Recientemente, un delegacion di Aruba Tourism Authority a conclui nan bishita na Europa cu varios reunion importante dirigi riba e continente Europeo den su totalidad. Como parti di e diferente reunionnan,a sostene reunionnan cu ehecutivonan di KLM y TUI tambe cual ambos aerolinea ta hopi importante pa nos mercado di Europa. Den ambos acontecimento AHATA tambe a forma parti di e reunionnan cu e dos aerolineanan.
Segun e comunicado cu nos a ricibi ta indica cu te cu october 2019, Europa a trece 77.684 bishitantenan pa Aruba, loke a representa 8.4% di e marketshare di bishitantenan pa Aruba. Compara cu e mesun temporada pa aña 2018, esaki ta un crecemento total di 5.4%.
Te cu october 2019, 33% di e pasaheronan Europeo a scoge KLM pa bula pa nos isla di cual 41% ta procedente di Hulanda.
Den e mesun temporada e aerolinea TUI a trece 17% di e total di biaheronan Europeo pa nos destinacion, di cual 33% ta procedente di Hulanda.
A reuni cu ehecutivonan di KLM y di TUI referiendo e schedule pa 2020, dialogando riba posibilidadnan pa subi e cantidad di capacidad di asiento aereo y/of frecuencia di vuelonan pa Aruba. Esaki ta parti integral pa Aruba su strategia di diversificacion. Mester di mas capacidad pa por sigui mira crecemento di e continente aki. Un continente cu a crece cu un averahe anual di 2.3% ora tira un bista riba e periodo di 2011 pa 2018.
Ademas a combersa riba e posibel impacto di e actual andansa di e Corona virus. E impacto ta uno sigur cu ambos aerolinea ta sinti, y cu posiblemente lo por a cuminsa afecta biahe pa Caribe na momento cu a reuni cu nan dialuna ultimo. Ta algo cu a caba di drenta e mercado Hulandes na es momento ey y cu a bira un topico hopi actual den e continente Europeo. Lo sigui monitorea e desaroyo, y ahusta strategia unda cu tin mester. Tambe a papia di capacidad pa e periodo di winter 2020/2021 cu ta inicia na november 2020 te cu april 2021. E reunionnan aki a bay hopi bon y A.T.A., conhuntamente cu AHATA y AAA lo sigui evalua capacidad pa cu e diferente rutanan Europeo.
