningun di e empleadonan ta viola ley na beach of ora cu nan ta riba e botonan. AHATA ta kere cu mester tene test regular pa uso di droga cerca e capitan of manehado di boto. Cada capitan y persona cu ta traha riba e boto mester tin un certificado di prome auxilio (CPR). Mas ainda e compania di watersport mester tin un seguro di responsabilidad di por lo menos un miyon dollar. Y cualkier violacion di e rekisitonan aki mester resulta mesora den revocacion di e precario.

E permiso pa por bende actividad di watersports mester inclui por lo menos cinco criteria basico. Nan ta cu cada capitan of manehado di boto tin un licencia di boto. E propeller di e motornan cu ta colga patras di e boto mester tin tapa. Nan tambe mester tin un seguro di responsabilidad di minimo un miyon dollar y e capitan y tur assistent riba e boto mester tin nan certificado di prome auxilio cu mester keda renoba anualmente. Tur personal mester sigui ley.

Cualkier violacion di e rekisitonan aki mester resulta den revocacion inmediato di e permiso.

Regulacion pa seguridad

Ademas, AHATA ta urgi Gobierno pa introduci protocolnan obligatorio con pa maneha e botonan y clientenan, por ehempel cu mester paga e motor ora cu e ta cerca di cliente, y con pa yuda clientenan subi e boto. AHATA ta bisa cu e regulacionnan aki por keda determina pa un comision di expertonan di watersports y boto cu ta responsabel. E reglanan obligatorio mester ta inclui den e rekisitonan pa haya un permiso. Tambe AHATA ta recomenda pa modernisa e proceso di licencia pa boto pa asina rekeri curso riba protocolnan di seguridad y regulacion.

Control

Mester bin un programa di patruya y control riba implementacion di ley di parti di Strandpolitie y tambe Polis Maritimo, tanto riba beach como na lama y Gobierno mester percura cu nan tin suficiente personal y ekipo pa haci nan trabou. Den e mesun rosea, lo mester coordina y delinea responsabilidadnan di patruya entre Wardacosta y Polis Maritimo, mientras cu mester introduci e distribucion structural di informacion riba violacionnan entre Polis Maritimo, Strandpolitie, DIP y Directie Scheepsvaart.

Disciplina

AHATA tambe ta pidi Gobierno pa ricibi copia di e precarionan di e operadornan di watersports, pa asina e teamnan di seguridad di e hotelnan por yuda den garantisa disciplina y hasta raporta cierto violacionnan di regla. Por ehempel, luganan unda esnan cu ta bende e servicio di watersports ta pone e parasolnan, e cantidad di parasol, area unda ta haci ekipo limpi. AHATA, desde Januari 12 repetidamente a pidi DIP pa copianan di e precarionan, pero te cu awor no a haya ningun reaccion.

E asociacion a urgi Gobierno pa limita e cantidad di permiso pa por opera actividad di watersports na e areanan di Palm Beach y Eagle Beach y tambe limita y controla e cantidad di boto cu por para den e awanan dilanti di Palm Beach y Eagle Beach.

AHATA ta conclui su carta bisando cu ta spera cu e urgencia di e asunto aki lo no bay perdi segun tempo pasa. Pasobra tin hopi cos cu por y mester haci pa garantisa un miho nivel di seguridad pa residente y bishitante igual, cu ta haci uso di e beachnan popular di Aruba. Mas importante di tur ta e enforsamento consistente, e implementacion continuo pa por mantene un nivel di disciplina.

Reaccion rednan social

Mester bisa cu algun operador di watersports a cuminza reacciona riba media social y a urgi pa autoridadnan enforsa e asina yama buffer zone y tambe e velocidad maximo. Cualkier usuario di beachnan por tuma nota di e velocidad halto cu ta core memey di botonan yena cu hende.

Mescos ta conta pa botonan cu ta yega hopi cerca di costa. Na e area Tres Trapi por ehempel, no tin marcacion di e zona unda no ta permiti boto. Consecuentemente hopi biaha yatenan, jetskis ta crusa areanan unda tin hende ta snorkel sin cu tin mucho atencion unda ta permiti pa yega cerca of no.

Otro actividad popular ta e asina yama Banana Boat of e otro ‘floaties’ cu botonan ta trek cu velocidad halto, cu segun un doño di un compania acuatico ta crea hopi peliger. E velocidad maximo cu ta recomenda pa un Banana Boat ta di 15 miya pa ora pa mucha y 20 miya pa ora tin adulto. Na Aruba facilmente e operadornan ta yega velocidadnan di 35 pa 40 miya pa ora. Consecuentemente ora cu un persona mester cay for di Banana Boat, e por haya golpi pisa. Tin diferente caso di hende cu a sufri problema cu nek y hasta corta den cabes.

Sinembargo, mester bisa cu tur e recomendacionnan y observacionnan presenta pa AHATA den su recien carta y tambe locual a skirbi riba media social no ta nada nobo. E problema di falta di regulacion y implementacion di ley ta existi pa hopi aña caba. Es mas, a bin diferente comision pa trece sugerencia cu mester a produci maneho concreto, pero te ainda no a logra yega na e obhetivo.

E reto pa cumpli cu regla

Mester bisa cu e congestionamento riba beach a crea diferente situacionnan tenso cu y entre companianan di watersports. No solamente cu tabatin bringamento entre trahadonan, pero na 2014, e tempo ey Radisson hotel, a entama caso contra dos operador di watersports cu segun e hotel no tabata cumpli cu regla y tabata yena e luga cu parasol y stoel cu tabata huur na turista. E tempo ey, Radisson a laga sa di no ta contra e operadornan di watersports, pero pa nan cumpli cu e condicionnan di nan permiso y cu tabata manda carta regularmente pa Strandpolitie. E tempo ey locual Radisson a mustra cu tabatin falta di cumplimento cu rekisitonan. Algo cu un biaha mas ta keda señala den e carta di recomendacion di AHATA.