AHATA a dirigi un carta fecha 9 di october 2019 na miembronan di Parlamento di Aruba encuanto e preocupacionnan cu nan tin ainda pa loke ta e cambionan proponi den e ley di Serlimar y tambe e ley acompañante di impuesto special riba timeshare, hotel y otro acomodacion turistico.

Despues di e prome buelta di tratamento den Staten, e organisacion cu ta representa empresanan den sector turistico ainda a keda cu un serie di pregunta, cual ta:

  1. AHATA ta puntra si a haci investigacion riba e impacto cu e tarifanan proponi lo bay tin riba tur empresa registra y tambe riba turista individual, y con e cobranzanan aki ta afecta stimulacion di negoshi chikito mirando e aumento di ‘cost of doing business’? Ademas, kico lo ta e efecto di e cobranzanan adicional aki riba turismo? Si a haci algun investigacion, lo ta posibel pa haya copia di esaki?
  2. Si tur cliente ta paga mes hopi pa recoge y procesa desperdicio cerca Serlimar, con esey ta cuadra cu e principio di gobierno cu ‘esun cu ta contamina, ta paga’ (‘polluter pays’), y con esaki ta stimula comunidad pa reduci desperdicio?
  3. Ta menciona cu e ley aki ta beneficia e habitantenan di Parkietenbos como un solucion pa e desperdicio na e sitio. Con esey ta bay ta, si e dump ta cera caba pa mas di un aña y desperdicio ta ser procesa caba cu un metodo alternativo (‘eco-bales’). Y con e ley aki ta resolve e asunto di desperdicio, via creacion di fundamento pa un incinerator? Si ta asina, ki prueba tin cu un incinerator ta e unico y miho solucion pa maneho y procesamento di desperdicio, si a defini e ‘Request For Information’ (RFI) di manera limitativo solamente pa opcion di ‘waste to energy’?
  4. E entradanan genera di e cobranza proponi lo reemplasa e Afl 22 miyon cu gobierno ta paga anualmente na Serlimar pa e servicionan cu nan ta presta na comunidad?
  5. Ki costonan specifico di Serlimar e cobranza proponi lo bay cubri riba un base anual?
  6. A introduci algun informacion recientemente con lo logra introduci y controla eficiencia na Serlimar a largo plaso?

Den e carta extenso AHATA a recapitula tambe e serie di pregunta cu nan tabatin prome cu e tratamento den Parlamento a cuminsa siman pasa.

Finalmente, AHATA ta reitera nan recomendacion pa no aproba un ley cu no ta duna un aclaracion adecua di e gastonan cu finalmente nos comunidad y economia mester bay carga, y cu ta carece tambe di claridad di un plan general di maneho sostenibel di desperdicio. Ta urgi gobierno pa busca un solucion sostenibel y di largo plaso pa Aruba su problema di desperdicio, y pa introduci un plan solido pa un operacion eficiente di Serlimar. AHATA ta apoya completamente e clausura di Parkietenbos y e buskeda di un miho solucion pa maneho di desperdicio na Aruba. E gremio ta di acuerdo cu e compromiso expresa di banda di gobierno cu un Economia Circular y ta pidi pa e solucion pa desperdicio ta mara na e meta aki.

Un incinerator ta rekeri segun AHATA e garantia di un minimo di volumen di desperdicio, loke consecuentemente ta encurasha disponibilidad di desperdicio na luga d e principionan di un Economia Circular: Reusa, reduci, y recicla. E recomendacion di e gremio ta pa considera solucion banda y mas leu cu kima desperdicio, considera anto solucion alternativo y a largo plaso cu otro pais lo por a introduci. Ta recomenda pa permiti mas tempo pa un analisis completamente independiente, di solucion proponi pa e proceso di RFI di gobierno, como tambe opcionnan alternativo. AHATA finalmente ta ofrece nan apoyo y participacion pa un analisis asina.

 

LEAVE A REPLY

Please enter your comment!
Please enter your name here