Durante un conferencia di prensa ayera Minister Presidente Wever – Croes a duna informacion tocante e negociacion cu CITGO encuanto e refineria, cu tabata tumando lugar pa varios luna. Esaki cu e obhetivo di yega na un Memorandum of Understanding (MOU) pa terminacion di e contract, pa por recupera e refineria y terminal, y algun otro propiedad cu Citgo a lease di Refineria di Aruba NV (RdA).

Prome Minister Evelyn Wever –Croes (MEP) a bisa cu henter e proceso a cuminsa algun tempo pasa, na april 2019 na Washington, unda e tabata hunto cu premier di Curacao, na momento cu a bira cla cu Citgo no por a cumpli cu su obligacion encera den e contract cu nan tin cu Aruba.

Sinembargo e ta bisa cu e contract ta formula di tal manera cu e ta beneficia Citgo y na desbentaha di gobierno, cu no por sali sin mas di e convenio aki. Pero a aumenta presion riba Citgo y a papia tambe cu representante di presidente interino di Venezuela, Juan Guaido.

A cuminsa un conversacion specifico cu un grupo di persona pa libera di e contract. “Nos sa cu nos ta mara na e contract, pero mirando e crisis di Venezuela y e impacto cu esey tin, nos a pidi pa libera nos di e contract pa nos por desaroya nos economia y mantene esey na nivel.”

Wever –Croes a duna di conoce cu e conversacionnan cu tur hende concerni a tuma su tempo y energia, pero a yega na e momento unda Citgo a admiti cu nan no por cumpli cu e acuerdo firma na 2016, y esey a pone mas presio riba Citgo pa por haya e refineria, terminal y demas propiedadnan.

Esey tabata e prome fase di e plan pa recupera e refineria y opera esaki cu un otro compania, o yega na un otro destino pa e facilidadnan. E MOU ta e punto principal di e prome fase unda a yega na un acuerdo pa duna Aruba e yabi di e refineria y suspende e contract existente. Ta keda ainda e parti di negocia e puntonan final, eventual exigencia o demanda cu ta existi, prome cu por clausura e capitulo di e convenio cu Citgo. Den e fase cu ta tras di lomba awor tabatin consulta cu State Department y Office of Foreign Assets Control (OFAC) di Department of Treasury pa scucha nan posicion y conseho.

Den e negociacion a toca tambe e punto cu Citgo lo mester paga e compensacion (di 350 miyon dollar; red.) cu e partido cu no cumpli debe e otro, segun e convenio. Di otro banda, si Citgo lo tabata desea y no entrega yabi, e disputa legal pa haya e instalacionnan lo por a dura varios aña, loke no ta conveni Aruba. Aki a yega na un acuerdo cu ta conveni tur dos partido, aunke sin perspectiva pa Aruba haya e suma di daño y perhuicio aki pa e eventual desmantelamento di e refineria.

E mandatario a bisa tambe cu Citgo mester cumpli ainda cu tur otro obligacion, manera e lease y impuesto atrasa y e pagonan na e empleadonan propio y di e contratistanan. “Un punto importante pasobra nan a bisa cu nan tin placa pa paga empleado y nos a bisa nan cu nos no ta negocia te ora nan garantisa e derecho di empleadonan.”

Awor cu Aruba a haya yabi y ta dispone di e instalacionnan atrobe, esaki ta habri caminda pa Aruba busca y negocia den serio cu otro candidato cu ta interesa pa opera e terminal y refineria, incluyendo e facilidadnan di waf.

Wever –Croes a menciona cu nan ta papiando cu otro partido interesa. Nan tin un lista di 25 compania cu a expresa interes, un cantidad interesante pero mester wak cu nan ta serio y cualifica pa por maneha un industria manera cu tin na Aruba.

Segun e ta bisa como gobierno nan no lo bay limita nan mes na e 25 companianan aki pero ta keda activo pa haya otro inversionista cu ta interesa. “Un miho partner ta nos meta pa Aruba, cu tin fondo pa atende e falta di mantencion. Lo tin un comision cu lo ta encarga cu atende e negociacionnan. Sindicato di empleado tambe lo ta envolvi.”

Tambe esun cu finalmente cera un contract pa e refineria lo mester cumpli cu reglanan di medio ambiente, paga empleado bon y ta un bon partner pa Aruba. Un ehempel cu e mandatario a duna ta e parti di e tankinan di e terminal di ‘transshipment’ di crudo cu ta segun su opinion neglisha pa Citgo, caminda tin tanki cu balor economico halto pero cu falta mantencion.

E ta bisa cu e parti aki por genera entrada pa gobierno y crea cupo di trabou. Esaki por ta beneficioso tambe pa e compania di importacion y distribucion di combustible (FMSA) cu por bay opera e terminal, loke por resulta den gasto di operacion mas abao.

 

LEAVE A REPLY

Please enter your comment!
Please enter your name here